რამდენიმე დღის წინ გაზეთ "საპექტრს" იორმუღანლოს თემის სოფელ მუღანლოს მცხოვრები ნაბი ფინათოვი დაუკავშირდა და დახმარება სთხოვა. როგორც მან ჩვენთან სატელეფონო საუბარში აღნიშნა, ამნისტიის შემდეგ სოფელში კრიმინოგენული სიტუაცია გამწვავდა, თუმცა, მათი ბედით არავინ ინტერესდება და ყურადღებასაც არავინ აქცევთ. ამის შემდეგ "სპექტრი" იურმუღანლოს თემს ესტუმრა და პრობლემები ადგილობრივი მოსახლეობისგან პირადად მოისმინა.

"ამნისტიის შედეგად, ბევრი ხალხი გამოუშვეს და დანაშაულიც გახშირდა. ღამით სახლებში შედიან და ხალხს ძარცვავენ. ფორმით არიან და იძახიან მილიციიდან ვართო. შედიან ოჯახებში და ხალხს აშინებენ, ფულს და ოქროულობას ართმევენ. ადრე ასე არ იყო და არც არაფრის გვეშინოდა. ეხლა ისევ თავისუფლად ყაჩაღობენ," _ გვითხრა ნაბი ფინათოვმა. მას არ ეთანხმება ამავე სოფელში მცხოვრები შირდათ ხუბანოვი და საპირისპირო მოსაზრებას აფიქსირებს. "არაფერი ამდაგვარი არ გამიგია, ასეთი რამ პირველად მესმის. ჩემი შვილებიც ამნისტიით გამოუშვეს. ციხეში ზოგი მართლა დამნაშავე ზის, ზოგი კი არა. ალბათ ისეთებიც გამოვლენ, ვინც ყაჩაღობას, ძარცვას და ათას დანაშაულს კიდევ ჩაიდენს. წინასწარ ვერავინ ვერაფერს განსაზღვრავს, მაგრამ ჩვენთან ჯერჯერობით ასეთი რამ არ მომხდარა," _ გვითხრა მან.

როგორც ჩვენთან საუბარში საგარეჯოს მუნიციპალიტეტის გამგებელმა გიორგი ლოლაძემ აღნიშნა, პოლიციის უფროსთან ამ საკითხზე ყოველდღიურად აქვს საუბარი, მაგრამ მსგავსი ფაქტების შესახებ პირველად ესმის. "არანაირი ინფორმაცია თავდასხმების და ძარცვის შესახებ არ მიმიღია. პოლიციის უფროსთან ყოველდღე ვსაუბრობ და როგორც ვიცი, მსგავსი ფაქტები არ ყოფილა."

ამ საკითხთან დაკავშირებით საგარეჯოს პოლიციის უფროსს დავით ჭიაბერაშვილს დავუკავშირდით. როგორც მან სატელეფონო საუბარში აღნიშნა, მსგავსი შემთხვევები ბოლო რამდენიმე თვის განმავლობაში არ დაფიქსირებულა. "ეს ცრუ ინფორმაციაა. სიტუაცია იორმუღანლოს თემის სოფლებში იგივეა, რაც რამდენიმე თვის წინ იყო. არანაირი ძარცვის და ყაჩაღობის ფაქტს ადგილი არ ჰქონია. თუ არ ჩავთვლით რამდენიმე წვრილმან ქურდობას, ამ სოფლებში კრიმინოგენური სიტუაცია სტაბილურია," _ გვითხრა მან.