კახეთში 19 ივლისს მოსული ძლიერი სეტყვითა და ქარბორბალით მიყენებულ ზარალს ივანიშვილის მთავრობა ახლიდან შეისწავლის, - ამის შესახებ ინფრასტრუქტურისა და რეგიონული განვითარების მინისტრმა დავით ნარმანიამ განაცხადა. ნარმანიას თქმით, სამუშაო ჯგუფმა კახეთში მიმდინარე ინფრასტრუქტურული პროექტები დაათვალიერა. სამინისტროს წარმომადგენლები ყვარლის, თელავის, გურჯაანის, ლაგოდეხის, სიღნაღისა და საგარეჯოს მუნიციპალიტეტებში ორჯერ იმყოფებოდნენ. „ჩვენ დავიწყეთ კახეთის რეგიონით, რადგან იქ მსხვილი სარეაბილიტაციო სამუშაოები ხორციელდებოდა და ამავდროულად, იქ არ არის ბოლომდე დასრულებული სტიქიით მიყენებული ზარალის შემდგომი სამუშაოები. ბოლომდე არ არის აღწერილი ზარალი. ასევე არის პრობლემა, რომ მოსახლეობისთვის მხარდაჭერა შერჩევით განხორციელდა. ბოლომდე არ არის აღმოფხვრილი სტიქიით მიყენებული ზარალი. ამიტომაც მივიღეთ გადაწყვეტილება, რომ ხელახლა შევისწავლოთ იქ არსებული პრობლემები“, - აცხადებს ნარმანია.

მისივე თქმით, რამდენიმე პრობლემა გამოიკვეთა, მათ შორის სამუშაოების შემსრულებლების მიმართ სამუშაოების დაჩქარების მოთხოვნა, რაც ადეკვატურად უარყოფითად აისახებოდა ხარისხზე. „ბევრი შემსრულებელი საუბრობს ზეწოლაზე. იყო ზეწოლა, რომ კონკრეტული სამთავრობო ღონისძიებებისთვის მოესწროთ გარკვეული სამუშაოების დასრულება. სამინისტროში შედგა უკვე სამუშაო ჯგუფი, რომელიც გააგრძელებს ამ საკითხებზე მუშაობას. მოვუწოდებ შემსრულებლებს, ასეთი ფაქტების შესახებ დროულად მიმართონ სამინისტროს, რომელიც მათ გადაამისამართებს შესაბამის საგამოძიებო ორგანოებთან“, – განაცხადა ნარმანიამ.