დაავადების კონტროლის ეროვნული ცენტრის (NCDC) მონაცემებით, ამ ვირუსული ინფექციით მხოლოდ წელს უკვე 3 000-მდე ადამიანი დაავადდა, წითელა კი 100%-ით გადამდებია. მედიკოსების განცხადებით, საქართველოში წითელას ეპიდემიის საფრთხე რეალურია. წითელას საწინააღმდეგო ვაქცინაციის კამპანია: „აცერი და დაიცავი“ ფართო მასშტაბით დაიწყო. ცენტრი მოუწოდებს მოქალაქეებს სასწრაფოდ ჩაიტარონ წითელას საწინააღმდეგო აცრა. ჯეოჰოსპიტალსის გურჯაანის სამედიცინო ცენტრის პედიატრი ნაირა სეხნიაშვილი სპექტრთან აცხადებს, რომ შემოდგომის სეზონზე, მის უბანზე (ქალაქ გურჯაანის პირველი პედიატრიული უბანი) წითელას არცერთი შემთხვევა არ დაფიქსირებულა. თუმცა აქვე განმარტავს, რომ მოქალაქეები არასწორ ინფორმაციას ფლობენ იმის შესახებ, თითქოს წითელა არის ე.წ. სახადი, რომელიც აღარ განმეორდება: „სახადი კი არის მაგრამ, ეს იმას არ ნიშნავს, რომ მოიხდი და მორჩა. იმდენი გართულებები აქვს ცენტრალური ნერვული სისტემის, მხედველობის, გულისა და საშარდე სისტემის თვალსაზრისით, რომ პრევენცია ყველაფერს სჯობია. აცრის შემდეგ, დაავადების რისკი დაბალია, მაგრამ თუ მაინც შეგხვდათ მსუბუქ ფორმებში ჩაივლის“. პედიატრის ინფორმაციით, კალენდარულ გეგმაში ბავშვი უნდა აიცრას 1 წლის და 5 წლის ასაკში. „ეს არის გეგმიური აცრები, მარამ რადგან შარშან იყო მოზარდების დაავადების შემთხვევებიც, ამიტომაც დაავადებათა კონტროლის ეროვნულმა ცენტრმა მიიღო გადაწყვეტილება, რომ მოხდეს მოსახლეობის მასიური აცრა“. აცრებს სახელმწიფო აფინანსებს. ვაქცინა ჯანმრთელობის მსოფლიო ორგანიზაციის მიერაა პრეკვალიფიცირებული. დაავადების კონტროლის ცენტრში განმარტავენ, რომ 90-იან წლებში დაავადებულთა უმრავლესობას პროფილაქტიკური აცრა არ ჩატარებია, რადგან მოშლილი იყო სამედიცინო სისტემა, შესაბამისად, ეს ადამიანები ადვილად ავადდებიან და ამ ვირუსს ავრცელებენ. „2008 წელს სახელმწიფომ დაიწყო კამპანია ამ ადამიანების ასაცრელად, თუმცა მხოლოდ 15% აიცრა. ამის მიზეზი მასმედიის მხრიდან გავრცელებული არასწორი ინფორმაცია იყო, რამაც მოსახლეობა აცრების მიმართ უარყოფითად განაწყო", - განაცხადა გადამდებ დაავადებათა დეპარტამენტის უფროსმა ხათუნა ზახაშვილმა. წითელა მწვავე ვირუსული დაავადებაა, გადაიცემა ჰაერ-წვეთოვანი გზით, ხასიათდება ცხელებით, ინტოქსიკაციით, სასუნთქი გზების კატარითა და ლაქოვან – პაპულოზური გამონაყრით. ინფექციის წყაროა ავადმყოფი, რომელიც განსაკუთრებით საშიშია დაავადების ადრეულ, კატარალურ პერიოდში. ინფექციის გადაცემა ხდება ჰაერ – წვეთოვანი გზით. ერთეული (სპორადული) შემთხვევების გარდა, შესაძლებელია დაავადების აფეთქება. წითელათი უხშირესად ავადდებიან ბავშვები; მოზრდილებს დაავადება იშვიათად აღენიშნება. ინკუბაციური პერიოდი 9 – 11 დღეა. ტემპერატურა მატულობს 38,5 – 39 გრადუსამდე, ვითარდება სინათლის შიში, კონიუნქტივიტი, სურდო, მშრალი მყეფავი ხველა; ავადმყოფის სახე ჰიპერემიულია. ლოყის ლორწოვან გარსზე, განსაკუთრებით კარიესული კბილების პირდაპირ, წვრილი, მოთეთრო, ზედაპირიდან ამოწეული წერტილების გაჩენა; ლორწოვანის აღნიშნული ცვლილება მოგვაგონებს მასზე ქინძისთავის მრავლობით ნაჩხვლეტებს. აღნიშნული სიმპტომი წარმოადგენს დიაგნოზის აბსოლიტურად ზუსტ მტკიცებულებას. კატარალური პერიოდის მე – 3 დღიდან მაგარ სასაზე ვითარდება ჰიპერემია და გაფაშრება. თავდაპირველად გამონაყარი ვრცელდება სახის კანზე და ყურების უკან, მე – 2 დღეს გამონაყარი ვრცელდება სხეულის ზედაპირზე და ზედა კიდურების უბნებზე; მე – 3 დღიდან გამონაყარი ვლინდება ქვედა კიდურებზეც. გამონაყარი შედგება 3 – 4 სმ დიამეტრის, მუქი ვარდისფერი, ზედაპირიდან ამოწეული მრგვალი ლაქებისგან, ადგილ – ადგილ გამონაყარი შეიძლება გახდეს შერწყმისადმი მიდრეკილი, თუმცა მაინც ინარჩუნებს თავის ლაქოვან – პაპულოზურ ხასიათს. განლეულ, დასუსტებულ დისტროფიკ ბავშვებში, გამონაყარმა შეიძლება მიიღოს მოლურჯო ელფერი. თერაპიის სპეციფიკური მეთოდები შემუშავებული არ არის; ძირითადია წოლითი რეჟიმი, ჰიგიენის დაცვა, სიმპტომატური საშუალებები. ბაქტერიული წარმოშობის გართულებების დროს - ანტიბიოტიკები. პნევმონიის, კრუპის, ნეცეფალიტის მკურნალობა ტარდება ზოგადი პრინციპებით. ავადმყოფთა ჰოსპიტალიზაცია ხორციელდება კლინიკური და ეპიდემიოლოგიური ჩვენების მიხედვით. სიკვდილის შემთხვევები წითელას დროს ძალზე იშვიათია და აღინიშნება ძირითადად წითელასმიერი ენცეფალიტის დროს. ბავშვებში აქტიური იმუნიზაცია ტარდება; წითელათი დაავადებულის იზოლირება საჭიროა არანაკლებ 5 დღით, გამონაყარის გაჩენიდან; დეზინფექცია საჭირო არ არის. http://youtu.be/0Onfm2czqhc