პირველი ივლისიდან საყოველთაო ჯანმრთელობის დაცვის პროგრამის მეორე ეტაპი ამუშავდა. უფასო პირველადი ჯანდაცვისა და გადაუდებელი დახმარების პროგრამებს გეგმიური სერვისების დაფინანსებაც დაემატა. გადაუდებელი ამბულატორიული მომსახურება _ ფინანსდება 100 %-ით. გადაუდებელი სტაციონარული მომსახურება _ ლიმიტი ერთეულ შემთხვევაზე _ 15 000 ლარი. ოჯახის ექიმის მომსახურება _ ანაზღაურდება 100%-ით. ინტენსიური თერაპია და კრიტიკული მდგომარეობის მართვა _ ერთეულ შემთხვევაზე ზედა ზღვარი 15 000 ლარი. საყოველთაო ჯანდაცვა ასევე აფინანსებს მშობიარობას: ფიზიოლოგიური _ 500 ლარი, საკეისრო კვეთა _ 800 ლარი. გეგმიური ქირურგიული მომსახურება წლის განმავლობაში 15 ათასი ლარით განისაზღვრება. აღნიშნული მომსახურებით ყველა ის მოქალაქე ისარგებლებს, ვისაც ამ დრომდე არანაირი სახის დაზღვევა არ ჰქონდა. საყოველთაო ჯანდაცვის სახელმწიფო პროგრამას შრომის, ჯანმრთელობისა და სოციალური მომსახურების სააგენტო ახორციელებს. მის მნიშვნელობასა, თუUგამოყენებაზე "სპექტრს" დაზღვევის ზედამხედველობის სამსახურის უფროსი ლაშა ნიკოლაძე ესაუბრა. მან კონკრეტულად განმარტა დაფინანსების სქემა. -"სახელმწიფოს ერთი სამედიცინო სერვისი 15 000 ლარად აქვს ლიმიტირებული. მაგალითად: ადამიანი მოჰყვა ავარიაში და მისი გამოჯანმრთელება 12 000 ლარი დაჯდა. ამ შემთხვევაში პიროვნებას თანხის დამატება არ დასჭირდება. თუUმისი მკურნალობა დაჯდება 16 000 ლარი, მაშინ პაციენტს 1 000 ლარის დამატება მოუწევს. იგივე მოქალაქე თეორიულად მეორე დღეს შეიძლება ისევ მოჰყვეს ავარიაში, ასეთ დროს წინა შემთხვევის ლიმიტი არ გაიანგარიშება. გეგმიურებისგან განსხვავებით, ყველა სიტუაციაზე თავიდან ხდება 15 ათასი ლარის გამოყოფა. გეგმიურ დაფინანსებებზე 15 000 ლარი წლიური ლიმიტია. რა სახის მკურნალობა უნდა დაფინანსდეს 100%-ით და რა 70%-ით _ პირველადი ჯანდაცვის კომისიის მიერ არის განსაზღვრული. დაფინანსებების ჩაშლა წმინდა სამედიცინო საჭიროებების მიხედვით ხდება." მოქალაქეები ხშირად საუბრობენ, რომ სამედიცინო დაზღვევის მიუხედავად, ისინი მკურნალობის დროულად ჩატარებას ვერ ახერხებენ, რადგან დროის დიდი ნაწილი საჭირო დოკუმენტაციის შეგროვებაში ეხარჯებათ. ლაშა ნიკოლაძის თქმით, პირველადი ჯანდაცვის მომსახურებით დაზღვეული პაციენტები ამ პროცედურებს მარტივად გაივლიან. -"28 თებერვალს, როდესაც საყოველთაო ჯანდაცვის პირველი ეტაპი დაიწყო, პაციენტს კლინიკაში მხოლოდ პირადობის მოწმობის წარდგენა ევალებოდა. რაც შეეხება მეორე ეტაპს, რომელიც პირველი ივლისიდან ამოქმედდა, შემდეგი პროცედურების გავლა იქნება საჭირო: რაც ადამიანს დაუდგინდება დიაგნოზი, იმ კონკრეტული კლინიკიდან, სადაც მკურნალობს, უნდა აიღოს მხოლოდ ერთი ფორმა _ ე.წ "ფორმა ასი," რომელსაც მისთვის ხელსაყრელ საყოველთაო ჯანდაცვის ოფისში წარადგენს, იგივე სოციალური მომსახურების სააგენტოში. ამის შემდეგ სააგენტო გასცემს მიმართვას იმ საავადმყოფოზე, სადაც პაციენტმა პროცედურები უნდა ჩაიტაროს. დამატებით არაფერი აღარ არის საჭირო," _ გვითხრა მან. მოქალაქეების იმ ნაწილს კი, რომლებსაც საყოველთაო ჯანდაცვის პროგრამა არ აფინანსებთ, სხვადასხვა სადაზღვევო პაკეტით უწევთ სარგებლობა. მათ შორისაა საპენსიო და სოციალურად დაუცველთა პაკეტები. ლაშა ნიკოლაძის თქმით, ასეთ სიტუაციებში კერძო სადაზღვევო კომპანიებს ინდივიდუალური გადაწყვეტილების მიღების პრეროგატივა აქვთ. -"#165-ე ბრძანებულება, რომლის მიხედვითაც ხორციელდება საპენსიო დაზღვევა, კერძო სადაზღვევო კომპანიებს ეკუთვნის. მათ უფლება აქვთ, რომ ბენეფიციარებისთვის კლინიკა თავად შეარჩიონ. თუმცა ეს კლინიკა არ უნდა იყოს ერთი, ანუ უნდა არსებობდეს ალტერნატიულის შესაძლებლობა. თავისუფალი არჩევანი რეალურად მხოლოდ საყოველთაო ჯანდაცვაშია," _ გვითხრა ლაშა ნიკოლაძემ. ზედამხედველობის სამსახურის უფროსის თქმით,Yსაყოველთაო ჯანდაცვის მესამე ეტაპი რამდენიმე თვეში დაიწყება. საყოველთაო ჯანდაცვასა და სოციალურ დაზღვევებზე 2013 წლის ბიუჯეტიდან ჯამში ხუთას ხუთი მილიონი ლარია გამოყოფილი. ლანა გულოშვილი