მარინა პეტრიაშვილი, თამარ კაპანაძე

საყოველთაო აქცია `კარდაკარ~, 20 აპრილს დაიწყო და 10 ივნისამდე გასტანს. ამ პროგრამის ძირითადი მიზანი ამომრჩეველთა სიების გადამოწმება, საზღვარგარეთ მყოფი პირების და გარდაცვლილების აღრიცხვაა. საბოლოო შედეგს კომისია 1 აგვისტოს გამოაქვეყნებს.

20 აპრილიდან 11 100 რეგისტრატორმა, 2012 წლის საპარლამენტო არჩევნებისათვის საქართველოს მასშტაბით ამომრჩეველთა სიების დაზუსტება დაიწყო. ისინი ყველა ოლქსა და უბანს მოივლიან. ამომრჩეველთა ერთიანი სიის დაზუსტების სახელმწიფო კომისია პრეზიდენტის ბრძანებულების საფუძველზე 15 ნოემბერს შეიქმნა და 21 ადამიანისგან შედგება. აქედან: 7 `ნაციონალური მოძრაობის~ წარმომადგენელია, 7 _ ოპოზიციონერი და 7 _ არასამთავრობო ორგანიზაციის წევრი. ამომრჩეველთა სიების დაზუსტების უზრუნველყოფის კომისიის ბიუჯეტი 4 მილიონ 700 ათასი ლარით არის განსაზღვრული. მიუხედავად იმისა, რომ ეს აქცია საარჩევნო სიების დაზუსტებას ისახავს მიზნად, სოფელ მელაანის მოსახლეობის უმეტეს ნაწილს ცდომილებების აღმოფხვრის არ სჯერა. ისინი ჩვენთან საუბარში აღნიშნავენ, რომ ამ გზით პრობლემები ვერ მოგვარდება და სრულიად შესაძლებელი იქნება არჩევნების გაყალბება. ამის მიზეზად კი ისინი წინა წლების გამოცდილებას ასახელებენ. მათივე თქმით, ამ გზით არჩევნებთან დაკავშირებული პრობლემები მაინც ვერ მოგვარდება. "ამ აქციას აზრი არ აქვს, როგორც მთავრობას უნდა, ისე იქნება. ჩვენ ვინ გვკითხავს,"_ გვითხრა ადგილობრივმა მკვიდრმა შალვა ბეჟუაშვილმა. მის მსგავსად არჩევნების გაყალბებაზე საუბრობს სოსო თამაზაშვილიც: "როგორც პუტინმა გააყალბა არჩევნები, აქაც ისე მოხდება. რა მნიშვნელობა აქვს კარდაკარ სიარულს, როგორც ამათ აწყობთ ისე მოიქცევიან, მაინც გააყალბებენ," _ გვითხრა მან. საპირისპირო აზრის არის სოსო პატიაშვილი. მისი თქმით, ამ მონაცემების დაზუსტების შემდეგ მთავრობა არჩევნების გაყალბებას ვეღარ შეძლებს. "ყოველი არჩევნების დროს ხდებოდა გაყალბება. 2008 წელს, როდესაც გუბერნატორს ირჩევდნენ, კომისიის წევრი ვიყავი. ამ დროს 200 ბიულეტინი ჩაყარეს საარჩევნო ყუთში, რომელზეც ხუთიანი იყო შემოხაზული. წელს თუკი სწორად დადგინდება ამომრჩეველთა რაოდენობა და საარჩევნო სიები დაზუსტდება, მაშინ ეს ხელისუფლება ხმებს ვერ გააყალბებს," _ აღნიშნა `სპექტრთან~ საუბარში სოსო პატიაშვილმა. ქალაქ გურჯაანში მცხოვრები თამუნა ჯაჯანაშვილი ამ პროგრამის შესახებ ინფორმირებულია და ფიქრობს ეს აქცია მართლაც აუცილებელი იყო. "რამდენიმე დღის წინ ჩვენთან ქალბატონი იყო და აღრიცხვა გააკეთა, თუ რამდენი სული ვიყავით ოჯახში. ჩემი აზრით ეს მართლაც კარგი იდეაა. მახსოვს წინა წლებში მიცვალებულებიც იყვნენ სიებში, იმედია ახლა მაინც გამოსწორდება ეს ხარვეზი," _ გვითხრა მან. სამართლიანი არჩევნების კახეთის რეგიონული კოორდინატორი ნანა დევიძე ამბობს, რომ მათი ორგანიზაციის წევრები ამ კომისიაში არ არიან და მხოლოდ მონიტორინგს უწევენ. "სამართლიან არჩევნებს~ ამ კომისიაში წარმომადგენელი არ ჰყავს, რადგან ჩვენმა ორგანიზაციამ თავიდანვე დააფიქსირა პოზიცია, რომ ამომრჩეველთა ერთიანი სიის დაზუსტებაზე ერთი რომელიმე სახელმწიფო უწყება უნდა ყოფილიყო პასუხისმგებელი, თუნდაც სამოქალაქო რეესტრი. აქედან გამომდინარე ჩვენი ორგანიზაცია მხოლოდ მონიტორინგს უწევს. `სამართლიანი არჩევნების~ წევრები თავიდანვე არიან ჩართული სიის დაზუსტების კომისიის საქმიანობაში და ყველა საარჩევნო ოლქში უწევენ მონიტორინგს `კარდაკარის~ ფარგლებში განხორციელებულ საქმიანობას. ამ პროცესის შეფასება მხოლოდ მაშინ იქნება შესაძლებელი, როდესაც პროექტი დასრულდება. ამ ეტაპზე სხვა არაფრის თქმა არ შემიძლია. დაველოდოთ როგორი იქნება მონიტორინგის შედეგები," _ გვითხრა ნანა დევიძემ. საზოგადოებას კი მ