ინგა ბიტარაშვილი; მარინა ბეროშვილი; 2010-2011 წლებში ლაგოდეხის მუნიციპალიტეტის სოფელ უზუნთალაში "სოფლის მხარდაჭერის პროგრამის" ფარგლებში სხვადასხვა სახის სამუშაოები შესრულდა, თუმცა როგორც ადგილობრივები განმარტავენ, _ არც ისე ხარისხიანად. მოსახლეობის თქმით, სოფელში ჭაბურღილი მოეწყო, რომელიც დღემდე არ მუშაობს; სანახევროდ გარემონტდა სტადიონი, მოხრეშილი გზები წყალმა წალეკა, გასასუფთავებელია სარწყავი არხები. ტერიტორიული ორგანოს რწმუნებული ჯემალ ნიაზოვი მოსახლეობის აზრს არ ეთანხმება და საპირისპიროს ამტკიცებს. ლაგოდეხის მუნიციპალიტეტის სოფელი უზუნთალა კაბლის ტერიტორიულ ორგანოში შედის და რაიონიდან 15 კილომეტრითაა დაშორებული. სოფელი ალაზნის ვაკეზე, მდინარე კაბლის მარცხენა ნაპირას მდებარეობს, სადაც 2002 წლის აღწერის მონაცემებით, 2 ათას 333 ეთნიკური აზერბაიჯანელი ცხოვრობს. (ka.vikipedia.org). უზუნთალაში ოფიციალური ინფორმაციის თანახმად, "სოფლის მხარდაჭერის პროგრამის" ფარგლებში 2010 წელს შემდეგი სახის სამუშაოები ჩატარდა: უზუნთალა-მსახლგორის შემაერთებელი გზის მოხრეშვა (2861.04), შიდა სასოფლო გზების მოხრეშვა (3239.25), სარწყავ არხში მილხიდის მოწყობა (3075.89), განჯალა-უზუნთალის სტადიონის რეაბილიტაცია და საჭიდაო მოედნის მოწყობა (4184.4). რაც შეეხება 2011 წელს, სოფელში სარწყავი არხის აღდგენისთვის 20154.04 ლარი გაიხარჯა, ხოლო სასაფლაოსთან დამცავი გაბიონის მშენებლობისთვის _ 11 ათას 973.27. ადგილობრივები "სოფლის მხარდაჭერის პროგრამის" შესახებ ინფორმაციას მეტ-ნაკლებად ფლობენ. როგორც ისინი განმარტავენ, სოფელში ჭაბურღილი გაკეთდა, თუმცა მოსახლეობა ამ დრომდე საკუთარ ეზოებში არსებული ჭებით სარგებლობს. "სოფლის დახმარების პროგრამის შესახებ არაფერი ვიცი. ჩვენ ვინ რას გვეკითხება?! ერთხელ იყვნენ მარტო, როდესაც ხიდი უნდა გაეკეთებინათ, მაშინ თელავიდანაც იყვნენ ჩამოსულები, კრება გამართეს. მარტო 4 მასწავლებელი ესწრებოდა, იმათაც ქართული არ იცოდნენ და რასაც ეუბნებოდნენ, ყველაფერზე თავს უქნევდნენ. ჭაბურღილი შარშანწინ გააკეთეს, მაგრამ რა?! სულ რაღაც ორი დღე იმუშავა და გათიშეს. სოჩიკზეა და გვითხრეს დენის ფულია გადასახდელი და დავალიანება სოფელმა უნდა გადაიხადოსო. ჭები გვაქვს სახლებში და დასალევად იმ წყალს ვიყენებთ," _ გვითხრა მახმად მახრამოვმა და აქვე უზუნთალაში არსებულ სხვა პრობლემებზეც გვესაუბრა: "გარდა ამისა, მაშინ სტადიონიც გააკეთეს, მაგრამ სამუშაოები ძალიან სწრაფად მოამთავრეს, ნორმალური სტადიონი კი ასე მცირე დროში არ კეთდება. არც მატრასები გვიყიდეს და არც სპორტული `ზალა~ მოაწყეს, არადა, ჩვენს გარდა ყველგან არის. რადგანაც ჩვენთან ჭიდაობის ტრადიციაა, ყოველ ბაირამობაზე ოთხივე სოფელი აქ მოდის (ავტ: კაბალი, უზუნთალა, განჯალა, ყარაჯალა) და ჭიდაობა ჩვენს სტადიონზე იმართება. მარტო სკამები შეაკეთეს და ორი ოთახი ააშენეს ტანსაცმლის გამოსაცვლელად. ბავშვებს საჭიდაოდ მატრასები არ აქვთ, ნახერხს ვყრით ხოლმე. იყო შემთხვევები, როდესაც მოზარდები წაიქცნენ და რამდენჯერმე ხელიც მოიტეხეს. თავიდან გვითხრეს, რომ აბანოსაც გააკეთებდნენ, მაგრამ არ შეასრულეს," _ განმარტა `სპექტრთან~ საუბარში ადგილობრივმა მახმად მახრამოვმა. უზუნთალაში მცხოვრები ჯაფარ ანაგიევი კი მდინარე "კაბალის" შენაკადის ყოველი ადიდებისას ზარალდება. "კაბლის ხევის განშტოების ნაპირზე ვცხოვრობ. მდინარის ადიდების დროს, წყალი სახლში შემოდის და ეზო მთლიანად იტბორება, რის გამოც ნათესები და სათბურები მინადგურდება. შარშანწინ შემოდგომის პამიდორი და სხვა ბოსტნეული მეთესა, მოვარდნილმა მდინარემ ყველაფერი წალეკა, ზარალს კი არავინაც არ გვინაზღაურებს! შარშან ტრუბები ჩაყარეს და ხრეშიც დაყარეს, მაგრამ წყალი რომ მოვარდა ტრუბები დაანგრია და ხრეში კი ქვევით ჩაიტანა. გვითხრეს ტუმბო უნდა გავაკეთოთ, სამუშაოებს 2 თებერვლიდან დავიწყებთო, მაგრამ სათავეზე დღემდე არც ტრაქტორი წასულა და არც არაფერი გაუკეთებიათ," _ გვითხრა ჯაფარ ანაგიევმა. საწინააღმდეგოს ამტკიცებს ამავე სოფლის მკვიდრი რაშიდ სოინოვი. მისი თქმით, ადგილობრივი ხელისუფლება სოფლის საკეთილდღეოდ ყველაფერს აკეთებს. "მთავრობის მადლობელი ვარ. სასაფლაოზე გაბიონები მოაწყეს, ხიდი და გზები გააკეთეს. მართალია, არ ვიცი ეს ყველაფერი რა პროგრამით გაკეთდა, მაგრამ ის ვიცი, რომ კრება ჩატარდა და იქ თქვეს რამდენი ათასი ლარი იყო გამოყოფილი. ეტყობა ყველაფერი იმ თანხით გააკეთეს," _ გვითხრა რაშიდ სოინოვმა. სოფელ უზუნთალაში ისეთ ადამიანებსაც შევხვდით, რომლებმაც სოფლის პრობლემებზე ილაპარაკეს, მაგრამ სახელის და გვარის დასახელებისგან გარკვეული მიზეზეის გამო, თავი შეიკავეს. "სოფლის დახმარების პროგრამის" შესახებ არაფერი ვიცი. რომ ამბობენ გზა გააკეთესო, თქვენ თითონაც ხედავთ რა მდგომარეობაშია. მარტო კაბალის ტრასაა გაკეთებული. სხვა პრობლემებთან ერთად სოფელში გაზიც არ გვაქვს. 500 ლარი უნდა გადაიხადოთო და იმას არ ფიქრობენ, გაჭირვებულ გლეხს შეუძლია თუ არა ამ თანხის გადახდა. ამიტომ არც გზა გვაქვს, არც წყალი, არც გაზი. ამაზე მეტი პრობლემა რაღა უნდა ვთქვა?!"_ გვითხრა სოფელ უზუნთალას მაცხოვრებელმა. თოფიკა მახრამოვის თქმით კი ახლადაშენებული ხიდის დაზიანების საშიშროება მუდმივად არსებობს. ფაქტია, რომ მისი შერემონტება თითქმის ყოველ წელს უწევთ. "ზემოთ ხიდი რომ დაინგრა, მართალია გააკეთეს, მაგრამ შეიძლება მოვარდნილმა წყალმა ისევ დააზიანოს. კიდევ ერთი დიდი პრობლემა სარწყავი არხებია, რომელიც ფაქტიურად არ გვაქვს. ეს საკითხი უკვე დიდი ხანია გვაწუხებს. ნათესებს პომპით ვრწყავთ და ხარჯიც, რა თქმა უნდა, დიდია, დენიც ხომ გასათვალისწინებელია? თქმით ბევრჯერ ვთქვით, მაგრამ არაფერი არ გააკეთეს," _ გვითხრა თოფიკა მახრამოვმა. აღნიშნულ პრობლემებზე გაზეთი "სპექტრი" კაბლის ტერიტორიული ორგანოს რწმუნებულს (თემში შედის კაბალი, უზუნთალა, განჯალა და ყარაჯალა) დაუკავშირდა. სატელეფონო საუბრისას ჯემალ ნიაზოვმა განმარტა, რომ სოფელში ჭაბურღილი ამ დრომდე მუშაობს. "უზუნთალას სკოლასთან ჭაბურღილის გაწმენდა მოხდა. დენის ფულს კი სკოლა იხდის. ადრე სოფელში წყალი რომ არ იყო, "კრუგლასუტკა" მუშაობდა. სწავლა რომ არის, ჭაბურღილსაც მაშინ რთავენ," _ განმარტა რწმუნებულმა და იქვე სტადიონის რეაბილიტაციაზეც ისაუბრა: "უზუნთალას სტადიონის რემონტი სოფლის მოსახლეობამ მოითხოვა. სკამები სულ განადგურებული იყო, დავასვარკავეთ და გავკრასკეთ. გარდა ამისა, ტანსაცმლის გამოსაცვლელი ოთახები ავაშენეთ. რაც შეეხება მატრასებს, ამისთვის ფული აღარ გვეყო და ასე დაგვრჩა. მიმდინარე წელს კი, საჭიდაო ტატამის შეძენისთვის 16 ათასი ლარია გათვალისწინებული," _ აღნიშნა რწმუნებულმა. ჯემალ ნიაზოვმა ჩვენთან საუბარში განმარტა, რომ კაბლის ხევის შენაკადთან მცხოვრები ერთი ოჯახის მდგომარეობა მისთვის ნაცნობია, თუმცა ამ პრობლემის გადაჭრას "სოფლის მხარდაჭერის პროგრამით~ ვერ შეძლებენ. "ამ საკითხს სოფლის პროგრამის ფარგლებში იმ შემთხვევაში გადავჭრით, თუ წელს სოფელი თანხმობას მისცემს," _ ასეთია მისი პასუხი, თუმცა აქვე იმასაც განმარტავს, რომ მიმდინარე წელს პრიორიტეტები უკვე შერჩეულია და აღნიშნული პრობლემა მეოთხე ადგილზე დგას.