ჟოლოს გემოსა და არომატთან ერთად ჯანმრთელობისთვის სასარგებლო თვისებებიც გააჩნია. სამკურნალოდ როგორც ცოცხალს, ისე ხმელ ნაყოფს იყენებენ, რომელიც ივლის-აგვისტოში მწიფდება. ჟოლოს ნაყოფი შეიცავს ეთერზეთს, გლუკოზას, ფრუქტოზას, C და B ჯგუფის ვიტამინებს, კაროტინს, კალიუმის მარილებს, სპილენძს და სხვა მინერალებს. ასევე პურინებს, ჰეტეროციკლურ ორგანულ ნაერთებს, რომლებსაც ცენტრალური ნერვული სისტემის აღგზნებისა და შარდის გამოყოფის გაძლიერების უნარი შესწევს, ამიტომ არ არის რეკომენდებული ნიკრისის ქარითა და ნეფრიტით დაავადებულთათვის. მედიცინაში ჟოლოს ნაყოფს იყენებენ მადისა და ოფლის მომგვრელ, სიცხის დამწევ, ღებინების საწინააღმდეგო, ამოსახველებელ საშუალებად. ახასიათებს ანტიბაქტერიული თვისებებიც. ჟოლო ჭარბ წონასთან ბრძოლისას ბუნებრივი მოკავშირეა. მისი მოქმედების მექანიზმი, მეცნიერთა აზრით, კეტონების ეფექტს ეფუძნება. ეს ბუნებრივი ნაერთები, რომლებსაც ჟოლოს წითელი ფერმენტი შეიცავს, ააქტიურებს ნივთიერებათა ცვლის დამაჩქარებელი ჰორმონის გამომუშავებას. ბრიტანელებმა გასახდომი სუნამოც კი გამოუშვეს ჟოლოს არომატით. ჟოლოში ნახშირწყლები ცოტაა, ასე რომ, დიაბეტიანებსაც შეუძლიათ, ამ უგემრიელესი კენკრით ისიამოვნონ. ჟოლო აქვეითებს ქოლესტერინის დონეს, ამცირებს მადას და ხელს უწყობს ცხიმის დაშლას, ამიტომ ის იდეალური არჩევანია განტვირთვის დღეებში. მოიწყვეთ ასეთი დღეები კვირაში ორჯერ ორდღიანი შუალედით. მთელი დღის განმავლობაში მიირთვით მხოლოდ ხუთ ულუფად გაყოფილი 700 გრამი ცოცხალი კენრა, უკანასკნელი ულუფა - დაძინებამდე 3-4 საათით ადრე, ძილის წინ კი დალიეთ 1 ჭიქა მაწონი ან კეფირი. გაითვალისწინეთ: ჟოლო დიდი რაოდენობით შეიცავს შარდმჟავა მარილებს, ამიტომ არ არის რეკომენდებული მათთვის, ვისაც პოდაგრა ან თირკმლის კენჭოვანი დაავადება აქვს. ცოცხალი ჟოლო მაქსიმალურად შეინარჩუნებს სასარგებლო თვისებებს, თუ შაქართან ერთად გახეხავთ, თუმცა თერმულად დამუშავებულიც სასარგებლოა. მაგალითად, დუღილი ვერ შლის სალიცილის მჟავას, რომელსაც ცნობილი სიცხის დამწევი თვისება აქვს. ჟოლოს შემადგენლობაში შემავალი კალიუმი არეგულირებს წნევას, კალციუმი საჭიროა ძვლოვანი ქსოვილისთვის, კაროტინი აუმჯობესებს მხედველობას, ასკორბინის მჟავა (C ვიტამინი) აძლიერებს იმუნიტეტს. ჟოლო დეპრესიასთან გამკლავებაშიც დაგეხმარებათ. ეს მასში არსებული სპილენძის დამსახურებაა. სპილენძი ანტიდეპრესანტების ერთ-ერთი კომპონენტია, ამიტომ სანამ აბების სმას დაიწყებდეთ, ჟოლო სცადეთ. ეს კენკრა ახალგაზრდობის გახანგრძლივებაშიც დაგვეხმარება. ამაზე იზრუნებენ A, PP, B2 ვიტამინები, რომლებიც კანს ტონუსს, სიგლუვესა და სიმკვრივეს უნარჩუნებენ. წყარო: მკურნალი.გე