გურჯაანის "გლეხური ბაზრის“ ხორცით მოვაჭრეებს შემოსავლების სამსახურის თანამშრომლებმა სალარო აპარატების დადგმა მოსთხოვეს და ვადაც მისცეს.

აღნიშნულ სიტუაციას speqtri.ge-ს ჟურნალისტი შეესწრო. შემოსავლების სამსახურის თანამშრომლებმა ჩვენს კითხვებს ადგილზე არ უპასუხეს და ბიზნესოპერატორების გაფრთხილებაც შეწყვიტეს.

შემოსავლების სამსახურის თანამშრომლების გამოჩენას მოვაჭრეების პროტესტი მოჰყვა. ისინი ამბობენ, რომ შემოსავალი მცირეა და სალარო აპარატის შესაძენად თანხა არ აქვთ. მათი თქმით, სალარო აპარატების გამოყენებასთან დაკავშირებით ამ დრომდე არავის გაუფრთხილებია. ამიტომ შემოსავლების სამსახურის გააქტიურებას წინასაარჩევნოდ ბიუჯეტის შევსებას უკავშირებენ.
საკითხის გარკვევას უწყებაში შევეცადეთ.

„აღნიშნული ტერიტორია სტაციონალური ტიპის სავაჭრო ობიექტია ( შენობა ნაგებობა, ან ჯიხური) შესაბამისად, მათ კანონმდებლობით ეკუთვნით სალარო აპარატის გამოყენება. გადამხდელს მიეცა გაფრთხილება. მათ არ აქვთ უფლება ამ აპარატის გარეშე ივაჭრონ. როგორც ჩანს აქამდე, გაფრთხილება არ მიუღიათ, თორემ დაჯარიმდებოდნენ. ჩვენი შემმოწმებელი დანაყოფის წევრი მივიდა, ნახა და აღმოჩნდა რომ აპარატი არ ჰქონდათ. მათი აზრი წინასაარჩევნოდ ბიუჯეტის შევსებათან სიმართლეს არ შეესაბამება. თუ რაიმე პრეტენზიები აქვთ, მიმართონ  შემოსავლების სამსახურს და დავების განმხილველი საბჭო შეისწავლის. “- განმარტეს შემოსავლების სამსახურში.

აქვე განვმარტავთ, რომ საკონტროლო–სალარო აპარატის გამოყენების ვალდებულება ეკისრებათ ეკონომიკური საქმიანობით დაკავებულ პირებს, რომლებიც საქონლის/მომსახურების მომხმარებლისათვის მიწოდებას ნაღდი ფულადი ანგარიშსწორებით აწარმოებენ. კანონის თანახმად, საკონტროლო-სალარო აპარატის გამოყენების ვალდებულებისაგან გათავისუფლებულია მხოლოდ ის ფიზიკური პირი, რომელიც არ იყენებს დაქირავებულ პირთა შრომას და ახდენს პირად ან საოჯახო მეურნეობაში მოყვანილი სოფლის მეურნეობის პროდუქციის ან მისგან წარმოებული (გადამუშავებული) საქონლის რეალიზაციას.

კანონის მიხედვით, მომხმარებელთან ნაღდი ფულით ანგარიშსწორებისას საკონტროლო-სალარო აპარატის გარეშე მუშაობა იწვევს გადასახადის გადამხდელის დაჯარიმებას 500 ლარის ოდენობით.
ამ მუხლის პირველი ნაწილით განსაზღვრული ქმედება, ჩადენილი განმეორებით, –
იწვევს გადასახადის გადამხდელის დაჯარიმებას 5 000 ლარის ოდენობით, ხოლო ყოველ შემდგომ განმეორებაზე – 10 000 ლარის ოდენობით.