13 დეკემბერს იორმუღანლოს თემის მოსახლეობას საგარეჯოს მუნიციპალიტეტის გამგებელი გიორგი ლოლაძე სტუმრობდა. შეხვედრაზე მან მოსახლეობასთან ერთად რამდენიმე სოფლის ახალი რწმუნებული წარადგინა. ამის შესახებ "სპექტრი ეთნიკური უმცირესობებისთვის" #3-ში წერდა. მაშინ, სოფლების ადმინისტრაციული შენობის ეზოში შეკრებილი მოსახლეობის უმრავლესობა გადაწყვეთილებით კმაყოფილი ჩანდა და არც დასახელებული კანდიდატურების შესახებ გამოუთქვამთ საპროტესტო განცხადება. შეკრებაზე გაირკვა, რომ სოფელ ლამბალოს _ მუბარიზ მამედოვი, დუზაგრამას _ ქამილ გასაევი, მუღანლოს კი ნათიკ რასულოვი უხელმძღვანელებენ.

როგორც თავადვე ამბობდნენ, სამივე კოალიცია `ქართული ოცნების~ აქტიური მხარდამჭერია. თითოეული მათგანი შეხვედრაზე მუნიციპალიტეტის გამგებლის თანდასწრებით მოსახლეობას პრობლემების მოგვარებას დაჰპირდა. იორმუღანლოში `სპექტრის~ ბოლო ვიზიტისას კი, მოსახლეობის ნაწილი სოფელ მუღანლოს რწმუნებულის გამოუცდელობასა და არაკომპეტენტურობაზე ალაპარაკდა. "სოფელში ახალი რწმუნებული გვყავს, ნათიკა. კითხეთ ერთი ვინ არის საერთოდ. აქამდე ჩვეულებრივი მწყემსი იყო. არც სკოლა აქვს დამთავრებული და არც უმაღლესი. აქ დავიბადეთ და გავიზარდეთ, ყველამ კარგად ვიცით ვინ ვინ არის. წინასაარჩევნოდ "ქართული ოცნების~ მხარდამჭერი იყო და ახლა რწმუნებულად იმიტომ გაუშვეს." _ ამბობს ილგარ გაჯიევი.

მსგავსი მოსაზრება აქვს ნავაიდ გულიევსაც. "რაღაცას რომ ვეუბნებით, ამბობს, არასწორია, მასე არ არისო. ხალხს არ უსმენს. არ გვინდა, რომ ეგ იყოს გამგებელი."</strong>

"სპექტრი" აღნიშნულის შესახებ თავად ნათიკ რასულოვთან დაკავშირებას შეეცადა. ჩვენი სტუმრობისას ტერიტორიული ორგანოს შენობაში მუღანლოს რწმუნებული არ დაგვხვდა. სატელეფონო კომენტარში კი მან აღნიშნული ბრალდებები უარყო. "კარგი იქნებოდა აქ მოსულიყავით და პირადად გაგსაუბრებოდით. ასე რთულია. თუმცა შემიძლია გითხრათ, რომ რასაც ეგენი ამბობენ, სიმართლე არ არის. ჯერ ორი თვეა რაც რწმუნებული ვარ და ჩემს სოფელზე ზრუნვა უკვე დავიწყე. ეხლა რამდენიმე დღეში გზების მოხრეშვას შევუდგებით. მობრძანდით ჩვენთან სოფელში და გაჩვენებთ რამდენი ადამიანი მიჭერს მხარს." _ ამბობს ნათიკ რასულოვი. აქვე განვმარტავთ, რომ მოსახლეობის ნაწილის აზრით, ნათიკ რასულოვი მუღანლოს მართვას თავს კარგად გაართმევს. მათი თქმით, ის ჯერ ახალი კადრია და სიტუაციაში უკეთ გარკვევის მიზნით დრო სჭირდება.