„ამბასადორიალი 2016“ -ის ფარგლებში, საქართველოს ტექნოლოგიურ პარკში,ეკონომიკური დიპლომატიის საკითხებზე სამუშაო სესია გაიმართა.


საქართველოს სოფლის მეურნეობის მინისტრმა, ოთარ დანელიამ საზღვარგარეთ საქართველოს დიპლომატიური წარმომადგენლობების ხელმძღვანელებს, ბიზნესსექტორისა და ბიზნესასოციაციების წარმომადგენლებს აგრარულ დარგში განხორციელებული და მიმდინარე პროექტები, შიდა და საერთაშორისო ბაზრებზე მიღწეული შედეგები გააცნო. შეხვედრაზე ადგილობრივი წარმოების განვითარებისა და ხელშეწყობის, ასევე საექსპორტო პოტენციალის გამოყენების საკითხები განიხილეს.როგორც სიტყვით გამოსვლისას მინისტრმა აღნიშნა, სოფლის მეურნეობა დარგის ეფექტიანი განვითარებისთვის სისტემური ცვლილებები განხორციელდა. მინისტრმა ყურადღება გაამახვილა ღრმა და ყოვლისმომცველი სავაჭრო სივრცის შესახებ შეთანხმების (DCFTA) მნიშვნელობაზე და აღნიშნა, რომ ევროკავშირთან სავაჭრო ურთიერთობების მზარდი ტენდენცაა.

მინისტრმა აზიის ქვეყნებთან, მათ შორის ჩინეთთან, იაპონიასთან, კორეასთან სავაჭრო-ეკონომიკური კუთხით მიღწეულ შედეგებზეც ისაუბრა. „ქართული თხილის, კივის, ლურჯი მოცვის, მწვანილისა და სხვა მცენარეული წარმოშობის პროდუქტების ექსპორტი შეუფერხებლად ხორციელდება. აქტიური მუშაობა მიმდინარეობს სურსათის უვნებლობის სტანდარტების ევროკავშირის სტანდარტებთან დაახლოების მიმართულებით. უმნიშვნელოვანესია ის შედეგები,რაც ბაზრების დივერსიფიკაციის შედეგად მივიღეთ. საერთაშორისოსტანდარტების, ახალი რეგულაციების დანერგვით დარგი ეფექტიანადვითარდება“, - აღნიშნა ოთარ დანელიამ. აგრარული დარგის განვითარების მიმართულებით გაწეული სამუშაოს ანგარიშის შესახებ საუბრისას, ოთარ დანელიამ ხაზგასმით აღნიშნა, რომ შექმნილია 150 ახალი და გადაიარაღებულია 700-ზე მეტი საწარმო; სახელმწიფოს ხელშეწყობით გაშენდა 5 000 ჰექტარზე მეტი ახალი ბაღი, დაზღვეულია 200 მილიონ ლარზე მეტიღირებულების პროდუქცია.

სამუშაო სესიას საქართველოს 91 სრულუფლებიანი ელჩი, კერძო და საჯარო სექტორის წარმომადგენლები ესწრებოდნენ. "ამბასადორიალი 2016” 26 ივლისს გაიხსნა და 29 ივლისამდე გასტანს.