მარინა ბეროშვილი

საგარეჯოს მუნიციპალიტეტის იორმუღანლოს თემის მოსახლეობას უკვე დიდი ხანია ამბულატორიის პრობლემა აწუხებს. მათი თქმით, ერთი თანამედროვე პოლიკლინიკა ამ მრავალრიცხოვანი დასახლებისთვის აუცილებელია. როგორც სოფელ მუღანლოს მცხოვრები ირზა მუსტაფაევი ამბობს, არის შემთხვევები, როდესაც ავადმყოფი, საგარეჯოში მიყვანამდე, გზაში კვდება. `ჩვენთან სოფელში ამბულატორია არ გვაქვს. მეზობელ სოფელშია, მაგრამ ისიც ოთხ საათამდე მუშაობს. ჩვენს თემში 7 სოფელი შედის და ამდენი ხალხი ცხოვრობს, ამიტომ მოსახლეობას უნდა, რომ ერთი პოლიკლინიკა აქაც გააკეთონ. საგარეჯომდე შორია. იყო შემთხვევა, როდესაც ავადმყოფი ვიდრე იქამდე ჩავიყვანეთ, გზაში მოკვდა," _ გვითხრა მან.

მსგავს აზრს გამოხატავს სოფელ დუზაგრამაში მცხოვრები რაშიდ ხალილოვიც. `ამბულატორია არ გვაქვს. ლამბალოში კვირაში ორჯერ მოდიან ექიმები, მაგრამ მაშინაც ისეთი რიგია, რომ ან მოგიწევს შესვლა, ან _ არა. იქნებ როგორმე ერთი პოლიკლინიკა გაგვიხსნან, რომ ყოველდღიურად მოვიდეს ექიმი და ხალხის გასინჯვა შეძლოს. ჩვენც ამხელა მანძილზე აღარ მოგვიწევს საგარეჯოში სიარული,~ _ გვითხრა მან. როგორც საგარეჯოს მუნიციპალიტეტის გამგებელმე გიორგი ლოლაძემ ჩვენთან საუბარში აღნიშნა, აზერბაიჯანულ სოფლებში, მარტო პოლიკლინიკა კი არა სხვაც ბევრი პრობლემაა. `მოკლე დროში ჩვენ შევხვდებით მოსახლეობას, გავეცნობით მათ პრობლემებს და სამედიცინო მომსახურების პრობლემას აუცილებლად მოვუგვარებთ,~- გვითხრა მან.

საქართველოს შრომის, ჯანმრთელობისა და სოციალური დაცვის მინისტრის მოადგილე მარიამ ჯაშმა კი განმარტა: „სოფლის ექიმის სახელმწიფო პროგრამის ფარგლებში იორმუღანლოს თემს 4 ექიმი და 4 ექთანი ემსახურება. 7 დასახლებული პუნქტიდან 5 პუნქტის (დუზაგრამა, პალდო, წიწმატიანი, ზემო ლამბალო და ქვემო ლამბალო) მომსახურებას ადგილობრივი კადრი ახორციელებს, შესაბამისად, ისინი მუდმივად ადგილზე იმყოფებიან. უშუალოდ იორმუღანლოს დასახლებულ პუნქტს (იორმუღანლო და ქეშალო) კი ადგილობრივი კადრის არარსებობის გამო საგარეჯოში მცხოვრები 2 ექიმი და 2 ექთანი ემსახურება. დღეს სამინისტრო დაუკავშირდა „ჯეოჰოსპიტალს~, ოპერატორ კომპანიას, რომელიც იორმუღანლოში ახორციელებს სოფლის ექიმის პროგრამას. „ჯეოჰოსპიტალსის~ ინფორმაციით, იორმუღანლოს თემს ამბულატორიულ მომსახურებაში შეფერხება არ აქვს, თუმცა ამ საკითხზე დღევანდელი სატელეფონო საუბრისას დამატებითი კონტროლი ითავა ოპერატორმა კომპანიამ. ზოგადად, მრავალპროფილური დაწესებულებების გახსნა მცირედ დასახლებულ პუნქტებში არ არის მიზანშეწონილი, მითუმეტეს, თუ გავითვალისწინებთ, რომ იორმუღანლოს შემთხვევაში მოსახლეობა დიდი სეზონური მიგრაციით ხასიათდება. იორმუღანლოს მოსახლეობას საგარეჯოს მრავალპროფილური კლინიკა ემსახურება და 30 კმ დაშორებული პუნქტებისთვის სტაციონარული მომსახურების გეოგრაფიული ხელმისაწვდომობის პრობლემა არ უნდა არსებობდეს. თქვენს მიერ დასმულ შეკითხვაში უფრო რაიონის სასწრაფო სამედიცინო მომსახურების ოპერტიულობა იქცევს ყურადღებას, რაზეც სამინისტრო დამატებით მონიტორინგს განახორციელებს.“ იორმუღანლოს თემის მოსახლეობა კი იმედს იტოვებს, რომ სამედინო მომსახურების კუთხით ცვლილებები უახლოეს მომავალში განხორციელდება და ექიმის კონსულტაციას უფრო კომფორტულ გარემოში მიიღებენ.