იორმუღანლოს თემში სასოფლო-სამეურნეო ბარათების განაღდება მიმდინარეობს. მოსახლეობა ბარათების სანაცვლოდ სურვილისამებრ უკვე იღებს სამეურნეო ინვენტარს. -"ბარათი მოვიტანე და მის ნაცვლად 180-ლარიანი "დრუჟბა" მომცეს. დიდი მადლობა ამისთვის. სხვა დროს არასოდეს დაგვხმარებიან ასე. მოდის ხალხი _ ზოგს ბარი უნდა, ზოგს ჩექმა. მოაქვთ ბარათები და მათთვის სასურველ ნივთებს აძლევენ," _ გვითხრა მუღანლოელმა მამედ ჯივიროვმა. ჯაფარ ჯაფაროვი კი შხამქიმიკატების შეძენას აპირებს. -"60 წლის კაცი ვარ, დღემდე მთავრობის მხრიდან მსგავსი პატივისცემა არ მახსოვს. აი, ახლა პირველად ვნახე ასეთი რამ. მოგვაქვს ხალხს ბარათები და სასოფლო-სამეურნეო ინვენტარს, რასაც მოვითხოვთ, გვაძლევენ. მაგალითად, მე შხამქიმიკატები მინდა ავიღო. ხეხილის ბაღი მაქვს და იმისთვის მჭირდება. წავალ საგარეჯოში, მაღაზიაში და იქ მომცემენ," _ ამბობს ჯაფარ ჯაფაროვი. ეს ადამიანები სოფლის ცენტრში ჩავწერეთ. ე.წ. "ბირჟაზე" "ფორდის" ტიპის ავტომობილი იდგა, საიდანაც პასუხისმგებელი პირები გლეხებს, მათთვის სასურველ ინვენტარს ურიგებდნენ. "ინვენტარი ყველა ფერმერისთვის არ მიგვიტანია. მაღაზიაში საქონელი შემოსატანი გვქონდა და იმიტომ. როგორც ჩემი კომპანიის ხელმძღვანელობამ მითხრა, დამატებით კიდევ მომაწვდიან და ამ სოფლებში სასოფლო-სამეურნეო ინვენტარს კვლავ დავარიგებთ." _ განაცხადა "სპექტრთან" კომენტარში შპს "ბორან სოფქიმიას" ხელმძღვანელმა ფრიდონ დიღმელაშვილმა. თუმცა სოფლის ცენტში შეკრებილებს შორის იყვნენ ისეთებიც, რომლებსაც სასოფლო-სამეურნეო ბარათები ჯერ არ მიუღიათ. -"ჯერჯერობით ბარათი არ მაქვს. ველოდებით, მაგრამ როდემდე და სადამდე. სამუშაოების ჩატარება უკვე გვიანდება. ბარათები ნახევარმა სოფელმა მიიღო, ნახევარმა _ არა," _ გულისწყრომით ამბობს უმუდ გულიევი. მის ნათქვამს იქვე მდგომი ელმან გუსეინოვიც დაეთანხმა. -"ბარათები ჯერ ნახევარ სოფლესაც კი არ აუღია, დანარჩენებს როდის უნდა მოგვცენ?" _კითხულობს ის. -"კი გვპირდებიან, რომ თქვენც მალე დაგირიგებთო, მაგრამ ეს მალე როდის დადგება, არ ვიცით," _ გვითხრა დურსუნ გუსეინოვმა. ის ნაწილი კი, ვინც ბარათები უკვე მიიღო, ამბობს, რომ სოფელში ტექნიკაცაა შემოტანილი. -"დიდი მადლობა მთავრობას. უკვე ტრაქტორებიც შემოიტანეს და ნაკვეთებსაც ხნავენ." ერთ-ერთ უბანში "სპექტრმა" მომუშავე ტრაქტორიც შეამჩნია, რომელსაც ნაკვეთის ნაწილი დამუშავებული ჰქონდა. -"ყველაფერს უფასოდ აკეთებენ, არც საწვავში გადამიხდია ფული, არც ამ მექანიზატორს უნდა გადავუხადო. გასულ წლებში ეს ყველაფერი ფინანსებთან იყო დაკავშირებული," _ აღნიშნა ბაქირ ყუბანოვმა. როგორც საგარეჯოს მუნიციპლაიტეტის გამგებელმა გიორგი ლოლაძემ განმარტა, დახმარების გარეშე არავინ დარჩება. მათ, ვისაც სასოფლო-სამეურნეო ბარათები ჯერ არ აუღია, უახლოეს მომავალში მიიღებს, რადგან სიები ეტაპობრივად იგზავნება. ლანა გულოშვილი