სსიპ სოფლის მეურნეობის სამეცნიერო-კვლევითი ცენტრის წარმომადგენლებმა GIZ-ის ექსპერტებთან სამუშაო შეხვედრა გამართეს. აღნიშნული შეხვედრა გერმანიის საერთაშორისო თანამშრომლობის ორგანიზაციის (GIZ) მიერ განხორციელდა პროექტით: „ბიომრავალფეროვნების მართვა სამხრეთ კავკასიაში“. ღონისძიება მიზნად ისახავდა, ფერმერებისთვის და მცენარეთა დაცვის საკითხებით დაინტერესებული პირებისთვის სემინარების დაგეგმვას. საუბრისას მხარეებმა იმ პრობლემებს და საჭიროებებს გაუსვეს ხაზი, რაც მცენარეთა დაცვის კუთხით არსებობს და მათი გადაჭრის შესაძლო გზებზეც ისაუბრეს. მხარეები შეჯერდნენ, რომ საჭიროა ფერმერების ცნობიერების ამაღლება მცენარეთა დაცვის საშუალებებზე და მათი გამოყენების ხერხებზე ისეთ კულტურებში, როგორებიცაა: ხორბალი, ქერი, სიმინდი, მზესუმზირა და სხვ. ფერმერებისთვის აგრეთვე მნიშვნელოვანია ინფორმაციისა და ცოდნის გაზიარება სარეველების წინააღმდეგ გასატარებელი ღონისძიებების შესახებ. დაგეგმილი სემინარები მოიაზრებს თეორიულ და პრაქტიკულ ნაწილს, რის შედეგადაც ადგილობრივ ფერმერებს საშუალება ექნებათ მიიღონ პრაქტიკული გამოცდილება ამ საკითხთან დაკავშირებით. აღსანიშნავია, რომ განვითარებად ქვეყნებში GIZ-ი ძირითადად საქმიანობს და ყურადღებას ამახვილებს ისეთ სფეროებზე, როგორებიცაა: სოფლის მეურნეობა, განათლება აგრარულ სფეროში, გარემოს დაცვა და სხვა.