იორმუღანლოს თემის მოსახლეობა იმ პრობლემებზე საუბრობს, რაც შინაური ცხოველებისა და პირუტყვის სამედიცინო მომსახურებას შეეხება. მათი თქმით, სოფელში საქონელი ცუდად რომ გახდეს, არ არსებობს სამედიცინო პუნქტი, სადაც დახმარებას აღმოუჩენენ. "სოფელში არც ვეტერინარია და არც სამედიცინო პუნქტი. თუ საქონელი ცუდად გახდა, არ ვიცით სად წავიყვანოთ. სოფელში რამდენიმე ხნიერი ადამიანია, რომელმაც მკურნალობა იცის და ისინი გვეხმარებიან ხოლმე. რაც შეეხება აცრებს, რაიონიდან მოდიან წარმომადგენლები და პირუტყვს ისინი ცრიან," _ გვითხრა დუზაგრამის მკვიდრმა თახირ ისაბალიევმა.

სოფელ ლამბალოში მცხოვრები იმრან მამედოვის თქმით, საქონელი თუ ცუდად გახდა, ხშირ შემთხვევაში კვდება. "ვეტექიმი არ გვყავს. ერთი ადამიანია, რომელმაც ასეთი რაღაცეები იცის და ისიც ძალიან მოხუცია იმისთვის, რომ ნემსი გააკეთოს. საქონელი თუ ცუდად გახდა, კვდება, რადგან დროულად ვერ ვმკურნალობთ. ეს ჩვენთვის ძალიან დიდი პრობლემაა," _ გვითხრა მან.

დუნიამ ალიევბახათის თქმით, მართალია სოფელში ვეტპუნქტი არ არის, მაგრამ არიან კერძო ვეტერინარები. "სოფელში კერძო ვეტერინარი გვყავს. თუ პირუტყვი ცუდად გახდა, მასთან სახლში მივდივართ და მოგვყავს. ისე საგარეჯოდანაც მოდიან ხოლმე და საქონელს ცრიან." _ გვითხრა მან. იორმუღანლოს თემის სოფლებში ვეტპუნქტები რომ არ არსებობს, ამას კახეთის რეგიონალური სამმართველოს ვეტერინარ-სპეციალისტი ჯიმშერ ოსიაშვილიც ადასტურებს. "იორმუღანლოს თემის სოფლებში პუნქტები არ არის, მაგრამ არიან კერძო ვეტერინარები. საჭიროების შემთხვევაში მოსახლეობას შეუძლია მიაკითხონ და ისინი გაუწევენ სათანადო მომსახურებას. რაც შეეხება საქონლის ვაქცინაციას, ორი თვის წინ ეროვნულმა სააგენტომ მასიური აცრები ჩაატარა თურქულზე, ასე რომ ამ მხრივ პრობლემა მოხსნილია." ჯიმშერ ოსიაშვილის თქმითვე, თუ სოფელში რომელიმე დაავადების გავრცელების საშიშროება დაფიქსირდა, საქონელს ვაქცინაცია ყოველთვის უფასოდ უტარდება.