მარინა ბეროშვილი ის, რომ ბავშვებს შინაური ცხოველები უყვართ და მათზე ზრუნავენ, ყველასთვის ცნობილია. ჩვენ გადავწყვიტეთ იორმუღანლოს თემის სოფლებში მცხოვრებ მოზარდებს გავსაუბრებოდით და გაგვეგო რომელი შინაური ცხოველები ჰყავთ სახლში და როგორ უვლიან. სოფელი იორმუღანლოში მცხოვრები აითაც ჯაფაროვს, სახლში ძაღლი ჰყავს. როგორც თვითონ გვიყვება ის შემთხვევით გზაზე იპოვა, შეეცოდა და გადაწყვიტა სახლში წაეყვანა. "ჩემს ძაღლს ჯეკა ჰქვია და ძალიან გონიერია. ის გზაზე ვიპოვე, ძალიან შემეცოდა, სახლში მივიყვანე და სახელიც დავარქვი. ვუვლი და საჭმელსაც ვაჭმევ. სახლში კიდევ პატარა ლამაზი კატაც მყავს, რომელიც ასევე ძალიან მიყვარს," _ გვითხრა მან. თაჰირ ალიევს პატარა ლეკვი ჰყავს. მართალია, მისთვის ჯერ სახელიც კი არ დაურქმევია, მაგრამ ძალიან უყვარს და ზრუნვას არ აკლებს. "ლეკვი სხვამ მაჩუქა. მისთვის ჯერ სახელიც არ დამირქმევია. ამიტომ ვფიქრობ რა მოუხდება. საერთოდაც ცხოველები ძალიან მიყვარს," _ გვითხრა მან. სოფელ დუზაგრამაში მცხოვრები ელთაჯ ქაზუმოვი ამბობს, რომ არ ეგულება ბავშვი, რომელსაც ცხოველები არ უყვარს. თვითონ კი სახლში ერთ ძაღლს უვლის. "დიდი ძაღლი მყავს და ალექსი ჰქვია. სახლში რომ მივიყვანე პატარა ლეკვი იყო და გავზარდე, ამიტომ ამაგი მაქვს და ძალიან მიყვარს. კარგად ვუვლი, ვაჭმევ და ხანდახან ვაბანავებ კიდეც," _ გვითხრა მან. ყველაზე ბევრი ცხოველი იეთარ გასანოვა აღმოაჩნდა. მას ორი კატა და ერთი ძაღლი ჰყავს. "ცხოველები მამამ მომიყვანა. ყველას ერთნაირად ვუვლი და ვაჭმევ. განსაკუთრებით კატები მიყვარს, ისინი ძალიან ფუმფულები, წყნარები და ლამაზები არიან. ამასთან ერთად, თაგვებსაც იჭერენ და სასარგებლოები არიან." -გვითხრა იეთარ გასანოვამ.