დღეს სოფელ ახაშნის საბავშვო ბაღის თანამშრომლებმა აუტიზმის დღესთან დაკავშირებით საინფორმაციო ღონისძიება გამართეს.
შეხვედრას მშობლებთან და მოწვეულ სტუმრებთან ერთად სოფლის რწმუნებული და მაჟორიტარი დეპუტატიც ესწრებოდნენ.
"პრევენციის თვალსაზრისით ძალიან მნიშვნელოვანია ასეთი საინფორმაციო ღონისძიებების მოწყობა. რაც უფრო მეტად იქნება ინფორმირებული საზოგადოება, აუტიზმით დაავადებულ ბავშვებს უფრო გაუადვილდებათ საზოგადოებაში თავიანთი შესაძლებლობების წარმოჩენა"- აღნიშნა სოფელ ახაშნის მაჟორიტარმა დეპუტატმა ლევან ხაზიურმა.

"2 აპრილს აუტიზმის საერთაშორისო დღე იყო. ჩვენ გადავწყვიტეთ სოლიდარობა გამოგვეცხადებინა ამ ადამიანებისთვის. მოვიწვიეთ ფსიქოლოგი, რომელმაც დაავადების შესახებ ამომწურავი ინფორმაცია მიაწოდა მშობლებს. მართალია, ჩვენ არ გვყავს ასეთი ბავშვები, მაგრამ ჩავთვალეთ, რომ ეს ღონისძიება საჭირო იყო. მადლობა მინდა გადავუხადო ბაღის დირექციას და მშობლებს გვერდში დგომისთვის."- გვითხრა აღმზრდელმა მაია გელაშვილმა.

როგორც ჩვენთან საუბარში ერთ-ერთი აღსაზრდელის მშობელმა მაკა ოსიაშვილმა აღნიშნა, ასეთი ტიპის საინფორმაციო შეხვედრები მნიშვნელოვანია, როგორც მშობლებისთვის, ასევე აღმზრდელებისთვისაც.
"წლების განმავლობაში ამ საკითხის ირგვლივ ინფორმაციული ვაკუუმი არსებობდა. ბევრმა არ იცოდა რა არის აუტიზმი. დღეს ძალიან საინტერესო საღამო იყო. ვფიქრობ, ყველა მშობელმა ამომწურავი ინფორმაცია მიიღო."

შეხვედრაზე ფსიქოლოგთან ერთად თავიანთი მოსაზრებები მშობლებმაც გამოთქვეს.