სახტუნაო, რომელიც ასე გვიყვარდა ბავშვობაში მეტად ეფექტური ტრენაჟორია, გახდომის უნიკალური საშუალება და სირბილზე არანაკლებ მნიშვნელოვანიც. სახტუნაოთი შეგიძლიათ შინიდან გაუსვლელად დაიკლოთ ზედმეტი კილოგრამები. საკმარისია დღეში 10-წუთიანი ხტომა, რომ წელის გარშემოწერილობის შემცირება აშკარა გახდეს. თუ სახტუნაოთი ვარჯიშს უფრო მეტ დროს დაუთმობთ, შედეგი გაგაოცებთ. სახტუნაო ცელულიტის საწინააღმდეგო ეფექტური საშუალებაცაა, რადგან აუმჯობესებს ლიმფის დინებას, შედეგად კუნთები იჭიმება, ფეხებისა კი იწრთობა. ხტუნვა მხოლოდ კალორიების წვას კი არ უწყობს ხელს, არამედ აკაჟებს გულ-სისხლძარღვთა და სასუნთქ სისტემებს, აწრთობს, ავარჯიშებს სხეულის კუნთებს, ავითარებს გამძლეობას. სპეციალისტთა დასკვნის თანახმად, ხტუნვით ადამიანი უფრო მეტად იკლებს წონას, ვიდრე ჩოგბურთით, ველოსიპედით და თუნდაც ცურვით. სახტუნაოთი ერთსაათიანი ვარჯიშის შედეგად 70 კგ წონის ადამიანი დაახლოებით 720 კკალორიას წვავს. ამრიგად, სახტუნაოთი ხტუნვა სერიოზული დატვირთვაა ორგანიზმისთვის. თანაც ამისთვის საჭირო არ არის სპორტული დარბაზი - საკმარისია დაახლოებით 2 კვადრატული მეტრი ფართობი, ზოგჯერ - უფრო ნაკლებიც, იმისდა მიხედვით, ვინ როგორ ხტუნავს. სახტუნაოს შერჩევისას ორივე ფეხით უნდა დადგეთ მის შუა ნაწილზე, ბოლოები ხელში დაიჭიროთ და ხელები მხრების სიგანეზე გაშალოთ. ასეთი სიგრძეა თქვენთვის იდეალური. მოკლე სახტუნაოთი ხტუნვისას ფეხების მაქსიმალურად მოკეცვა მოგიწევთ, ხოლო გრძელი სახტუნაო არ მოგცემთ მოძრაობათა კონტროლის საშუალებას. სპეციალისტები ამტკიცებენ, რომ გასახდომად განკუთვნილი სახტუნაოს დიამეტრი 0,8-0,9 სმ უნდა იყოს. ხტუნვა უნდა დაიწყოთ ორივე ფეხით ერთ ადგილზე, მერე კი შეიძლება სხვადასხვა ვარჯიშის ვარირება: მაქსიმალურად მუხლებმოკეცილი, ფეხების მონაცვლეობით, მორიგეობით ხან ერთი და ხან მეორე ფეხით, გვერდზე (ანუ მარჯვნივ და მარცხნივ) ან წინ და უკან ხტომებით, ხელების გადაჯვარედინებით და სხვა.