საქართველოს პრემიერ-მინისტრმა გიორგი კვირიკაშვილმა მუნიციპალურ ტენდერებთან დაკავშირებით გამგებლებს და კომპანიის ხელმძღვანელებს გაფრთხილება მისცა.

როგორც მან მთავრობის სხდომაზე განაცხადა,გამოვლინდა რამდენიმე შემთხვევა, რა დროსაც კომპანიებმა სახელმწიფოს მიერ გამოყოფილი ფულით განხორციელებული ტენდერის დროს, დასაქმებულ ადამიანებს ხელფასი დროულად არ გადაუხადეს.
კვირიკაშვილმა მსგავს ფაქტებზე მკაცრი რეაგირება რეგიონული განვითარებისა და ინფრასტრუქტურის მინისტრ ზურაბ ალავიძეს და სამართალდამცავ სტრუქტურებს დაავალა.


„ბოლო პერიოდში რამდენიმე, საკმაოდ უარყოფითი პრეცედენტი დაფიქსირდა. განსაკუთრებით ეს ეხება მუნიციპალური ტენდერების შემთხვევებს, როცა სახელმწიფო ფულით კომპანიები ახორციელებენ ტენდერებს და უგვიანებენ ხელფასებს თანამშრომლებს. ეს არის აბსოლუტურად მიუღებელი პრაქტიკა. მინდა ვთხოვო რეგიონული განვითარებისა და ინფრასტრუქტურის მინისტრს, რომ ყველა მუნიციპალიტეტში განხორციელდეს კონტროლი ამ თვალსაზრისით. თუკი სადმე არის ამგვარი პრაქტიკა, რეაგირება იყოს უმკაცრესი. სახელმწიფო ფულით კომპანია ახორციელებდეს პროექტს და სამი თვის განმავლობაში ხელფასს არ უხდიდეს თანამშრომლებს, ეს არის აბსოლუტურად გაუგონარი უპასუხისმგებლობა და თუ სადმე ამგვარი პრეცედენტები დაფიქსირდება, იყოს უმკაცრესი რეაგირება - როგორც ამ კომპანიების შავ სიაში შეყვანასთან დაკავშირებით, ასევე მინდა სამართალდამცველებსაც ვთხოვო, რომ ამ მიმართულებით რეაგირება იყოს უმკაცრესი.ჩვენმა მოქალაქეებმა, რომლებიც სახელმწიფო დაფინანსებით განხორციელებულ პროექტებში მონაწილეობენ, დროულად უნდა მიიღონ ხელფასები. ეს არის ელემენტარული რამ. იმ მუნიციპალიტეტების ხელმძღვანელებს, გამგებლებს, რომლებიც ამ პროექტს ახორციელებენ, დაეკისრებათ უმკაცრესი პასუხისმგებლობა, თუკი ასეთი პრეცედენტები მათ რაიონებში დაფიქსირდება. მინდა გავაფრთხილო ძალიან მკაცრად ყველა", - განაცხადა პრემიერმა.