გურჯაანის იუსტიციის სახლში ადგილობრივი თვითმმართველობის საჯარო მოხელეებისთვის, მიგრაციის და ევროკავშირთან უვიზო მიმოსვლის საკითხებზე საინფორმაციო შეხვედრა მოეწყო. მომხსენებლები სახელმწიფო მინისტრის აპარატის ევროპულ და ევროატლანტიკურ სტრუქტურებში ინტეგრაციის საკითხებში, მიგრაციის პოლიტიკის განვითარების საერთაშორისო ცენტრის (ICMPD), მიგრაციის საკითხთა სამთავრობო კომისიის სამდივნოს, საგარეო საქმეთა სამინისტროს, სახელმწიფო სერვისების განვითარების სააგენტოს, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს, და შინაგან საქმეთა სამინისტროს წარმომადგენლები იყვნენ. შეხვედრა კითხვა-პასუხის რეჟიმში წარიმართა. მომხსენებლებმა ისაუბრეს საქართველოსა და ევროკავშირს შორის ასოცირების ხელშეკრულებით გათვალისწინებული ვალდებულებების შესრულებასა და ამ მიმართულებით გასატარებელ ღონისძიებებზე. "ვინაიდან ადგილობრივ თვითმმართველობის მოხელეებს მოსახლეობასთან ყველაზე ახლო კონტაქტი აქვთ, ტრენინგის მიზანია, რომ ამ საჯარო მოხელეებმა ხალხს ინფორმაცია მიაწოდონ იმის თაობაზე, რას გულისხმობს უვიზო მიმოსვლა; როგორ ვითარდება ევროკავშირის და საქართველოს ურთიერთობები; რა ხელშეკრულებებზე აქვს საქართველოს ხელი მოწერილი; ასოციაციის შეთანხმებას რა სარგებელი მოაქვს მოქალაქეებისთვის და ა.შ. შესაბამისად, ხალხს რომ ეს ინფორმაცია მიაწოდონ, ბუნებრივია ჯერ თავად უნდა გაერკვნენ მიგრაციის პოლიტიკის და ყველა ამ საკითხებში, რომელიც ავღნიშნე", - განაცხადა speqtri.ge-სთან საუბარში მიგრაციის პოლიტიკის განვითარების საერთასორისო ცენტრის წარმომადგენელმა საქართველოში ზურაბ ყორღანაშვილმა. როგორც ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის სტრატეგიული კომუნიკაციების დეპარტამენტის უფროსმა თორნიკე ნოზაძემ აღნიშნა, დღევანდელი საუბრის თემა ძირითადად არის - რა ხდება საშინაო და საგარეო პოლიტიკის მიმართულებით, რა ძირითადი პრიორიტეტები აქვს სახელმწიფოს და რა ეტაპზე ვართ დღეს. "იქიდან გამომდინარე, რომ თვითმმართველობის ორგანოების წარმომადგენლები მოსახლეობისთვის პირველწყაროები არიან, როდესაც ადგილობრივი მოსახლეობა მოითხოვს ამ ინფორმაციას, ისინი სრულად უნდა იყვნენ ინფორმირებულნი. თუნდაც კონკრეტული მაგალითი, რომ ავიღოთ - უვიზო მიმოსვლა ევროკავშირთან: ეს არის კონკრეტული სარგებელი, თითოეული საქართველოს მოქალაქისთვის და შესაბამისად, როდესაც იგივე გურჯაანის მცხოვრებს დააინტერესებს, მას შემდეგ რაც, ევროკავშირთან უკვე შემოღებული იქნება უვიზო მიმოსვლა, რა უფლებები და რა მოვალეობები ექნება, რა თქმა უნდა პირველ რიგში მიმართავს ადგილობრივ თვითმმართველობას. შესაბამისად, ამ ორგანოებს უნდა ჰქონდეთ ამომწურავი ინფორმაცია და უფრო მეტი დეტალებისთვის უნდა იცოდნენ სად გადმოამისამართონ და ვის მიმართონ". ნოზაძის თქმითვე, შემდეგ კვირიდან ტელევიზიებში საქართველოს მოსახლეობა იხილავს ვიდეო რგოლებს, რომელიც განუმარტავს ხალხს თუ რა ძირითადი უფლებები და მოვალეობები აქვს საქართველოს მოქალაქეს, როგორ შეიძლება ისარგებლოს უვიზო მიმოსვლით. "ის საშიანო დავალება, რაც ჩვენ გვაქვს, ანუ ვიზის ლიბერალიზაციის სამოქმედო გეგმით გათვალისწინებული ვალდებულებები, უდიდესი უმრავლესობა შესრულებულია. ამ წლის ბოლოს უკვე წავა და იმედი გვაქვს, რომ საბოლოო ანგარიში იქნება ამ შესრულებასთან დაკავშირებით. შემდგომ უკვე პოლიტიკური გადაწყვეტილება იქნება ევროკავშირისგან მისაღები. ამ ეტაპზე ჩვენ ევროკავშირის ყველა დედაქალაქში ვიყავით და ყველგან გვაქვს იმის პირობა მიღებული, რომ როგორც კი შევასრულებთ ტქნიკურ დავალებას, პოლიტიკური გადაწყვეტილება იქნება დადებითი. არ მგონია, რომ ეს 2016 წელს გადასცდეს". პროექტი დაფინანსებულია ევროკავშირის მიერ, აღმოსავლეთ პარტნიორობის ინტეგრაციისა და თანამშრომლობის პროგრამის ფარგლებში. პროექტი დაიწყო 2013 წლის დეკემბერში და იგი 2017 წლის ივნისამდე გაგრძელდება.