მარინა პეტრიაშვილი

შ.პ.ს ჯეოჰოსპიტალსის გურჯაანის სასწრაფო-სამედიცინო დახმარების ცენტრის ერთი ავტომობილი კაჭრეთის ზონას ემსახურება, 2 _ გურჯაანს. თუმცა, მენეჯერის თქმით, არის შემთხვევები როდესაც ერთი მანქანით უწევთ მუშაობა. დაგვიანებული სამედიცინო დახმარების გამო მოსახლეობა ხშირად უკმაყოფილებას გამოთქვამს, თავის მხრივ საზოგადოების უპასუხისმგებლობაზე საუბრობს აღნიშნული სამსახურის ხელმძღვანელი.

ბოლო პერიოდში გაზეთ `სპექტრის~ რედაქციას სასწრაფო-სამედინო მომსახურებით უკმაყოფილო არაერთმა მოქალაქემ მიმართა. მათი თქმით, გამოძახების შემდეგ ბრიგადა დაგვიანებით ან საერთოდ არ მიდის. რამდენიმე დღის წინ, სოფელ ველისციხეში მცხოვრებ ნათელა დევდარიძეს, რომელსაც მაღალი წნევა და ჰაერის უკმარისობა ჰქონდა, სასწრაფო დახმარების გამოძახება დასჭირდა. თუმცა ოპერატორმა უპასუხა, რომ სულ ორი მანქანა ჰქონდათ, აქედან ერთი გაფუჭებული იყო, ხოლო მეორე სოფელ კარდენახში იმყოფებოდა გამოძახებაზე. ამიტომ ურჩია, უბნის ექიმისთვის მიემართა. "ძალიან ცუდად ვიყავი, ლამის გონება დავკარგე. ჩემმა მეუღლემ სასწრაფოში დარეკა და უთხრეს, რომ მხოლოდ ერთი მანქან მუშაობდა და ისიც კარდენახში იყო გამოძახებაზე. უთხრეს ამბულატორიის ექიმი მოეყვანა. ალბათ იცით, რომ ეს მომსახურება ფასიანია, სასწრაფოს გამოძახება კი _ უფასო. ექიმის ფული ნამდვილად არ მქონდა. მოგვიანებით ჩემი დისშვილი დაელაპარაკათ და კატეგორიულად მოსთხოვა, ჩემს დასახმარებლად მოსულიყვნენ. ამის შემდეგ თავად დაგვირეკეს და რამდენიმე ხნის შემდეგ მოვიდნენ კიდეც. პირველადი დახმარება აღმომიჩინეს და წასვლის წინ ისევ გამიმეორეს, რომ სხვა დროს მათთვის კი არა, უბნის ექიმისთვის მიგვემართა,"_ გვითხრა ნათელა დევდარიძემ.

როგორც `სპექტრმა~ გაარკვია სასწრაფო-სამედიცინო სამსახურის დაქვემდებარებაში სულ 5 მანქანაა, აქედან ერთი კაჭრეთის ზონას ემსახურება, 2 მწყობრიდან არის გამოსული და ორიც მუშა მდგომარეობაში. თუმცა შ.პ.ს ჯეოჰოსპიტალსის გურჯაანის სასწრაფო-სამედიცინო დახმარების ცენტრის მენეჯერის მანანა ბერიკაშვილის თქმით, ხშირია შემთხვევები, როდესაც ერთი მანქანით უწევთ მომსახურების გაწევა. "ჩვენ სამი ბრიგადა გვყავს, რომელიც დღე-ღამის განმავლობაში მორიგეობს. 2 _ გურჯაანში და ერთი კაჭრეთის ზონაში. ჩვენი ავტომობილები, მართალია ძველი არ არის, მაგრამ 24-საათიანი გრაფიკით დატვირთული მუშაობის გამო ხშირად ფუჭდება. ამის შესახებ სათანადო ორგანოებს ბევრჯერ მივმართეთ, მაგრამ ტრანსპორტი ძვირია და მისი ყიდვა უჭირთ. ეხლა ჯეოჰოსპიტალსი გვპირდება ახალი მანქანების შეძენას და ალბათ პრობლემა მოკლე დროში მოგვარდება," _ გვითხრა მანანა ბერიკაშვილმა და იქვე აღნიშნა, რომ ხშირ შემთხვევაში ისეთ გამოძახებაზეც უწევთ წასვლა, როცა სასწრაფო გადაუდებელი დახმარება სულაც არ არის საჭირო. "თუ გავითვალისწინებთ იმ ფაქტს, რომ სასწრაფო უფასოა, რაიონში პირველადი ჯანდაცვა მთლიანად ჩვენზე მოდის და შესაბამისად ბევრი გამოძახება გვაქვს. ამ პირობებში მუშაობა ძალიან გვიჭირს. ყველა გამოძახება იმით კი არ არის გამოწვეული, რომ აუცილებლად გადაუდებელი დახმარება სჭირდებათ, ქრონიკული ავადმყოფებიც კი ჩვენთან რეკავენ, რადგან უბნის ექიმთან მისვლა ეზარებათ. გამოძახებაზე შუაღამისას მისულებს ასეთი სიტუაციაც დაგვხვედრია: პაციენტს თერმომეტრი არ აქვს და სიცხეს გრძნობს, ან წნევის აპარატი არ აქვს და წნევა უნდა რომ დაიკონტროლოს. ამ დროს ისინი არ ფიქრობენ, რომ შეიძლება მათზე უფრო მძიმე ავადმყოფი სასწრაფო დახმარების გარეშე რჩება," _ განმარტა მანანა ბერიკაშვილმა.

მისივე თქმით, სოფლებში მაცხოვრებელ მოსახლეობას აქვს იმის საშუალება რომ ამბულატორიის ექიმს მიმართონ და ასეთ შემთხვევებში სასწრაფო აღარ გამოიძახონ. "საერთოდ განვითარებულ ქვეყნებში სასწრაფო მხოლოდ კატარტროფებს და ქუჩის შემთხვევებს ემსახურება. ოჯახში როცა ავადმყოფია, იქ შეიძლება სოფლის ექიმიც მივიდეს და პირველადი დახმარება აღმოუჩინოს. ამისათვის მას ყველა პირობა გააჩნია, აქვს პირველადი გადაუდებელი დახმარების მედიკამენტების ჩანთა, იგივე, რაც ჩვენ. სანამ სასწრაფო დახმარების მანქანა გურჯაანიდან ვთქვათ კარდენახამდე გადავა, იქ შეუძლიათ სოფლის ექიმი მიიყვანონ და ის ყველანაირ დახმარებას აღმოუჩენს. თანაც ამას ერთი დადებითი მხარეც აქვს, მათმა ექიმმა უფრო უკეთ იცის რა აწუხებს თავის პაციენტს და მალევე გაერკვევა სიტუაციაში. ხშირად არის შემთხვევები, როდესაც უბნის ექიმს მიმართავენ, მაგრამ ის თვითონ ეუბნება სასწრაფო გამოიძახეთ, მე ვერ მოვალო," _ გვითხრა შ.პ.ს ჯეოჰოსპიტალსის გურჯაანის სასწრაფო-სამედიცინო დახმარების ცენტრის მენეჯერმა მანანა ბერიკაშვილმა.

მან იმაზეც გაამახვილა ყურადღება, რომ სასწრაფო-სამედიცინო სამსახურის მედპერსონალი მიზერულ ხელფასს იღებს, მაშინ როცა სრული დატვირთვით მუშაობს. "ხელფასი ძალიან დაბალი აქვთ. ექიმის ანაზღაურება 350 ლარს შეადგენს, ექთანი 240 ლარს იღებს, მძღოლი კი _ 200 ლარს. ოცდაოთხსაათიან რეჟიმში გვიწევს მუშაობა, მარტო გასულ ღამეს 31 გამოძახება გვქონდა, აქედან 11 ჰოსპიტალიზაცია," _ აღნიშნა მან. მოსახლეობის თქმით, სასწრაფო-სამედიცინო მომსახურებასთან დაკავშირებით პრობლემები ყოველთვის არსებობდა, არადა ისინი ვალდებული არიან საჭიროების შემთხვევაში მათ დროული და სათანადო დახმარება გაუწიონ.