რთველი 2013-ის მიმდინარეობისას გლეხები, რომლებსაც პინოსა და კაბერნეს ვენახები აქვთ, გაურკვევლობაში არიან. მათთვის უცნობია, ჩაიბარებენ თუ არა ქარხნები ამ ჯიშის ყურძენს. ზაურ ბეგაშვილს კაბერნე ნახევარ ჰექტარზე აქვს გაშენებული. როგორც მან აღნიშნა, ჯერჯერობით არ იცის, ჩაიბარებს თუ არა წელს რომელიმე ქარხანა ამ სახეობის ყურძენს, ან რა ფასს გადაუხდიან. -"დაახლოებით 4-5 ტონა მაინც უნდა დავკრიფო. წინა წლებში ამ ყურძენს ზეგაანის და მუკუზნის ქარხნები იბარებდნენ. შარშან დაისეტყვა და გასაყიდიც აღარ მქონდა. ახლა იძახიან, არც ერთი ქარხანა არ იღებსო. ჯერ მარტო 12-ჯერ შევწამლე, სხვა სამუშაოებიც ხომ იყო ჩასატარებელი. წლების წინ, კომუნისტების პერიოდში, ამ ყურძენს კარგი ფასი ჰქონდა. კილოს 4 მანეთად ვაბარებდი, ეხლა არ ვიცი რას უწუნებენ! ადრე თუ კარგი და ძვირფასი იყო, ეხლა აღარ ვარგა?"-გვითხრა მან. როგორც ჩვენთან საუბარში ღვინის ეროვნული სააგენტოსა და "რთველი 2013"-ს საკოორდინაციო შტაბის ხელმძღვანელმა ლევან დავითაშვილმა აღნიშნა, მოსახლეობას მოსავლის რეალიზაცია არ გაუჭირდება. -"კაბერნე" არის ის ჯიში, რომლისგანაც არ მზადდება ცნობილი ღვინოები-"მუკუზანი," "ახაშენი," "ქინძმარაული." ეს ღვინოები ქართული ჯიშისგან, საფერავისგან მზადდება. კომპანია დამოკიდებულია საბაზრო მოთხოვნაზე. შესაბამისად, შესყიდვებსაც ამის მიხედვით გეგმავს. წელს იმდენად დიდია ყურძენზე მოთხოვნა, რომ გამოჩნდა საწარმოები, რომლებიც "კაბერნეს" მიიღებენ. რაც შეეხება ფასს კონკრეტულად ვერ გეტყვით, იმიტომ, რომ თვითონ ეს ჯიში რამდენიმე სახისაა და სხვადასხვა ფასში ჩაიბარებენ,"- გვითხრა მან. მისივე განმარტებით, საწარმოები ჰიბრიდული ჯიშის ყურძენსაც მიიღებენ, რომლის ფასი სავარაუდოდ 43 თეთრი იქნება. ამ ჯიშების ყურძნის მიღება უკვე დაიწყეს შემდეგმა კომპანიებმა: წნორში "ტიბაანი 2000", გურჯაანში, კოტეხის ღვინის ქარხანა-"კომპანია მილადა", ჭანდარში-"დუგლაძეების ღვინის კომპანია". იმისთვის, რომ ფერმერს მოსავლის რეალიზაცია არ გაუჭირდეს, ტერიტორიული ორგანოს რწმუნებულს უნდა მიაკითხოს და საქმის კურსში ჩააყენოს. მარინა პეტრიაშვილი ამავე თემაზე: გურჯაანში “რთველი 2013″-ის საკოორდინაციო შტაბი გაიხსნა სახელმწიფო წელს ყურძენზე სუბსიდირებას აღარ აპირებს