სასოფლო-სამეურნეო ბარათების გაცემა საქართველოს მასშტაბით უკვე მიმდინარეობს. იორმუღანლოელების უმრავლესობა ამბობს, რომ მათი ნომერ პირველი, მოუგვარებელი საკითხი კვლავ გასხვისებული მიწებია. ამიტომ ვერც ბარათების საჭიროებას ხედავენ. თუმცა ისინი, რომლებსაც მცირე ნაკვეთი შემორჩათ, იმედოვნებენ, რომ აღნიშნულ ბარათებს უახლოეს მომავალში მიიღებენ. დურსუნ მამადხალილოვს ქერი უკვე დათესილი აქვს. სურს, რომ, სამინისტრო სასუქებით დაეხმაროს. -"ნაკვეთი მოვხანი და ქერი დავთესე კიდეც. ამიტომ მინდა სასუქი მომცენ, რომ კარგი მოსავალი ავიღო. ამბობენ, ბარათებს მოიტანენ და საბჭოში დარიგდებაო, ჩვენც ველოდებით და იმედია მალე იქნება." ნაკვეთი დასათესად მზად აქვს ფახრათ კურიევსაც. ისიც მიიჩნევს, რომ გლეხს დახმარების გაწევა აუცილებლად სჭირდება. -"მიწა მოვხანი, მალე სიმინდი უნდა დავთესო. ბარათების დარიგების შესახებმეც გავიგე, მეტი არაფერი ვიცი. კარგი იქნება, ასეთ დახმარებას თუ ნამდვილად გაგვიწვენ." _ გვითხრა მან. საგარეჯოს მუნიციპალიტეტის გამგეობაში განგვიცხადეს, რომ პირველ ეტაპზე მოსახლეობას კომბინირებული სასოფლო-სამეურნეო ბარათი უკვე დაურიგდა. -"მუნიციპალიტეტის მასშტაბით კომბინირებული ბარათები უკვე დავარიგეთ, მათ შორის იორმუღანლოს სოფლებშიც. ეს ბარათები გაიცა იმ ფერმერებზე ვისაც 0,25-დან, 1,25-მდე ფართობის მიწა აქვს. დანარჩენები, რომლებიც 1,25-დან 5 ჰექტრამდე ფართობს ფლობს, ბარათებს მარტის თვეში მიიღებენ. ეს პროცესი ეტაპობრივად მიმდინარეობს. ამის შემდეგ დაიწყება ნომინალური ბარათების გაცემაც, თუმცა ჯერ ზუსტად არ ვიცი როდიდან. იმ ოჯახებმა, ვისთანაც დაკავშირება ვერ მოხერხდა, ზოგი აზერბაიჯანშია გადასული და ა.შ, სურვილის შემთხვევაში, სოფლის ტერიტორიულ ორგანოებს მიაკითხონ," _ გვითხრა საგარეჯოს მუნიციპალიტეტის გამგეობის სოფლის მეურნეობის სამსახურის უფროსმა მიხეილ კერატიშვილმა. თუკი ფერმერს, ნიადაგი უკვე დამუშავებული აქვს და კომბინირებული ბარათი აღარ ესაჭიროება, სოფლის ტერიტორიულ ორგანოს აცნობებს. ეს ფაქტი ოფიციალურად დამოწმდება და აღნიშნული ბარათის ოდენობაც ნომინალურ ბარათზე დაირიცხება, რომლითაც ფერმერი სასუქებს და შხამქიმიკატებს მიიღებს.