ჯერჯერობით მესამე ადგილი, წინ კი დიდი ასპარეზია

სპორტი

12:47 / 02.04.2011

ნათია გელაშვილი

მიმდინარე წლის მარტში, თელავში ჩატარდა კახეთის ჩემპიონატი ჭადრაკში. მასში ძირითადად თელავის, გუჯაანის, სიღნაღის, ლაგოდეხის, ახმეტის, ყვარლის და საგარეჯოს უძლიერესი გუნდები ასპარეზობდნენ. ტურნირს უნდა გამოევლინა პრიზიორი, რომელიც შემდეგში საქართველოს ჩემპიონატში მიიღებდა მონაწილეობას.

8-დან 12 წლამდე ასაკის მოჭადრაკეთა შორის სიღნაღის მუნიციპალიტეტის სახელოვნებო და სასპორტო სკოლების გაერთიანების გუნდიდან (ხელმძღვანელი ივანე სიფრაშვილი) წარმატებით იასპარეზეს წნორის ლიცეუმის მოსწავლეებმა. პრიზიორი გახდა აჩიკო ლეკიაშვილი, რომელმაც მესამე ადგილი დაიკავა, აიღო მესამე ხარისხის მედალი და შესაბამისი დიპლომი. მან საქართველოს ჩემპიონატში თამაშის უფლებაც მოიპოვა. სოსო ლეკიაშვილმა კი მეხუთე ადგილი დაიკავა.

`უნდა აღინიშნოს, რომ შეჯიბრი კარგად ჩატარდა. ჩვენი გუნდის აქტიურობით კმაყოფილი ვარ. ბავშვები ძალ-ღონეს არ იშურებდნენ და საქართველოს ჩემპიონატში მონაწილეობისათვის მაქსიმალურად იბრძოდნენ. მჯერა, გვასახელებენ,~ — აღნიშნა `სპექტრთან~ საუბარში სიღნაღის მუნიციპალიტეტის სახელოვნებო და სასპორტო სკოლების გაერთიანების ჭადრაკის სექციის მწრთვნელმა ივანე სიფრაშვილმა.

გარდა ამისა, აღნიშნული გაერთიანების ხელმძღვანელის თამილა ძმანაშვილის დახმარებითა და ივანე სიფრაშვილის ინიციატივით, მარტის ბოლოს სოფელ ქვემო ბოდბეში გაიმართება რაიონული პირველობა, რომელშიც სიღნაღის მუნიციპალიტეტის ყველა სკოლის მოსწავლე მიიღებს მონაწილეობას.

| Print | E-mail