გურჯაანის კულტურის ცენტრის დირექტორის მოვალეობის შემსრულებლის პაატა ძულიაშვილის გადაწყვეტილებით, 40 თანამშრომელს, რომლებიც გათავისუფლებას აპროტესტებდნენ, ხელშეკრულება ერთი თვით გაუგრძელდა.
პაატა ძულიაშვილის განმარტებით, თანამშრომლების ნაწილმა მისი ნათქვამი არასწორად გაიგო და დაპირისპირებაც ამას მოჰყვა.

-„ამ 40 ადამიანის ხელშეკრულებას ვადა 31 დეკემბერს გაუვიდა. მე მათ ვუთხარი, რომ ხელშეკრულება ეტაპობრივად აღუდგებოდათ. უბრალოდ, ერთი დღით მჭირდებოდა 19 თანამშრომელი, ტექნიკური პერსონალი, რადგან ღონისძიება უნდა ჩატარებულიყო. ხმაური გამოიწვიეს მათ, რომლებმაც კარგად არ მომისმინეს და ეგონათ, რომ ქუჩაში ვუშვებდი. ჩემგან გამოიყვანეს რაღაც მონსტრი. 57 ხელშეკრულებას ერთ წუთში ხომ ვერ ამოვბეჭდავდი?! მე, დირექტორის მოვალეობის შემსრულებელმა, გადავწყვიტე, მათთვის ერთთვიანი ხელშეკრულებები დამედო. სამუშაო პროცესი ჩვეულებრივ გრძელდება.“- აღნიშნა speqtri.ge-სთან პაატა ძულიაშვილმა.

კულტურის ცენტრის დირექტორი ეთერ ლოლაძე ამბობს, რომ გადაწყვეტილება პაატა ძულიაშვილმა დამოუკიდებლად მიიღო, რისი იურიდიული უფლებაც ჰქონდა.

-„მე შვებულებაში ვარ გასული, პაატა ძულიაშვილს უფლება აქვს დანიშნოს და გაათავისუფლოს, ეს მისი კომპეტენციაა. განვითარებულ მოვლენებზე მე ვერაფერს გეტყვით, ამაზე პასუხისმგებელი მოვალეობის შემსრულებელია.“

მეთოდისტი ციცო ლაზაშვილი ერთ-ერთია იმ 40 თანამშრომლიდან, რომელსაც ხელშეკრულება ერთი თვით გაუგრძელდა.

-„დაგვიბარა კაბინეტში დირექტორის მოვალეობის შემსრულებელმა და ამოკითხა იმ ადამიანების სახელები და გვარები, ვინც სამსახურში უნდა დარჩენილიყო. მესმის, რომ მთლიანად საქართველოში მიმდინარეობს რეორგანიზაცია. მარტო ჩვენ ხომ ვერ ვიქნებით გამონაკლისი, მაგრამ კულტურის ცენტრის ხელოვან ხალხს გარეთ რომ ტოვებ, დიდი სირცხვილია. მაშინ, როდესაც, ანსამბლ „ხარებას“ სამსახურიდან გაუშვებ, ჩემზე რა უნდა ვთქვა?! ეს იყო ძალიან დიდი შეცდომა, ვიღაცამ ყველაფერი ცუდად გათვალა. თავიდანვე, როდესაც გათავისუფლების შესახებ გავიგეთ, დარწმუნებული ვიყავი, რომ სიას გადახედავდნენ. რატომ შედგა ეს სია , ვერ გვცემენ სწორ პასუხს. აუცილებელი იყო პრესისა და ტელევიზიის ჩართვა, რომ ყველაფერი სასიკეთოდ გადაწყვეტილიყო?! მაშინ, დავებარებინეთ ეთერ ლოლაძეს, სანამ შვებულებაში წავიდოდა და ეთქვა, რომ ჯერ ვინც სპექტაკლში მონაწილეობდა, მათ გაუგრძელდებოდათ ხელშეკრულება და მერე ჩვენ. ადამიანი ასე შეურაცხყოფილი არ უნდა დატოვო. ჩვენთვის ხელშეკრულების გაგრძელებაზე ჟურნალისტებმა დიდი გავლენა იქონიეს. ვანო ბერიძიშვილსა და გურჯაანის მაჟორიტარ დეპუტატს აბრალებდნენ რომ გათავისუფლების ინიციატორები ისინი იყვნენ. შევხვდით მათ და გგვითხრეს, რომ ამის შესახებ საქმის კურსში არ იყვნენ. ვფიქრობ, ეს კარგი გაკვეთილი იყო, მათთვის, ვინც ხელოვანი ხალხი ვერ დააფასა. “

კულტურის ცენტრის თანამშრომლების თქმით, გაურკვეველია, რა პრინციპით შეირჩა დირექტორის მოვალეობის შემსრულებლად პაატა ძულიაშვილი (ღონისძიებების მენეჯერი) მაშინ, როცა ამ პოზიციაზე რეალური კანდიდატურა იყო სამხატვრო ხელმძღვანელი.
გურჯაანის მუნიციპალიტეტის გამგეობაში განმარტავენ, რომ თანამშრომლების გათავისუფლებასა და დანიშვნაზე ისინი გადაწყვეტილებას არ იღებენ.

-„იქიდან გამომდინარე, რომ ეთერ ლოლაძე გავიდა შვებულებაში, მოვალეობა დაეკისრა გამგებლის მიერ შერჩეულ ნდობით აღჭურვილ პირს, ამ შემთხვევაში პაატა ძულიაშვილს. წესდებაში არ წერია ის, რომ მოვალეობა აუცილებლად სამხატვრო ხელმძღვანელს უნდა დაეკისროს.“- აღნიშნა გამგეობის პრესასთან და საზოგადოებასთან ურთიერთიბის განყოფილების უფროსმა ზვიად ბიაშვილმა,

მისივე ინფორმაციით, მომავალ კვირას გურჯაანის მუნიციპალიტეტის საკრებულო ა.ა.ი.პ კულტურის ცენტრის რეორგანიზაციის სახითხებზე იმსჯელებს. ამის შემდეგ გადაწყდება, ვინ დარჩება და ვინ დატოვებს პოსტებს.