ლანა გულოშვილი ეთნიკური აზერბაიჯანელებით დასახლებულ იორმუღანლოს თემში `ქართული ენის სახლი~ 2012 წლის 9 მარტს დაარსდა, რომელმაც მუშაობა 23 აპრილიდან დაიწყო. `ენის სახლი~ ქუთაისის ზურაბ ჟვანიას სახელობის ადმინისტრირების სკოლის დაქვემდებარებაშია და ხელს უწყობს ეთნიკურ აზერბაიჯანელებში ქართული ენის შესწავლას. სკოლამ უკვე გამოუშვა პირველი ნაკადი, რომელთა უმრავლესობაც იორმუღანლოს სოფლების საჯარო სკოლების პედაგოგები არიან. კურსდამთავრებულებს სერტიფიკატები გადაეცათ. `ქართული ენის სახლმა~ ექვსთვიანი მუშაობის დასრულების შემდეგ საზოგადოებას ის შედეგები აჩვენა, რომელსაც ამ ხნის განმავლობაში მიაღწია. 13 დეკემბერს იორმუღანლოს `ენის სახლის~ ადმინისტრაციამ მასწავლებლებს, რომლებმაც ქართული ენა შეისწავლეს, სერტიფიკატები გადასცა. `2012 წლის 23 აპრილიდან დავიწყეთ სახელმწიფო ენის შესწავლის მსურველთა ჩაწერა. სულ 86 მსმენელი გვყავდა. ამათგან 70 _ ლამბალოს, კაზლარის, დუზაგრამის და იორმუღანლოს მასწავლებლები არიან. ასევე გვაქვს მოსახლეობის ჯგუფიც. სწავლება ექვსი თვის განმავლობაში მიმდინარეობდა. კვირაში ორჯერ ტრენინგებს ატარებდნენ პროექტის _`ქართული, როგორც მეორე ენა~ მასწავლებლები. ესენი არიან დალი ოსეფაშვილი და ქეთევან ჯანელიძე. ასევე მსმენელებს დამატებით ვამეცადინებდით მე და პროექტის _ `ქართული ენა მომავალი წარმატებისთვის~ მოხალისე მასწავლებლები. ამ საქმიანობის მიზანია, სკოლებში დაინერგოს ბილინგური (ორენოვანი) სწავლება. ამის შემდეგ გადამზადებული მასწავლებლები შეძლებენ გაკვეთილი ქართულ და აზერბაიჯანულ ენებზე ჩაატარონ. დღეს პედაგოგებს, რომლებმაც გადალახეს მინიმალური კომპეტენციის ზღვარი 43 ქულა, გადაეცათ სერტიფიკატები. ამ ეტაპზე დარჩენილია, მხოლოდ მოსწავლეების ჯგუფი. იანვრიდან ველოდებით სიახლეებს. აქვე განვმარტავ იმასაც, რომ სწავლება უფასოა,~ _ გვითხრა იორმუღანლოს `ქართული ენის სახლის~ ადმინისტრატორმა ეთერ პატარკაციშვილმა. სახელმწიფო ენის შესწავლის აუცილებლობაზე `სპექტრთან~ სახლის პედაგოგებმა დალი ოსეფაშვილმა და ქეთევან ჯანელიძემაც ისაუბრეს. `ბედნიერი ვარ, რომ ეს ხალხი გავიცანი. სწავლების ძალიან დიდი მოტივაცია ჰქონდათ. გარდა იმისა, რომ ენის შესწავლა სურდათ, გამოცდის წარმატებით ჩაბარების ჩემთხვევაში, ისინი მიიღებენ სახელფასო დანამატს. ჩვენ გადავამზადეთ დაწყებითი კლასის პედაგოგები. მივიღეთ არაჩვეულებრივი შედეგი. უმრავლესობამ საგამოცდო ბარიერი გადალახა,~ _ ამბობს ის. `მრავალი საუკუნეა, რაც ეს ხალხი საქართველოში ცხოვრობს, თუმცა ქართულ ენაზე საუბარი უჭირთ, რის გამოც პრობლემები ექმნებათ. ამიტომ ასეთი პროექტები მნიშვნელოვანია. ჩვენი `მოსწავლეები~ სიამაყით ამბობენ, რომ ისინი უკვე თავისუფლად საუბრობენ ქართულად და საგარეჯოში ან დედაქალაქში წასვლისას აღარც თარჯიმანი სჭირდებათ, ~-გვითხრა ქეთევან ჯანელიძემ. სოფელ კაზლარის შვიდკლასიანი სკოლის პედაგოგი ზიაფად კასუმოვა ერთ–ერთი მათგანია, ვინც ქართულს `ენის სახლში~ დაეუფლა. 6-თვიანი მონდომება და მოტივირებული სწავლა, მან გამოცდაზე მიღებული მაქსიმალური 80 ქულით დაამტკიცა. `მინდა დიდი მადლობა გადავუხადო ყველას, სახლის ადმინისტრაციას, მასწავლებლებს. ბედნიერი ვარ გაწეული შრომა ასე რომ დამიფასდა და 80 ქულა მივიღე. დღეს სერტიფიკატი გადმომცეს. აქ ნასწავლი ნამდვილად მეხმარება ბილინგური სწავლების პროცესში,~ _ ამბობს ზიაფადი. "აქ ბევრი რამ ვისწავლეთ. ქართული მეტ-ნაკლებად მანამდეც ვიცოდით, თუმცა არა ასე საფუძვლიანად. "ენის სახლში" უამრავი სიახლე მოვისმინეთ. ნასწავლს უკვე ვიყენებ გაკვეთილებზე, ჩემს მოსწავლეებთან. განსაკუთრებით მომწონს ბავშვების ჯგუფური მეცადინეობა," _ ამბობს კიდევ ერთი კურსდამთავრებული, ლამბალოს დაწყებითები კლასების მასწავლებელი სადაიგად მამედოვა. "გრამატიკა არ ვიცოდი, აქ სიარული ძალიან დამეხმარა. სკოლებში ინერგება ბილინგური სწავლება, რაც ამ ჯგუფში გაერთიანებულ მასწავლებლებს მუშაობას გაგვიადვილებს. დიდი მადლობა `ენის სახლის~ წარმომადგენლობას, ძალიან სასიამოვნო გარემო იყო~-ამბობს დუზაგრამის დაწყებითი კლასების პედაგოგი. ფიზული შამანოვი ლამბალოს სკოლის, ისტორიის ახალგაზრდა მასწავლებელია. სერტიფიკატი მანაც მიიღო. საკუთარი შთაბეჭდილება კი `სპექტრთან~ გამოხატა. `მიხარია, რომ დღეს აქ ვარ. ძალიან კარგ საქმეს აკეთებენ ენის სახლში და იმედია, ეს პროექტი კიდევ გაგრძელდება.~ კურსდამთავრებულებს სერტიფიკატები იორმუღანლოს `ქართული ენის სახლის~ მეგობარმა და საპატიო სტუმარმა არჩილ ჯაბადარმა გადასცათ. მათ `სპექტრთან~ აღნიშნული სახლის მნიშვნელობაზე ისაუბრა: `ამ პროექტით სერიოზულად არის დაინტერესებული განათლების სამინისტრო. საგარეჯოს მუნიციპალიტეტში მსგავსი სახის ღონისძიებების განხორციელება და ქართული ენის შესწავლა 1999 წლიდან დაიწყო. თუმცაღა, `ენის სახლის~ გახსნა უკვე მასშტაბური პროექტია და ერთ-ერთი სერიოზული წარმატებაა. მოგეხსენებათ, სკოლებში იწყება ბილინგური სწავლება, ამიტომ ამ კუთხით პედაგოგების გადამზადება მნიშვნელოვანი იყო. ეს დიდ შედეგს გამოიღებს. მოხდება აზერბაიჯანელების ქართულ საზოგადოებაში ინტეგრირება,~ _ აღნიშნა საგარეჯოს მუნიციპალიტეტის გამგეობის უფროსმა საჯარო მოხელემ, განათლოების საკითხებში არჩილ ჯაბადარმა. დაჯილდიოების ცერემონიალის დასრულების შემდეგ, შეკრება არაოფიციალური ნაწილით _ ფურშეტით და თბილი საუბრებით გაგრძელდა.