ლევანიმ და მარიმ რამდენიმეწლიანი სიყვარულის ისტორია გასულ წელს ქორწილით დააგვირგვინეს. ახლა უკვე სამნი არიან, ახალგაზრდა წყვილი და ორი თვის დაჩი.
ლევანი და მარი კერძო კომპანიებში მუშაობენ. ბავშვის გაზრდაზე ორივე ზრუნავს, თუმცა ამ პროცესში დედა უფრო მეტადაა ჩართული.
ორივე თანხმდება იმაზე, რომ პრიორიტეტი ბავშვია და არა მშობლების სამსახური. მარი ამბობს, რომ როდესაც დედას მაღალანაზრაურებადი სამსახური აქვს და კარიერული ზრდის შესაძლებლობაც უფრო მეტია, ქმარს უფლება უნდა ჰქონდეს დეკრეტული შვებულებით ისარგებლოს, ცხადია, იმ შემთხვევაში თუ ამაზე წყვილი ერთობლივად შეთანხმდება.

ლევანის აზრით, პირველ ეტაპზე, უმჯობესია ბავშვს დედამ მიხედოს, ხოლო თუ აუცილებლობა მოითხოვს, კარგი იქნება თუ დეკრეტული შვებულებით სარგებლობის შესაძლებლობა მამებსაც მიეცემათ.
აღნიშნულ საკითხთან დაკავშირებით, არასამთავრობო ორგანიზაცია „ადამიანის უფლებების სწავლებისა და მონიტორინგის ცენტრმა“ საქართველოს საკონსტიტუციო სასამართლოს სარჩელით მიმართა. ორგანიზაცია ბიოლოგიური მამებისათვის ბავშვის მოვლის გამო შვებულების და მისი კანონმდებლობით გათვალისწინებული ნაწილის ანაზღაურების უფლების არარსებობის არაკონსტიტუციურად ცნობას ითხოვს.
არასამთავრობო ორგანიზაციაში განმარტავენ, რომ მოქმედი კანონმდებლობით, შვებულების უფლების მქონე დასაქმებულში მოიაზრება მხოლოდ ქალი და ამ უფლებით ვერ სარგებლობენ ბავშვის ბიოლოგიური მამები.

„ბავშვის მოვლის გამო შვებულების ანაზღაურების საკითხი განისაზღვრება საქართველოს შრომის, ჯანმრთელობისა და სოციალური დაცვის მინისტრის ბრძანებით, რომელიც პირდაპირ ადგენს, რომ შვებულების ანაზღაურების საფუძველს წარმოადგენს საავადმყოფო ფურცელი, რომელიც გაიცემა მხოლოდ ქალზე. ამავე ბრძანებით, საავადმყოფო ფურცელი ბავშვის მამის მიმართ მხოლოდ ქალის გარდაცვალების შემთხვევაში გაიცემა. შესაბამისად, დასახელებული ბრძანება პირდაპირ გამორიცხავს კაცებს ახალშობილის მოვლის გამო შვებულების ანაზღაურების უფლების მქონე პირებისაგან.“- აღნიშნულია არასამთავრობო ორგანიზაციის სარჩელში.

ამავე დოკუმენტში „ადამიანის უფლებების სწავლებისა და მონიტორინგის ცენტრი ამტკიცებს, რომ ამგვარი რეგულაცია წარმოადგენს დისკრიმინაციულ მიდგომას. მათი აზრით, ბავშვის მოვლა არის თანაბარი უფლება და იმავდროულად პასუხისმგებლობა ორივე მშობლისთვის.
მოსარჩელე მხარის აზრით, ბავშვის მოვლის გამო შვებულებისა და მისი ანაზღაურების უფლების შეზღუდვა კაცებისთვის იწვევს მათი შრომის უფლების შეზღუდვას. მოქმედი კანონმდებლობა მეუღლეებს არ ანიჭებს შესაძლებლობას, საკუთარი შეთანხმებითა და სურვილის შესაბამისად იზრუნონ საკუთარ შვილზე და გაიზიარონ ეს პასუხისმგელობა.

მათივე შეხედულებით, აღნიშნული საკანონმდებლო მოცემულობა განამტკიცებს საზოგადოებაში დამკვიდრებულ დისკრიმინაციულ, უთანასწორო და პატრიარქალურ შეხედულებებს ქალის წინასწარ განსაზღვრულ როლთან და ფუნქციასთან დაკავშირებით, რაც შვილებზე ზრუნვის ვალდებულებაში გამოიხატება.

ცნობისთვის, პირველი ქვეყანა, რომელმაც მამებს დეკრეტული შვებულების გამოყენების საშუალება ჯერ კიდევ გასული საუკუნის 90-იან წლებში მისცა, ნორვეგია იყო. მოგვიანებით, იგივე კანონი დიდმა ბრიტანეთმაც მიიღო.