სამ და ოთხ დეკემბერს საქართველოს კალათბურთის ეროვნული ფედერაცია პირველად უმასპინძლებს კალათბურთის საერთაშორისო ფედერაციის (FIBA) უმაღლესი რანგის სტუმრების ოფიციალურ ვიზიტსა და FIBA ევროპის ბორდის, აღმასრულებელი საბჭოს სხდომას საქართველოში. ინფორმაციას აღნიშნულთან დაკავშირებით საქართველოს კალათბურთის ეროვნული ფედერაცია ავრეცელბს.

ვიზიტის ფარგლებში საქართველოს ეწვევიან: FIBA-ს პრეზიდენტი ჰამან ნიანგი, FIBA-ს გენერალური მდივანი ანდრეას ზაგკლისი, FIBA ევროპის პრეზიდენტი თურგაი დემირელი, აღმასრულებელი დირექტორი კამილ ნოვაკი და ბორდის წევრები.

FIBA ევროპის ბორდი დაკომპლექტებულია ევროპის კალათბურთის ფედერაციების პრეზიდენტებითა და გენერალური მდივნებით, რომელთა შორის ასევე გახლავთ საქართველოს კალათბურთის ეროვნული ფედერაციის გენერალური მდივანი, გიორგი ქართველიშვილი, რომელიც „ფიბა-ევროპის“ ბორდის წევრი და ასევე „ფიბა-ევროპის“ იურიდიული კომიტეტის პრეზიდენტია.

ვიზიტის ფარგლებში დაგეგმილია ოფიციალური შეხვედრები საქართველოს მთავრობის წარმომადგენლებთან, „ევრობასკეტ 2022“-ისთვის დარბაზის მშენებლობის პროცესის ადგილზე გაცნობა და სამშენებლო კომპანიის წარმომადგენლებთან სამუშაო შეხვედრა „ევრობასკეტ 2022“-ის საორგანიზაციო პროცესის მონიტორინგის მიზნით.

FIBA ევროპის ბორდის სხდომაზე განხილული იქნება ევროპული კალათბურთის მნიშვნელოვანი საკითხები, მათ შორის „ევრობასკეტ-2022,“-ნათქვამია განცხადებაში.

საქართველოს კალათბურთის ეროვნული ფედერაცია ხაზს უსვამს, რომ კალათბურთის საერთაშორისო ფედერაციის (FIBA) ხელმძღვანელთა ვიზიტი თბილისში და აღამსრულებელი საბჭოს სხდომის ჩატარება საქართველოში მნიშვნელოვანი ღონისძიებაა, რაც კიდევ ერთხელ ადასტურებს ქართული კალათბურთის მიმართ განსაკუთრებულ ყურადღებას, ახალმშენებარე დარბაზის მიმართ ინტერესსა და „ევრობასკეტ 2022“-ის სამუშაო პროცესის მონიტორინგს.