სასკოლო სპორტული ოლიმპიადა 2015-ის ფარგლებში გრძელდება შეჯიბრებები საქართველოს რეგიონების სხვადასხვა ქალაქებში. 21-23 მაისს გურჯაანის მუნიციპალიტეტში არსებული სკოლების დაბალი კლასების მოსწავლეებს შორის შიდასასკოლო ჩემპიონატი გაიმართა ფეხბურთში. ე.წ. "სკოლბურთში" მონაწილეობას ღებულობდნენ ვაჟთა და ქალთა სასკოლო-საფეხბურთო გუნდები. სასკოლო სპორტული ოლიმპიადის ორგანიზატორები არიან საქართველოს სპორტისა და ახალგაზრდობის სამინისტრო, საქართველოს განათლებისა და მეცნიერების სამინისტრო და საქართველოს ბავშვთა და მოსწავლე ახალგაზრდობის სპორტის ეროვნული ფედერაცია. სასკოლო ოლიმპიური თამაშების საფინალო კვირეული 2015 წლის 23 მაისიდან 26 მაისის ჩათვლით ქ.ბათუმში გაიმართება. "სასკოლო სპორტული ოლიმპიადა 2015" იმართება სპორტის შემდეგ სახეობებში - მინი ფეხბურთი, კალათბურთი, მაგიდის ჩოგბურთი, მძლეოსნური ესტაფეტა და მხიარული სტარტები. ოლიმპიადაში ჩართულნი არიან საქართველოს ყველა რეგიონული ცენტრის საჯარო და კერძო სკოლების მოსწავლეები. რეგიონის გამარჯვებულები 2015 წლის ზაფხულში, ანაკლიის მომავლის ბანაკში, ერთმანეთს შეეჯიბრებიან საქართველოს სასკოლო სპორტული ოლიმპიადის გამარჯვებულების გამოსავლენად. ოლიმპიადის გამარჯვებულები, 2016 წელს, გაემგზავრებიან სკოლების მსოფლიო ჩემპიონატებზე სპორტის სახეობების მიხედვით: მინი-ფეხბურთში - ხორვატიაში, კალათბურთში - ესტონეთში, მაგიდის ჩოგბურთში - ისრაელში და გარბენში - უნგრეთში. 23 მაისს გაიმართება: მძლეოსნობა/ ესტაფეტა ფინალი - 12:00 სთ მისამართი: ქ. ბათუმი 9 მაისის პარკი რუსთაველის ქ. 51; მინი-ფეხბურთი ფინალი - 14:00 სთ. მისამართი: ქ. ბათუმი რ.შაჰინის სახ. სკოლა-ლიცეუმი ბაგრატიონის ქ. 117; მაგიდის ჩოგბურთი (ვაჟები) ფინალი -15:00 სთ მისამართი: ქ. ბათუმი მაგიდის ჩოგბურთის კლუბი (მე-10 საჯარო სკოლა) ბაგრატიონის ქ. 121; მაგიდის ჩოგბურთი (გოგონები) ფინალი -15:30 სთ მისამართი: ქ. ბათუმი მაგიდის ჩოგბურთის კლუბი (მე-10 საჯარო სკოლა) ბაგრატიონის ქ. 121. 24 მაისს დაგეგმილია: მხიარული სტარტების ფინალი - 14:00 სთ-ზე. მისამართი: ქ. ბათუმი ყინულის მოედნის მიმდებარე ტერიტორია ლადო ასათიანის ქ.27. ამ დღეს მოხდება ოლიმპიადაში გამარჯვებული სკოლების საზეიმო დაჯილდოვებაც. 26 მაისს კალათბურთში 3X3 (ვაჟები) 12 სთ-ზე გაიმართება ფინალური შეხვედრა - მისამართი: ქ. ბათუმი მე-14 საჯარო სკოლის სპორტ.დარბაზი ინსარიძის ქ. 11.