მართალია, რაგბი ყველა სკოლაში არ ისწავლება, მაგრამ გურჯაანის #3 საჯარო სკოლა კარგი გამონაკლისია. აქ უკვე მესამე წელია ბავშვები სპორტის ამ სახეობით აქტიურად არიან დაკავებულები. "ამ სკოლაში რაგბისადმი დიდი ინტერესი გამოიკვეთა და სკოლის დირექტორმა მისი სწავლება დაუშვა. საერთოდ, რაგბიში ვარჯიში სკოლამდელი ასაკის ბავშვებისთვისაც შეიძლება, რადგან ამ სახეობისადმი ინტერესი და სიყვარული თუ პატარაობიდანვე გაღვივდება, უფრო კარგია. გასულ წელს გოგოებიც ვარჯიშობდნენ. საქართველოს მასშტაბით უნდა ჩატარებულიყო შეჯიბრი სასკოლო რაგბიში, თუმცა რატომღაც თბილისში აღარ მიგვიწვიეს. საერთოდ, შეჯიბრებებში აქტიურად ვართ ჩართულები და პატარ-პატარა წარმატებებიც გვაქვს. მაგალითად, აღმოსავლეთ საქართველოს მასშტაბით გამართულ შეჯიბრში 2000-2001 წელს დაბადებულმა ბავშვებმა პირველი ადგილი აიღეს. ამ გამარჯვებამ ჩვენს მოსწავლეებს მეტი სტიმული მისცა. ზოგადად შეჯიბრებებზე მონაწილეობა, მით უმეტეს თუ სხვა ქალაქში ტარდება, მეტი გამოცდილებაა," _ აღნიშნავს რაგბის ფედერაციის მეორე დონის მწვრთნელი #3 საჯარო სკოლის რაგბის მასწავლებელი, მამუკა ჭურღულაშვილი, რომელიც ასევე გურჯაანის სპორტსკოლის მწვრთნელია. მისი თქმით, როგორც დამწყები მორაგბეები, პატარა სპორტსმენები დიდი მონდომებითა და ინტერესით ვარჯიშობენ. "გურჯაანში რაგბი მაინც ახალი ხილია და ინტერესი დიდია. ჩვენი გუნდი "კახები" საკმაოდ კარგი და ძლიერი სპორტსმენებით არის დაკომპლექტებული: გიორგი გიორხელიძე, ალეკო ყალაბეგაშვილი, თორნიკე კოშაძე, ლუკა ნაყეური, თემურ გეთიაშვილი, ვანო ომარაშვილი _ ეს ბავშვები შემტევი უნარით ხასიათდებიან. ზოგადად ამ პატარებში ყველა ის თვისებაა, რაც მორაგბეს უნდა ჰქონდეს. დიდი სპორტული სულისკვეთება აქვთ და მე ამით ვამაყობ." _ ამბობს მამუკა ჭურღულაშვილი. "სპორტის ეს სახეობა ძალიან მიყვარს. მომავალში მინდა, რომ მას გავყვე. მომწონს საქართველოს ნაკრები `ბორჯღალოსნები~ და მათ თამაშს დიდი ინტერესით ვადევნებ ხოლმე თვალს." _ ამბობს მორაგბე გიორგი გიორხელიძე. "ძალიან მომწონს, რომ ჩვენს სკოლაში გვაქვს საშუალება რაგბიში ვივარჯიშოთ. ბევრ შეჯიბრზე გავსულვარ და ყოველთვის უფრო მეტი მინდა ხოლმე. გამარჯვება მაძლიერებს, მომავალში მინდა ცნობილი მორაგბე გამოვიდე." _ გვითხრა ლუკა ნაყეურმა. "სამი წელია, რაც რაგბიში ვვარჯიშობ და ძალიან მომწონს, შეჯიბრებებში გავსულვარ, მახსოვს ერთხელ წავაგეთ, თუმცა ჩვენ ფრთები არ ჩამოგვიყრია და ვარჯიში უფრო აქტიურად გაგვიგრძელებია." _ ამბობს თორნიკე კოშაძე.