გურჯაანელი ვასილ გავაშელიშვილი იმ დროს დააკავეს, როდესაც ე.წ. "ლიმონკით" ხელში პატრულის თანამშრომელს მიუვარდა. საქმე ორი მუხლით აღიძრა. ძიება მიმდინარეობდა თავად საპატრულო პოლიციის თანამშრომლის მიხეილ ოთარაშვილის წინააღმდეგ შეტანილი საჩივრის საფუძველზეც. "საქმე აღძრულია, გამოძიება სისხლის სამართლის კოდექსის 236-ე მუხლით მიმდინარეობს, ეს არის საბრძოლო მასალის, ან ფეთქებადი ნივთიერების მართლსაწინააღმდეგო შეძენა-შენახვა-ტარება. საქმეში 151-ე მუქარის მუხლიც ფიგურირებს. რეაგირება მოხდა და აღძრულია საქმე."- აღნიშნა შინაგან საქმეთა სამინისტროს პრესსამსახურის წარმომადგენელმა კახეთში შორენა ჯახუამ. ვასილ გავაშელიშვილის მეუღლე მზია გავაშელიშვილი "სპექტრთან" საუბარში განმარტავს, რომ ბრალდებულმა დანაშაული აფექტის მდგომარეობაში ჩაიდინა. მათ ყოფილ რძალს საპატრულო პოლიციის თანამშრომელი მიხეილ ოთარაშვილი მეუღლის მოკვლისა და ბიზნესის დახურვით აშინებდა, რა გზითაც მასთან ურთიერთობას აიძულებდა. "ჩემს ბიჭს ოჯახი თებერვალში დაენგრა, რძლის ტელეფონში პოლიციის თანამშრომლის მიხეილ ოთარაშვილის მესიჯები აღმოვაჩინეთ. როგორც ჩემმა რძალმა გვითხრა, ეს ადამიანი აშანტაჟებდა, აშინებდა, ეუბნებოდა, ქმარს მოგიკლავ, მაღაზიას დაგიკეტავთ, თუ ჩემთან არ იქნებიო. უთვალთვალებდა, როდის მოდიოდა ჩემთან, მაღაზიაში.ასე უთქვამს, ახალი გათხოვილი რომ იყავი და წითელი ოპელი გყავდათ, მაშინ დაგადგი თვალიო." მზია გავაშელიშვილის თქმით, ამ ამბის შემდეგ მიხეილ ოთარაშვილი მათ მაღაზიასთან პროვოცირების მიზნით მივიდა. "ორი შვილიშვილი გამიუბედურა და მათი მშობლები ერთმანეთს დააცილა, ახლა კიდევ ცეცხლზე ნავთს ასხამს. სანამ ჩემი ქმარი დანაშაულს ჩაიდენდა, ჩემი მაღაზიის წინ მოვიდა და გამომწვევად მიყურებდა. ვუთხარი, შე უვარგისო, აქ როგორ მოხვედი-მეთქი. ეკიპაჟის მანქანით იყო. ჩემმა ქმარმა გაიგო ეს ყველაფერი და ვეღარ მოითმინა. სამი-ოთხი დღის შემდეგ ჩუმლაყში "ბენზინის კალონკაზე" ნასვამ მდგომარეობაში მივიდა, არ ვიცი "ლიმონკა" საიდან ჰქონდა. ეგონა, რომ მიხეილ ოთარაშვილი იქ იქნებოდა. სინამდვილეში იქ არ აღმოჩნდა. "ლიმონკა" ხელში ეჭირა და პოლიციამ ამიტომ დაიჭირა," - გვიყვება ის. ბრალდებულის მეუღლის თქმით, რადგან მიხეილ ოთარაშვილი პოლიციის თანამშრომელია, გარკვეული პრივილეგიებით სარგებლობს. "პოლიციის თანამშრომელია და ყველანაირად ხელს აფარებენ. კატეგორიულად ვითხოვდი, რომ მის წინააღმდეგ საჩივარი ჩემთვის დაეწერინებინათ, მაგრამ არ დამაწერინეს. მეუღლის დაკავების შემდეგ, ჩემმა ყოფილმა რძალმა ვერიკო ცხვედენაშვილმა საჩივარი მიხეილ ოთარაშვილის წინააღმდეგ შანტაჟის ბრალდებით შეიტანა." როგორც შსს-ს პრესსამსახურში განმარტავენ, ვერიკო ცხვედენაშვილის საჩივართან დაკავშირებით მოკვლევა მიმდინარეობდა, თუმცა დანაშაული არ გამოიკვეთა და ძიება შეწყდა. "სპექტრი" შეეცადა აღნიშნულ საქმესთან დაკავშირებით მიხეილ ოთარაშვილის პოზიციაც დაეფიქსირებინა. მას ტელეფონით დავუკავშირდით. გვითხრა, რომ ეს მობილურზე სალაპარაკო თემა არ იყო და რედაქციაში მოსვლას დაგვპირდა, თუმცა არ მოვიდა. ამის შემდეგ არც ჩვენს სატელეფონო ზარებს უპასუხა.