30 მაისის არჩევნების დასრულებიდან ერთი კვირის შემდეგ, #17-ე თელავის საოლქო საარჩევნო კომისიამ შემაჯამებელი ოქმი წარმოადგინა. როგორც მოსალოდნელი იყო, წინასწარი მონაცემები არ შეცვლილა: პირველ ადგილზე, ხმათა 71.90%-ით „ერთიანი ნაციონალური მოძრაობა“ გავიდა; 11.84%-ით მეორეზე_„ქრისტიან-დემოკრატიული მოძრაობა“, მესამე ადგილზე 5.20%-ით აღმოჩნდა „თოფაძე-მრეწველები“. დანარჩენი ოპოზიციური პარტიები შედგებით უკმაყოფილოები არიან. „ალიანსი საქართველოსთვის“ 14 საარჩევნო უბნის შედეგების გაუქმებას ითხოვს.მე-17 საოლქო კომისიაში, საერთო ჯამში, 10 საჩივარი შევიდა. მათგან კომისიამ მსჯელობის შემდეგ მხოლოდ _ 2, ისიც ნაწილობრივ დააკმაყოფილა. „ალიანსი საქართველოსთვის“ არჩევნების შედეგებს არ ცნობს და ამბობს, რომ ის საოლქო კომისიამ გააყალბა. გარდა ამისა, „ალიანსის“ თელავის მაჟორიტარი კანდიდატი ნიკა ვარდოშვილი კახეთის მხარეში პრეზიდენტის რწმუნებულს, გიორგი ღვინიაშვილს თელავის საოლქო კომისიის მიმართ ზეწოლაში ადანაშაულებს. „მინდა მივმართო ცენტრალური საარჩევნო კომისიის თავმჯომარეს, ბატონ ზურაბ ხარატიშვილს – დღეს #17 თელავის საარჩევნო ოლქი, ცენტრალურ საარჩევნო კომისიის ნაცვლად `ნაციონალური მოძრაობის~ კახეთის რეგიონალურ შტაბს და მის ხელმძღვანელს, კახეთის გუბერნატორს გიორგი ღვინიაშვილს ემორჩილება. მოვითხოვ, მიიღონ შესაბამისი ზომები და თელავის საარჩევნო ოლქი გიორგი ღვინიაშვილის ტყვეობიდან გაათავისუფლონ," _ აღნიშნა `სპექტრთან~ საუბარში ნიკა ვარდოშვილმა. მან არჩევნების შედეგებზეც ისაუბრა და აღნიშნა, რომ ეს იყო `უპრეცედენტო გაყალბება.~ "ზოგიერთი ადამიანი საუბრობს, რომ ეს მოხდა დახვეწილი მეთოდებით, მე კი გეტყვით, რომ გაყალბება ძალიან დაუხვეწავი და ყველასთვის ცხადი მეთოდებით მოხდა. წარმოგიდგენთ კონკრეტულ ფაქტებს. თელავის რაიონის სოფელ ყარაჯალის #54-ე და #37-ე უბნებზე გაყალბებულია ოქმი _ მასში გადაკეთებულია მონაცემები. ეს დიდი კანონდარღვევაა, ამაზე ჩვენ გვაქვს საჩივარი შეტანილი საოლქო კომისიაში, ვითხოვთ უბნების შედეგების ბათილად ცნობას, მაგრამ, როგორც ვატყობ, გადაწყვეტილება კანონის ჩარჩოებში ჩამჯდარი არ იქნება. ჩვენ არ ვითხოვთ კომისიების 2000 ლარით დაჯარიმებას, ეს საკმარისი არ არის. მოვითხოვთ შედეგების ბათილად ცნობას. 14 საარჩევნო უბანზე არ ბალანსდება მაჟორიტარული ოქმის შედეგები. ესენია: #1, #3, #15, #17, #20, #22, #31, #34, #38, #39, #44, #49, #51 და #52 უბნები. მოვითხოვთ ამ შედეგების გაუქმებას. ზემოთ ჩამოთვლილი მიზეზების გამო, ჩვენ არჩევნების შედეგებს უნდობლობას ვუცხადებთ და „ალიანსი საქართველოსთვის“ თელავის რაიონული ორგანიზაციის სახელით ღიად ვამბობ, რომ თელავის რაიონში არჩევნები გაყალბდა. სოფელ ყარაჯალაში პოლიტიკურმა პარტია „მრეწველებმა“ 564 ხმა აიღეს. ძალიან მაინტერესებს _ ყარაჯალაში რომ გამოვკითხოთ 100 ადამიანი, მათგან რამდენი დაგვისახელებს, ვინ არის „მრეწველთა პარტიის“ თავმჯდომარე ან საერთოდ, თუ გაუგიათ მათ შესახებ? ვაცხადებ, რომ „მრეწველთა პარტია“ გახლავთ „ნაციონალური მოძრაობის“ სატელიტი და მათ მიერ დაქირავებული მსახური. მოსახლეობა დამეთანხმება, ეს პარტია თუ არსებობდა თელავის რაიონში, საერთოდ არ ვიცოდით. გარდა ამისა, სოფელ გულგულაში თორთლაძის პარტიის (ყველამ კარგად იცის, თუ რა რეიტინგი აქვს მას) წევრი თელავის საკრებულოში მაჟორიტარი გახდა. აქ კომენტარიც კი ზედმეტია,
“ _ განაცხადა ნიკა ვარდოშვილმა.
#17-ე საარჩევნო ოლქის თავმჯდომარე დავით მკალავიშვილი ოპოზიციის ბრალდებებს არ იზიარებს, თუმცა კომისიამ 2 საჩივარი ნაწილობრივ დააკმაყოფილა: „პარტიებს საჩივრები არჩევნების დასრულებიდან ორი დღის ვადაში უნდა შემოეტანათ. „ალიანსმა“ კი ვადის დარღვევით წარმოადგინა. ამიტომაც მათ განხილვაზე უარი ვთქვით. რაც შეეხება საჩივრებს ყარაჯალის #37-ე და #54-ე უბნების შედეგების გაბათილების მოთხოვნაზე, საოლქო კომისიამ განიხილა. უბნებზე ოქმები მართლაც იყო გადასწორებული, თუმცა შესწორების ოქმები არ ახლდა, რის გამოც დაირღვა საარჩევნო კოდექსის 26-ე მუხლი. ამის შედეგად მივიღეთ გადაწყვეტილება, დაგვეჯარიმებინა ორივე უბნის კომისიის მდივნები 2000 ლარით,“ _ გვითხრა დავით მკალავიშვილმა. საოლქო კომისიაში კიდევ ერთი საჩივარი „ქრისტიან-დემოკრატებისგან“ შევიდა. თელავის მუნიციპალიტეტის სოფელ გულგულაში #16-ე საარჩევნო უბნის შედეგების გაბათილებას პარტიის მაჟორიტარობის კანდიდატი ირმა წულუკიძე ითხოვს. „საარჩევნო უბანზე პარტიის წარმომადგენლის სტატუსით ვიყავი. დილით რომ მივედი, პირველი ამომრჩეველი უკვე მისული დამხვდა, შესაბამისად, საკონტროლო ფურცელი ძირითად საარჩევნო ყუთში უკვე ჩაგდებული იყო. საღამოს 8 საათზე, როცა ხმების დათვლის პროცედურა დაიწყო, გადასატანი საარჩევნო ყუთის საკონტროლო ფურცელი ძირითადი საარჩევნო ყუთის საკონტროლო ფურცლის იდენტური არ აღმოჩნდა. საარჩევნო კოდექსის 52-ე მუხლის მე-10 ნაწილის მიხედვით, „საკონტროლო ფურცელზე აღინიშნება პირველი ამომრჩევლის გვარი, სახელი, რეგისტრაციის ადგილი და საქართველოს მოქალაქის პირადი ნომერი. საკონტროლო ფურცელი ივსება სამ ეგზემპლარად. კომისიის თავმჯდომარე ერთ ეგზემპლარს აგდებს ძირითად საარჩევნო ყუთში, მეორე ეგზემპლარს გადასატან საარჩევნო ყუთში, ხოლო მესამე ეგზემპლარს ინახავს საარჩევნო ყუთებში არსებულ საკონტროლო ფურცლებთან შემდგომი შედარების მიზნით.“ გულგულის საარჩევნო უბანზე ეს მუხლი დაირღვა, რადგან უბნის თავმჯდომარემ საკონტროლო ფურცელი ყუთში თვითონ არ ჩააგდო და გადასატანი ყუთის წამღებ კომისიის წევრებს გადასცა. მათ კი უბანზე მოსული პირველი ამომრჩევლის გვარის ადგილას იმ პირველი ავადმყოფის გვარი ჩაწერეს, რომელთანაც ყუთი მიიტანეს. უბანზე პირველი ამომრჩეველი „კენკიშვილი“ იყო, გადასატანი ყუთის საკონტროლო ფურცელზე კი „მრელაშვილი“ ეწერა. თანაც საკონტროლო ფურცელი სპეციალური ქაღალდია, რომლის პირველ გვერდზე დაწერილი სიტყვები მეორე და მესამეზე ავტომატურად გადადის. გადასატანი ყუთის საკონტროლო ფურცელი კი კალმით იყო შევსებული. საარჩევნო კოდექსი დაარღვიეს როგორც თავმჯდომარემ, ისე გადასატანი ყუთის წამღებმა კომისიის წევრებმა. ხმების დათვლის წინ მოვითხოვე გადასატანი ყუთი არ გაეხსნათ. თუმცა საუბნო კომისიის თავმჯდომარემ მაინც გახსნა და მისი ბიულეტენები ძირითადი ყუთის ბიულეტენებს შეურია. ამის შემდეგ საჩივარი დავწერე, მაგრამ თავმჯდომარემ არ მიიღო და განაცხადა, რომ ყველანაირ პასუხისმგებლობას თავის თავზე იღებდა. მეორე დღეს საჩივარი საოლქო კომისიას წარვუდგინე. მოვითხოვ გულგულის #16-ე საარჩევნო უბნის შედეგების ბათილად ცნობას,“ _ განუცხადა „სპექტრს“ „ქრისტიან-დემოკრატების“ გულგულის მაჟორიტარმა კანდიდატმა ირმა წულუკიძემ.
წულიკიძის საჩივარი საოლქო კომისიის თავმჯდომარეს არც კი განუხილავს, რადგან, მისი განცხადებით, საჩივრის შემოტანის ვადები დაირღვა. „ირმა წულუკიძემ საოლქო კომისიაში საჩივარი 31 მაისს შემოიტანა. საარჩევნო კოდექსის 64-ე მუხლში განმარტებულია: „განცხადება/საჩივარი ხმის დათვლისა და კენჭისყრის შედეგების შეჯამების პროცედურების დროს ჩადენილი დარღვევების შესახებ და კენჭისყრის შედეგების გადასინჯვის ან ბათილად ცნობის მოთხოვნით შედგენილი უნდა იქნეს საარჩევნო ყუთის გახსნიდან კენჭისყრის შედეგების შემაჯამებელი ოქმის შედგენამდე.“ თუ უბანზე კომისიამ უარი განაცხადა საჩივრის მიღებაზე, მაშინ წულუკიძეს ამავე ვადაში ჩვენთან უნდა შემოეტანა საჩივარი. ანუ, უკეთ რომ განვმარტოთ, საღამოს 8 საათიდან ოქმის შედგენამდე უნდა ემოქმედა, მან კი საჩივარი მეორე დღეს წარმოადგინა,“ _ აღნიშნა დავით მკალავიშვილმა.
ოპოზიციური პარტიების თელავის რაიონული ორგანიზაციები არჩევნების შედეგებს არ ცნობენ, თუმცა მათ პროტესტს და საჩივრებს ერთადერთი შედეგი მოჰყვა, ორი უბნის საარჩევნო კომისიის მდივნების დაჯარიმებაა. ამასობაში კი საოლქო კომისიამ თელავის საკრებულოში მანდატები გადაანაწილა „ნაციონალურმა მოძრაობამ“ რვა მანდატი მიიღო, ერთი „ქრისტიან-დემოკრატებს,“ ერთი კი „თოფაძე-მრეწველებს“ ერგო. საქართველოს მასშტაბით კენჭისყრის შედეგები მხოლოდ 5 უბანში მცხეთის 24-ე, ლაგოდეხის 21-ე, მესტიის მე-13, საგარეჯოს 46-ე და 47-ე უბნებზე გაუქმდა.
მარიამ ხანჯალიაშვილი |
მასალის გამოყენების პირობები