18-დან 50 წლამდე ასაკის მოქალაქეებისთვის თავდაცვის სამინისტრომ რეზერვის პროგრამაზე მიღება გამოაცხადა, - ამის შესახებ საქართველოს ეროვნული გვარდიის მეთაურმა, პოლკოვნიკმა რომან ჯოხაძემ განაცხადა.

მისი თქმით, აქტიური რეზერვი წარმოადგენს სამხედრო ვალდებულების მოხდის ნებაყოფლობით ფორმას, რომელიც საშუალებას მისცემს მოქალაქეებს, თავდაცვის ძალების სამხედრო მოსამსახურეების მხარდამხარ, აქტიურად ჩაერთონ ქვეყნის თავდაცვაში.
„მოცემულ ეტაპზე, აქტიურ რეზერვში მიიღებიან ქალაქ თბილისის, ქალაქ მცხეთის, აჭარის, გურიის, სამეგრელო-ზემო სვანეთის და კახეთის რეგიონში მცხოვრები 18 დან 50 წლამდე ასაკის მოქალაქეები. აქტიურ რეზერვში მიღება ნებაყოფლობითი და ანაზღაურებადია. რეზერვისტთან ფორმდება 5 წლიანი კონტრაქტი და მას უნარჩუნდება სამოქალაქო სამსახური. საბრძოლო მომზადება, თითოეული წლის განმავლობაში, გახლავთ არაუმეტეს 45 დღე. რეზერვისტის მინიმალური წლიური ანაზღაურება 2700 ლარია. მნიშვნელოვანია, რომ 18 და 22 წლის ჩათვლით სტუდენტებს, სარეზერვო სამსახურის ერთი კონტრაქტის ვადის გასვლის შემდეგ, სავალდებულო სამხედრო სამსახური მოხდილად ჩაეთვლებათ. სარეზერვო სამსახურის გავლის სრული ციკლი კი მოიცავს შემდეგ საფეხურებს: 1. რეკრუტირების ფაზა; 2. შერჩევის ფაზა; 3. სარეზერვო სამსახურის გავლა; 4. კონტრაქტის გაგრძელება. სამხედრო სარეზერვო სამსახურში ჩარიცხულ პირს გააჩნია შემდეგი სოციალური დაცვის გარანტიები: რეზერვისტი სარგებლობს სამხედრო მოსამსახურისათვის საქართველოს კანონმდებლობით დადგენილი სოციალური გარანტიებით; შრომის სტაჟად ეთვლება − კონტრაქტით განსაზღვრული პერიოდი; სამხედრო სამსახურის წელთა ნამსახურობაში ეთვლება, გამოძახების შემდეგ, შესაბამის სამხედრო ქვედანაყოფში ყოფნის პერიოდი; სამხედრო სარეზერვო სამსახურში გამოძახების პერიოდში უნარჩუნდება სამუშაო ადგილი და შრომის ანაზღაურება; უნარჩუნდება სახელმწიფო კომპენსაცია/სახელმწიფო აკადემიური სტიპენდია, აგრეთვე კანონმდებლობით დადგენილი სხვა სოციალური დაცვის გარანტიები. საბუთები მიიღება ყოველ სამუშაო დღეს 10:00 საათიდან 16:00 საათამდე, შემდეგ მისამართებზე ქ. თბილისში, ქ. თელავში, ქ. ბათუმში, და ქ. სენაკში“, - განაცხადა მან.

მისივე თქმით, ონლაინ რეგისტრაცია შესაძლებელია მისამართზე onlinebct.mod.gov.ge. დამატებითი ინფორმაციისთვის მსურველები უნდა ეწვიონ თავდაცვის სამინისტროს ოფიციალურ ვებ-გვერდს mod.gov.ge.