ქალაქ სიღნაღში, შშმ პირთა მშობელთა კავშირის ბაზაზე რეაბილიტაცია აბილიტაციის ცენტრი 19 ივნისიდან ფუნქციონირებს. როგორც, შშმ პირთა მშობელთა კავშირის დამფუძნებელი და აღნიშნული ცენტრის ერთ-ერთი ხელმძღვანელი ნიკა ჯავაშვილი Speqtri.ge-სთან ამბობს, ორგანიზაცია 6-დან 18 წლამდე ბენეფიციარებს უფასოდ ემსახურება.

„19 ივნისს, სიღნაღში შშმ პირთა მშობელთა კავშირის ბაზაზე გაიხსნა სარეაბილიტაციო ცენტრი. რეაბილიტაცია/აბილიტაციის ცენტრი ემსახურება 6-დან 18 წლამდე შშმ პირებს, რომელსაც აფინანსებს ჯანდაცვის სამინისტრო. მინდა აღვნიშნო, რომ ჩვენთან მომსახურების მიღება ასევე შეუძლიათ 0-დან 3-წლამდე ბავშვებსაც. ფორმა ასი თუ აქვს ბავშვს და გამოხატულია რაიმე სახის დარღვევა, მათთვის არ არის საჭირო შშმ პირის სტატუსი. ოღონდ ნოზოლოგიურად უნდა ჰქონდეს კოდი, რომელიც ითვალისწინებს რეაბილიტაცია/აბილიტაციის პროგრამაში ჩართვას,“-ამბობს ნიკა ჯავაშვილი.

მისივე თქმით, გარდა არასრულწლოვნებისა, ცენტრი ზრდასრულებს და მოზარდ კერძო პაციენტებსაც მოემსახურებას.

„გვაქვს კერძო პაციენტების მიღების უფლებაც, ეს ეხება 18 წელს ზემოთ ადამიანებს, რომელსაც სახელმწიფო არ აფინანსებს. ზრდასრული ბენეფიციარი და ასევე 6-18 წლამდე მოზარდი, რომელსაც პირობითად აქვს ხერხემლის გამრუდება, მაგრამ შშმ პირის სტატუსი არ აქვს, თანხას იხდის თავად, ან მიაქვს კალკულაცია და შეიძლება მერიამ დაუფინანსოს.“

ნიკა ჯავაშვილის თქით, შშმ პირთა რაოდენობა შეზღუდული არ არის და ამ ეტაპზე ცენტრს 16 ბენეფიციარი ჰყავთ.

„19 ივნსს ჩატარდა პირველი სეანსი და ორკვირიანი შესვენების შემდეგ 17ივლისს მეორე სეანსს ვიწყებთ. ჯერჯერობით გვყვავს 16 ბენეფიციარი, რომელიც იღებს რეაბილიტაციის სერვისს. ბენეფიციარების რაოდენობა არ არის შეზღუდული. რაც მეტ ბავშვს დავეხმარებით უკეთესია. სეანსებს შორის არ უნდა იყოს 2 კვირაზე მეტი ჩაგდება. თუ მოთხოვნა გაიზრდება გადავალთ სრულ თვეზე და ყველა ბავშვი საჭიროებისამებრ მიიღებს სერვისს. გვაქვს სურვილი რომ გავიზარდოთ და უფრო მეტ ბავშვს ჰქონდეს წვდომა რეაბილიტაციის სერვისზე,“-ამბობს ნიკა ჯავაშვილი.

ცენტრს ემსახურება 2 ფიზიოთერაპევტი, ფსიქოლოგი, ლოგოპედი და ნევროპათოლოგი.


აღნიშნულ ცენტრში ხელმისაწვდომია შემდეგი სერვისები:
• ექიმის მეთვალყურეობა;
• ფიზიკური თერაპია ;
• ოკუპაციური თერაპია;
• ენის და მეტყველების თერაპია;
• ფსიქოლოგის მომსახურება;
• საჭიროების შემთხვევაში მშობლის ფსიქოლოგიური მხარდაჭერა და ტრენინგი.
• ზდასრულთა რეაბილიტაცია:
• ფიზიკური თერაპია(მასაჟი)
• ელექტროფორეზი,
• ულტრაბგერითი თერაპია;
• ფონოფორეზი;
• ელექტროთერაპია;
• სთოუნ მასაჟი;
• აპარატული მასაჟი;