15 მაისს მოსულმა ძლიერმა წვიმამ გურჯაანის მუნიციპალიტეტის სოფელ ჩალაუბანში სანიაღვრე მილების ნაწილი წაიღო, დაიტბორა ეზოებიც. გზის სარეაბილიტაციო სამუშაოების შემსრულებელი კომპანიის დირქტორის თქმით, პრობლემის თავიდან ასაცილებლად, პროექტში ასფალტო-ბეტონის კიუვეტების მოწყობა უნდა გაეთვალისწინებინათ.

- "დაამონტაჟეს მცირე გამტარიანობის მქონე მილები. მე გავაფრთხილე გამგეობა და მუნიციპალური განვითარების ფონდი, რომ ჭარბი ნალექის დროს წყლის ნაკადს ვერ გაატარებდა და მილებს ნიაღვარი წაიღებდა. მაშინ გამგეობამ მითხრა, რომ პროექტს აღარაფერი ეშველება, ჭარბ ნალექს დაველოდოთ და ამ თემაზე მერე ვილაპარაკოთო. ფაქტი სახეზეა, ორი სამი დღის წინ მილები წყალმა წაიღო და საერთოდ დაიკარგა. ზოგი ოჯახი სახლში ვეღარ შესულა."- გვითხრა ჩალაუბნის დეპუტატმა ვალერი ბარნაბიშვილმა.


აღნიშნული ხარვეზის აღმოფხვრას სამუშაოების მწარმოებელი კომპანია "სერპანტინი" უზრუნველჰყოფს.

-"კანონით ეს ჩვენ აღარ გვეხება, მაგრამ მაინც გავაკეთებთ. ეს იყო სტიქია და ამაზე პასუხისმგებლები არ ვართ. კარგი იქნებოდა, თავიდანვე გათვალისწინებული ყოფილიყო ასფალტო-ბეტონის კიუვეტები. პროექტი დაზღვეული გვაქვს, მაგრამ შეიძლება სადაზღვეო კომპანიის გადაწყვეტილება დროში გაიწელოს, ამიტომ ჩვენ ხვალვე წავალთ და ხარვეზს გამოვასწორებთ. ამაში გამგეობა თანხას არ გადაგვიხდის. გრძელვადიან გეგმაში გამგეობამ მაგ ადგილას ბეტონით მოწყობა უნდა გაითვალისწინოს. რა პროექტსაც მაძლევენ, იმით ვხელმზრვანელობ, მე ხომ ვერ გავაკეთებ."- განაცხადა "სერპანტინის" დირექტორმა ზურაბ ფეიქრიშვილმა.

მუნიციპალური განვითარების ფონდში განმარტეს, რომ კონტრატქის მიხედვით "სერპანტინს" ვალდებულება აქვს ერთი წლის განმავლობაში ობიექტზე არსებული დაზიანებები გამოასწოროს. რაც შეეხება, არხების ასფალტო- ბეტონის საფარით მოწყობას, აღნიშნულ საკითხს ფონდი  გურჯაანის მუნიციპალიტეტის გამგეობასთან ერთად განიხილავს.

შეგახსენებთ, რომ 4 კმ-იანი გზის სარეაბილიტაციო სამუშაოები საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა ჩაატარა. პროექტის ღირებულება 950 675 ლარია და ის მსოფლიო ბანკის დაფინანსებით განხორციელდა.

ამავე თემაზე:

ჩალაუბნელები სკოლისა და ბაღის ტერიტორიაზე შემაფერხებლების მოწყობას ითხოვენ

ჩალაუბანში გზის რეაბილიტაციაზე დასაქმებულებს ხელფასი არ აუღიათ