გასული კვირიდან არასამთავრობო და მედიაორგანიზაციების ინიციატივით დაიწყო აქცია `ეს შენ გეხება”, აქციის მონაწილეები აპროტესტებენ 2011 წლის დეკემბერში მიღებულ საკანონმდებლო ცვლილებებს, რომელიც ზღუდავს სამოქალაქო აქტივობას, საკუთრების უფლებას, გამოხატვისა და პოლიტიკური საქმიანობის თავისუფლებას, აფერხებს ქვეყნის დემოკრატიულ განვითარებას. 170-მდე მედია და არასამთავრობო ორგანიზაციამ ხელი მოაწერა პეტიციას, რომელიც ამ ცვლილებებს მიუღებლად აცხადებს და მის შეცვლას ითხოვს. გაეროს სპეციალურმა მომხსენებელმა მშვიდობიანი შეკრების და გაერთიანების თავისუფლების საკითხებში, მაინა კიაიმ თავის მოხსენებაში აღნიშნა, რომ `პოლიტიკური თამაშის არათანაბარ პირობებთან გვაქვს საქმე." საკანონმდებლო ცვლილებები განუსაზღვრელ და არაკონსტიტუციურ უფლებამოსილებებს ანიჭებს პარტიების დაფინანსების მთავარ მაკონტროლებელს საქართველოს კონტროლის პალატას. სერიოზულ საფრთხეებს უქმნის როგორც თითოეულ მოქალაქეს, ისე სამოქალაქო საზოგადოებას, მათ შორის, მედიას. აუარესებს საარჩევნო გარემოს ქვეყანაში. 16 თებერვალს არასამთავრობო და მედიაორგანიზაციებმა პარლამენტში პეტიცია და საკანონმდებლო წინადადება შეიტანეს. პარალელურად გაიმართა აქცია, სადაც მოქალაქეებმა სხვადასხვაგვარად გამოხატეს პროტესტი... ეს ყველაფერი ჩვენთვის კეთდება, იმისთვის,რომ დღეს თუ არა, ხვალ არ აღმოვჩდეთ უსამართლო კანონმდებლობის მსხვერპლი. მონაწილეებმა პროტესტი საყვირებით გამოხატეს. მათ ეცვათ მაისურები წარწერით `ეს შენ გეხება~ და ხელში ეჭირათ პლაკატები იმავე წარწერით. ამ ლოზუნგით აქციის მონაწილეები ხაზს უსვამდნენ, რომ საკანონმდებლო ცვლილებები პოტენციურად ყოველი მოქალაქის უფლებებს ზღუდავს. იურისტების შეფასებით, გასული წლის დეკემბერში მიღებული საკანონმდებლო ცვლილებები, ბუნდოვან და ორაზროვან განმარტებებს მოიცავს და პოლიტიკური ნიშნით დევნის საშუალებას იძლევა. ცვლილებების მიხედვით, ამის საფუძველზე, კონტროლის პალატას უფლება ეძლევა მონიტორინგი გაუწიოს პოლიტიკურ პარტიასთან`არაპირდაპირ კავშირში მყოფი~ ფიზიკური თუ იურდიული პირის ფინანსებს და, საჭიროების შემთხვევაში, დააყადაღოს მისი ქონება. ამ გადაწყვეტილებათაAმისაღებად კონტროლის პალატას სასამართლოს ნებართვა არ ჭირდება: `ეს კანონები კონტროლის პალატას ძალიან სუბიექტურ გადაწყვეტილების მიღების საშუალებას აძლევს და მას შეუძლია, დაუსაბუთებლად, სერიოზული შეზღუდვები დაუწესოს ნებისმიერ ორგანიზაციას და ადამიანს," _ ასე შეაფასა საკანონმდებლო ცვლილებები საქართველოს ახლგაზრდა იურისტთა ასოციაციის თავჯდომარე თამარ ჩუგოშვილმა ლიბერალთან საუბრისას. გაეროს სპეციალურმა მომხსენებელმა მშვიდობიანი შეკრების და გაერთიანების თავისუფლების საკითხებში, მაინა კიაიმ ქვეყანაში რვადღიანი ვიზიტის დასასრულს საქართველოს პარლამენტის მიერ 2011 წლის დეკემბერის ბოლოს რიგი საკანონმდებლო ცვლილებების მიღებით შეკრების თავისუფლებაზე შეზღუდვების დაწესების გამო შეშფოთება გამოთქვა: "ნათელია, რომ აღნიშნული შეზღუდვები დაწესდა მოახლოებულ საპარლამენტო და საპრეზიდენტო არჩევნებში გარკვეული პიროვნებების მონაწილეობის შეზღუდვის და ხელის შეშლის მიზნით”, _აღნიშნა ექსპერტმა. მისივე თქმით, "ამ კონტექსტში გაერთიანების თავისუფლება მიზნად ისახავს ყველა პოლიტიკურ პარტიას მისცეს არჩევნებში რეალურად მონაწილეობის იმედი. საქართველოს შემთხვევაში პოლიტიკური თამაშის არათანაბარ პირობებთან გვაქვს საქმე. 2003 წლიდან მოყოლებული საქართველომ გრძელი გზა განვლო”, აღნიშნა ბატონმა მაინა კიაიმ. `ამასთანავე, არსებობს რიგი დამაფიქრებელი ნიშანი იმისა, რომ მოდერნიზაციასა და ინვესტიციებზე მეტმა ორიენტირებამ შესაძლოა ადვილად მიაყენოს ზიანი ვარდების რევოლუციის შედეგად რთული პროცესის გზით მიღწეულ წარმატებებს ადამიანის უფლებების სფეროში. იმის გათვალისწინებით, თუ როგორ მოხდა არსებული მთავრობის ჩამოყალიბება, არსებობს მშვიდობიანი შეკრების და გაერთიანების თავისუფლების პატივისცემის მოლოდინი,”_ დასძინა გაეროს სპეციალურმა მომხსენებელმა მშვიდობიანი შეკრების და გაერთიანების თავისუფლების საკითხებში, მაინა კიაიმ. 15 თებერვალს ქ. გურჯაანში `სამართლიანი არჩევნებისა და დემოკრატიის საერთაშორისო საზოგადოება~ (ISFED) საქართველოს ახალგაზრდა იურისტთა ასოციაციასთან პარტნიორობით, გაიმართა მრგვალი მაგიდა, რომელსაც ადგილობრივი თვითმმართველობის, არასამთავრობო ორგანიზაციების, პოლიტიკური პარტიების და მედია საშუალებების წარმომადგენლები ესწრებოდნენ. შეხვედრაზე 2011 წლის დეკემბერში, კანონში განხორციელებული ცვლილებები განიხილებოდა, რომელსაც საზოგადოებისა და პოლიტიკური პარტიების მხრიდან დიდი გამოხმაურება მოჰყვა. მათი თქმით, საქართველოს ორგანულ კანონში და სისხლის სამართლის კოდექსში განხორციელებული ცვლილებები საფრთხეს უქმნის გამოხატვისა და საკუთრების უფლებებს და მას აქვს სამოქალაქო-პოლიტიკური აქტივობების შემზღუდველი ეფექტი, რომელიც ქმნის არათანასწორ საარჩევნო გარემოს. სამართლიანი არჩევნებისა და დემოკრატიის საერთაშორისო საზოგადოების ხელმძღვანელის ნანა დევიძის თქმით, მათი ორგანიზაცია აქტიურად იყო ჩართული ამ პროცესში. " ჩვენი ორგანიზაცია ყველა მოსმენას ესწრებოდა და ამ პროცესში აქტიურად იყო ჩართული. ასევე ჩვენს გვერდით იყვნენ ახალგაზრდა იურისტები და სამართლიანი არჩევნები. ყველა მოსმენაზე ორგანიზაციები აფიქსირებდნენ თავიანთ მოსაზრებებს არა მხოლოდ ზეპირად, არამედ მიმართვებით და რეკომენდაციებით. მისი მიღების შემდეგაც ვცდილობთ, რომ შეიცვალოს ანტიკონსტიტუციური მუხლები, რასაც მოიცავს ეს კანონი. ჩემი აზრით, საზოგადოების ჩართულობა გამოიღებს შედეგს და მიღებული იქნება ცვლილებები. ამ კანონით თავიანთი საქმიანობის განხორციელება გაურთულდებათ პარტიებს და არასამთავრობო ორგანიზაციებს. ეს კანონი, მინდა ხაზი გავუსვა, რომ მარტო წინასაარჩევნო პერიოდში არ მოქმედებს, ის უკვე დაწყებულია,"_ გვითხრა ნანა დევიძემ. დეკემბრის საკანონმდებლო ცვლილებებთან დაკავშირებით სოციალურ ქსელებზე, კერძოდ ფაცებოოკ-ზე სპეციალური გვერდიც შეიქმნა, სადაც აქტიურად განიხილება აღნიშნული თემა და უმრავლესობა თანხმდება, რომ "ეს კანონი მართლა ამყარებს იმის ალბათობას, რომ მოსახლეობა ცვლილებების, განვითარების, თავისუფლად აზროვნების და საკუთარი მსოფლმხედველობის ხმამაღლა დაფიქსირების სურვილის შემთხვევაში, კრიმინალური მენტალობის მქონე, არასრულფასოვან და ბნელ მასად დააკანონონ. არადა, ხომ თითოეული ადამიანი გრძნობს საკუთარი სხეულით, რომ ასეთები ძალიან დიდი უმრავლესობა ვართ". აღნიშნულ საკითხთან დაკავშირებით, არასამთავრობო და მედიაორგანიზაციები სხვადასხვა ღონისძიებების ჩატარებას უახლოეს მომავალშიც გეგმავენ.