უკვე რამდენიმე წელია გურჯაანში რკინიგზის გადასასვლელი ხიდი, რომლითაც მოსახლეობა სარგებლობდა, ავარიულ მდგომარეობაშია.
ადგილობრივები მოსალოდნელ საფრთხეებზე საუბრობენ და აცხადებენ, რომ თუკი მისი დემონტაჟი დროულად არ მოხდება, შესაძლოა, ჩამოინგრეს და შემთხვევა ფატალურად დასრულდეს.

„ამ ტერიტორიაზე გავლა ხშრად მიწევს. ხიდი ავარიულ მდგომარეობაშია და მისი დემონტაჟია საჭირო. აქ გამაფრთხილებელი ნიშანიც დგას და ვიცით, რომ სარგებლობა დაუშვებელია, თუმცა რამდენჯერმე შევნიშნე, რომ მოზარდები იყვნენ მაღლა ასულები და ლუდს მიირთმევდნენ. ხომ შეიძლება ჩამოინგრას და რამე უბედურება დატრიალდეს. ბევრჯერ დამინახავს, რომ ცემენტი ცვივა, რით ვერ აღირსეს დანგრევა.“

მის აზრს იზიარებს გურჯაანში მცხოვრები გიორგი ბეიტრიშვილი.

„ხიდი პრობლემურია და მასზე გავლა არ შეიძლება. ამ ტერიტორიაზე ხალხი ხშირად მოძრაობს და აუცილებლად უნდა მოშალონ. დროულ მიხედვას საჭიროებს რომ არ ჩამოინგრას და ვინმეს არ დაეცეს.“

გურჯაანის მუნიციპალიტეტის გამგეობაში კი ამბობენ, რომ აღნიშნული გადასასვლელი საქართველოს რკინიგზის ბალანსზეა.

„მოვლა-პატრონობაზე რკინიგზის დეპარტამენტია პასუხისმგებელი. გამგეობა ვერც მის დემონტაჟს მოახდენს და ვერც რეაბილიტაციას. რამდენიმე წლის წინ რკინიგზაში გავგზავნეთ წერილი, აღწერილი იყო, თუ რა მდგომარეობაშია ხიდი. ერთადერთი რეაგირება მათი მხრიდან ის იყო, რომ გადასასვლელის ორივე მხარე ჩაკეტეს, დღეს იქ მოძრაობა აკრძალულია. უახლოეს მომავალში კიდევ ვაპირებთ ანალოგიური წერილის გაგზავნას, ვნახოთ რა რეაგირება იქნება.“

Speqtri.ge საქართველოს რკინიგზას დაუკავშირდა.

„ამ გადასასვლელზე მოძრაობა 2005-2006 წელს აიკრძალა, რადგან დაზიანებული იყო და გადაადგილება უკვე აღარ შეიძლებოდა, თუმცა მოსახლეობა მაინც სარგებლობდა, რაც სახიფათო იყო. შემდეგში უკვე გადაიკეტა. ხიდი დროთა განმავლობაში დაზიანდა და შეიძლება ბეტონი, ან ნარჩენი ცვიოდეს იქიდან. დემონტაჟი რომ საჭიროა, ამას ჩვენც ვამბობთ,.“

მისივე ინფორმაციით, ხიდის დემონტაჟი 2017 წლის გეგმაში არ ზის, სამუშაოები 2018 წელს განხორციელდება.