უზუსტობები ერთიან საარჩევნო სიაში ყოველი არჩევნების წინ აქტუალურია. ქალაქ გურჯაანის ნომერ პირველი საუბნო- საარჩევნო კომისიის თავმჯდომარის, გივი ქიტოშვილის თქმით, რამდენიმე სახის ხარვეზი მათ უბანზეც დაფიქსირდა.


„პირველად სიებში სამი ადამიანი იყო გამორჩენილი. დაწერეს განცხადება და საოლქოს გადავაწოდეთ, რომ 8 ოქტომბრისთვის დაზუსტებულ სიებში შეიყვანონ. ასევე აღმოჩნდა სამი გარდაცვლილი, ალბათ, მათი მონაცემების შესწორება საჯარო რეესტრმა ვერ მოასწრო. უბანზე 40- დან 50 -მდე საზღვარგარეთ მყოფი ამომრჩეველიც ფიქსირდება. მათი დაზუსტების და მონაცემების მიწოდების ვადა 5 ოქტომბრამდე გვაქვს. ბოლო ორი დღის განმავლობაში, თუ ვინმე შემოვა და დაწერს განცხადებას, მივაწვდით საოლქოს და სიაში შეიტანენ.“-აღნიშნა მან.
მისივე თქმით, სიაში აღმოჩნდნენ ისეთი პიროვნებებიც, რომლებიც უკვე წლებია, მოცემულ მისამართზე აღარ ცხოვრობენ.
„პირადობების მოწმობის აღების უფასო აქცია რომ იყო, ბევრმა შეიცვალა მისამართი და სხვაგან ჩაეწერა. არის კიდევ ისეთი შემთხვევები, როდესაც ბინა დიდი ხნის გაყიდულია, მაგრამ მფლობელები ძველ მისამართზე წერიან. ასეთი შემთხვევები, განსაკუთრებით, კორპუსებში გვხვდება. ჩვენ მათ ავუხსენით, მისულიყვნენ საჯარო რეესტრში, დაეწერათ განცხადება და ყოფილ მეპატრონეს შეუჩერდებოდა რეგისტრაცია. ასეთი ორი შემთხვევა გვქონდა.“
გივი ქიტოშვილის განცხადებით, საარჩევნო ბარათი ყველასთან მიიტანეს, თუმცა ხარვეზების აღმოსაფხვრელად თვითონ ამომრჩეველი არ აქტიურობს.


„საერთაშორისო გამჭვირვალობა საქართველოს“ საარჩევნო პროგრამის მენეჯერის, ლევან ნატროშვილის განმარტებით, ამომრჩეველთა სიებში უზუსტობები მართლაც აღინიშნება, თუმცა წინა წლებთან შედარებით, ნაკლებია.
„ უზუსტობების მიზეზი შეიძლება ბევრი რამ იყოს. როდესაც ადამიანები საცხოვრებელს იცვლიან, ახალ მისამართზე არ რეგისტრირდებიან, შესაბამისად, ბაზებში ძველი მონაცემები რჩება. ასევე ვიცით, რომ საარჩევნო უბნების ახალი გადანაწილება მოხდა. ადამიანები, რომლებიც ადრე სხვა უბანზე აძლევდნენ ხმას, ახლა სხვაგან ფიქსირდებიან. ზოგადად, ჩვენ არ ვთვლით, რომ ეს სერიოზული პრობლემაა. თუ ტენდენციას შევხედავთ, დავინახავთ, რომ საგრძნობლად შემცირდა ისეთი შემთხვევები, როდესაც წლიდან წლამდე ადამიანი თავის თავს საარჩევნო სიაში ვერ ნახულობდა. თუ პიროვნება სიაში არ აღმოჩნდება, თვითონ კომისიის წევრები არიან ვალდებულები, გადაამისამართონ სხვა უბანზე და გარკვეული კონსულტაციებიც გაუწიონ. მთავარია, ასეთი შემთხვევა ბევრი არ იყოს და არჩევნების მიმართ სანდოობა არ შემცირდეს.“-განმარტა მან.

მსგავსი პრობლემა აღმოჩნდა, გურჯაანის ნომერ მეხუთე საარჩევნო უბანზე. კომისიის თავმჯდომარის, ნაირა მეფარიძის თქმით, ბარათების დარიგების დროს, ისეთი მოქალაქეები აღმოჩნდნენ, რომლებიც წლებია აღნიშნულ მისამართზე აღარ ცხოვრობენ.
„ჯაჯანაშვილი მაყვალა, ჟორჟოლაძე თემური, გელაშვილი ლევანი, გორხელაშვილი მაყვალა, ყალაბეგაშვილი გოჩა, წლებია აქ აღარ ცხოვრობენ. იყო კიდევ რამდენიმე ადამიანი, რომლებსაც მეზობლები საერთოდ ვერ იცნობენ. მაგალითად, აბესაძე მაყვალა, რომელმაც რამდენიმე წლის წინ ბინა გაყიდა, თვითონ კალაურში ცხოვრობს, მაგრამ აქ არის ჩაწერილი. ასევე გურჯაანის სპეც. სკოლა- ინტერნატის 14 მოსწავლე: ფიფია, ფუტულოვი და ა.შ. რეგისტრირებული არიან ამ უბანზე. ისინი სხვადასხვა სოფლიდან იყვნენ, ქალაქ გურჯაანთან არანაირი შეხება არ აქვთ. მათი მონაცემები წინა არჩევნებზეც გადავაწოდეთ საოლქოს, მაგრამ ისევ ფიქსირდებიან ამომრჩევლებად.“

„საერთაშორისო გამჭვირვალობა საქართველოს“ წარმომადგენლის, ლევან ნატროშვილის თქმით, უზუსტობების შემთხვევაში, საუბნო საარჩევნო კომისიამ ინფორმაცია ცენტრალურ საარჩევნო კომისიას უნდა მიაწოდოს.
„როგორც თქვენ ამბობთ, ერთ-ერთ სარჩევნო უბანზე 14 ბავშვია რეგისტრირებული, სინამდვილეში კი, იქ საერთოდ არ ცხოვრობენ. ამ შემთხვევაში, ინფორმაცია უნდა მიეწოდოს საარჩევნო ადმინისტრაციას, რის შემდეგაც, სიები განახლდება. ჩვენ გვქონდა იდეა, რომ სიები ბიომეტრიული ყოფილიყო. ბოლო არჩევნებზე, ფოტოსურათი დაამატეს, მაგრამ რეალურად, ეს არ არის ბიომეტრიული სია. ამისთვის მხოლოდ ფოტოსურათის დამატება საკმარისი არ არის. სასურველია, სხვა მონაცემებიც იყოს. მაგალითად, თითის ანაბეჭდი ან სხვა რამ. მთავარი პრობლემა ე.წ. „კარუსელია“, რომელიც საარჩევნო უბნებთან ხდებოდა. სიაში რომ მიცვალებული აღმოჩნდა, დიდ პრობლემას არ ქმნის, ის ხომ მაინც ვერ მივა არჩევნებზე და რეალურად გაყალბებაც არ მოხდება.“-აღნიშნა მან.

მარინა ბეროშვილი