მარინა ბეროშვილი საგარეჯოს მუნიციპალიტეტის სოფელ ლამბალოს ხევი წლებია უკვე დაბინძურებულია. როგორც ადგილობრივი ამზარ ბაირამოვი ამბობს, იმის გამო, რომ სოფელში არც კანონიერი ნაგავსაყრელია და არც ნაგის მანქანა დადის, იძულებულები არიან ნარჩენები ხევში ჩაყარონ. `სოფელში ნაგავსაყრელი არ გვაქვს და არც მანქანა დადის. ამიტომ ხალხი ნარჩენებს ხევში ყრის. ზაფხულში ისეთი სუნი დგას, რომ გაჩერება არ შეიძლება. თან მღრღნელებიც გაჩნდნენ და შესაძლებელია რაიმე დაავადება გავრცელდეს. მე არ ვიცი ეს ამბავი ვის ეხება, მაგრამ პრობლემა აუცილებლად უნდა მოგვარდეს,~ _ გვითხრა მან. თავის გულისტკივილს გამოთქვამს იდგარ გულიევიც. `ხევში ნაგავს ადგილობრივი მოსახლეობა ყრის. აბა რა ქნან, ნარჩენები სად წაიღონ? მანქანა არ დადის და სხვა ადგილიც არსად არის გამოყოფილი სპეციალურად, რომ იქ დაყარონ. მარტო ეხლა კი არა, უკვე წლები აქ ეს ამბავია,~ _ გვითხრა მან ამასთან დაკავშირებით სოფელ ლამბალოს ტერიტორიული ორგანოს რწმუნებულს ალახიარ აბდულაევს დავუკავშირდით, რომელმაც ჩვენთან სატელეფონო საუბარში აღნიშნა: `მოსახლეობა ბევრჯერ გავაფრთხილე, რომ ხევში ნაგავი აღარ ჩაეყარათ. ამაზე ჯარიმებიც დავაწესე და რამდენიმე ადამიანიც დავაჯარიმეთ, მაგრამ უშედეგოდ. სოფლიდან მოშორებით არის კარიერი, ორმოებია ამოთხრილი და შეუძლიათ ნაგავი წაიღონ და იქ ჩაყარონ. ამის შესახებ ხალხი რამდენჯერმე გავაფრთხილე, მაგრამ წასვლა ეზარებათ და ამიტომ ხელის ურიკებით მიაქვთ და პირდაპირ ხევში ყრიან. ბიუჯეტში არ გვაქვს იმის საშუალება, რომ სპეციალური ნაგავსაყრელი გავაკეთოთ ან კიდევ მანქანამ იაროს. ამიტომ კიდევ ერთხელ ვთხოვ ყველას, რომ ხევის დაბინძურებისგან თავი შეიკავო,~ _ გვითხრა ალახიარ აბდულაევმა. ამ საკითხთან დაკავშირებით საქართველოს მყარი ნარჩენების მართვის კომპანიის დირექტორს ნუგზარ კევლიშვილს დავუკავშირდით. " ამ საკითხზე კონკრეტულად მე ჯერჯერობით ვერანაირ კომენტარს ვერ გავაკეთებ. ამჟამად მუშავდება გეგმა, რომელიც კონკრეტულად ნაგავსაყრელებს შეეხება და ამ პრობლემის მოგვარებას ემსახურება. ეს საკმაოდ რთული საკითხია და მისი ასე ადვილად გადაჭრა შეუძლებელია."-გვითხრა მან.