არჩევნები 2015
"ჩემი ხმა ჩემი ნებაა და ვინც მინდა, იმის ნომერს შემოვხაზავ"
თამარ კაპანაძე
29 აგვისტოს პოლიტიკური კოალიცია `ქართული ოცნების~ წარმომადგენლები, ჩალაუბნის შინმოუსვლელთა პარკში ადგილობრივ მოსახლეობას შეხვდნენ. გუნდის წევრებმა ამომრჩევლებს თავიანთი პროგრამა გააცნეს, პრიორიტეტად კი ჯანდაცვა და სოფლის მეურნეობა გამოიკვეთა. "ბატონმა ბიძინამ მეცნიერებს დაგვიძახა და გვთხოვა, შექმენით ისეთი ჯანდაცვის პროგრამა, რომელიც თითოეულ მოქალაქეზე იქნება გათვლილი, ჩვენ დავარიგებთ სავალდებულო დაზღვევის საბაზისო პოლისებს, რომელიც შეეხება არამარტო 0-დან 5 წლამდე ასაკის ბავშვებსა და პენსიონერებს, არამედ ყველას. დაზღვევაში შევა პოლიკლინიკური მომსახურება, გადაუდებელი ოპერაცია, მშობიარობა. სიკვდილიანობამ გადააჭარბა შობადობას, ამიტომ შეიქმნება ხელშემწყობი პირობები, რათა ერი გამრავლდეს. დიდი ხანია, რაც გურჯაანში ჩამოვედი, სახლიდან რომ მოვდივარ, გზაზე ახლად გახსნილი კლინიკა მხვდება, მაგრამ იქ ხალხი არ ტრიალებს, რადგან მაღალი ფასების გამო და მოსახლეობა ამ მომსახურებით ვერ სარგებლობს," _ აღნიშნა `ქართული ოცნების~ წევრმა ქეთი შანიძემ.
სოფლის მეურნეობის შესახებ ისაუბრა `ქართული ოცნების~ წევრმა თამაზ ზალდანიამ. "მიწები დაუმუშავებელია, საწვავზე მაღალი ფასები ხელოვნურად არის შექმნილი, როდესაც სოფლის მეურნეობაში ერთ მილიარდს ჩავდებთ, ყველას ექნება საშუალება ისარგებლოს ამ თანხით და საჭიროებისამებრ გამოიყენოს. გლეხის შრომა იქნება დაფასებული, რადგან იარსებებს ფირმა, რომელიც გლეხის მოყვანილ მოსავალს შეისყიდის. ყველაფერი გონივრული დაგეგმარებით მოხდება. ასეა მთელს მსოფლიოში, რადგანაც სოფლის მეურნეობა ბუნებაზეა დამოკიდებული და ყველაზე დაუცველი სფეროა," _ აღნიშნა მან.
შინმოუსვლელთა პარკში შეკრებილი მოსახლეობა ამ პოლიტიკური პარტიის წინასაარჩევნო პროგრამით კმაყოფილი იყო. ზოგიერთი მიიჩნევდა, რომ არჩევნებში `ქართული ოცნების~ გამარჯვების შემთხვევაში, საქართველოში ბევრი რამ სასიკეთოდ შეიცვლება. "საჩხერეში გაზი და წყალი უფასოა, გზა ისეთია, თბილისსაც რომ შეშურდება. ეს ყველაფერი კი ბატონი ბიძინას დამსახურებაა. ჩემი შვილი საჩხერეშია გათხოვილი, საკეისრო კვეთა მისი დაფინანსებით გაუკეთდა. ჩემს შვილიშვილს ოპერაციებზე 70 000 ლარი დაახარჯა, დაზიანებული სახურავიც კი გადაუხურათ. მე მის მზეს ვფიცულობ. დუღს და ბრწყინავს საჩხერე. გურჯაანის სოფლები კი ჩამკვდარია და გაუბედურებული," _ გვითხრა ჩალაუბნელმა თამარ სულიაშვილმა.
შეხვედრის დროს შინმოუსვლელთა პარკთან ტერიტორიული ორგანოს რწმუნებული ვალერი ბარნაბიშვილი და `ნაციონალური პარტიის~ აქტივისტებიც იმყოფებოდნენ, რომლებიც შეკრებაზე მისულ ხალხს აკვირდებოდნენ. "როდესაც შეხვედრიდან სახლში ვბრუნდებოდი, ვალერი ბარნაბიშვილმა ირონიულად მკითხა: `რაო, იყავი კრებაზე?~ ეს ჩემი გადასაწყვეტია, სად წავალ და ვის მოვუსმენ. ბოლოს და ბოლოს, ჩემი ხმა ჩემი ნებაა და ვინც მინდა, იმის ნომერს შემოვხაზავ, მაგისი რა საქმეა?"_ გვითხრა მოქალაქემ, რომელმაც ვინაობა არ გაგვიმხილა.
`ქართული ოცნების~ წარმომადგენლებმა მოსახლეობასთან მორიგი შეხვედრა 30 აგვისტოს გურჯაანში გამართეს. მას პარტიის წარმომადგენელი თეიმურაზ ჯაში უძღვებოდა, რომელიც ადგილობრივებს თავიანთი პროგრამის შესახებ ესაუბრა და მხარდაჭერისკენ მოუწოდა. დასასრულს კი პარტიის აქტივისტებმა მოსახლეობას `ქართული ოცნების~ მაისურები დაურიგეს.
მასალის გამოყენების პირობები