მარინა პეტრიაშვილი

30 სექტემბერს სოფელ კოლაგში, მექერიშვილების ოჯახში ტრაგედია დატრიალდა. 10 თვის ბარბარე რაფალიანცი, რომელიც დეიდასთან სტუმრად იმყოფებოდა, ნახევარი საათის ძებნის შემდეგ ოჯახის წევრებმა, საძინებელი ოთახის გვერდით მარანში წყლით სავსე ქვევრში გარდაცვლილი იპოვეს. როგორც ექსპერტიზამ დაასკვნა, ბავშვი ქვევრში ცოცხალი ჩააგდეს და მისი სიკვდილი წყალმა გამოიწვია. გარდაცვლილი გოგონას ახლობლები ამ ფაქტს არჩევნებს უკავშირებდნენ. როგორც ბავშვის დეიდა დალი მექერიშვილი ამბობდა, მკვლელობამდე მისი ოჯახის მიმართ რამდენჯერმე მუქარაც განხორციელდა, რადგან ის `ქართული ოცნების~ წარმომადგენელი იყო. ოჯახის წევრები დანაშაულს `ნაციონალური მოძრაობის~ მხრიდან ანგარიშსწორებას უკავშირებდნენ და ყოფილ გუბერნატორს, ამჟამად დეპუტატს გიორგი ღვინიაშვილს სდებდნენ ბრალს. რამდენიმე დღის წინ კი, გააჟღერეს ინფორმაცია იმის შესახებ, რომ იმ დღეებში გიორგი ღვინიაშვილმა დუმილის ფასად, მათი მოქრთამვა სცადა. "როდესაც ეს უბედურება დაგვატყდა, ჩემ სიძესთან მივიდა ვიღაც პიროვნება, რომელმაც უთხრა, რომ გამგებლის მოადგილე იყო და 3000 ლარი გადასცა. იმ პიროვნებამ ასე უთხრა: ეს თანხა გიორგი ღვინიაშვილმა დაკრძალვის თანხების გასასტუმრებლად გამოგიგზავნათ და დამაბარა, რომ ბრალს ტყუილად მდებთ, დანაშაული მე არ ჩამიდენიაო. ეს მოხდა ბავშვის დასაფლავებამდე," _ გვითხრა ბავშვის ბებიამ თინა მექერიშვილმა და იქვე დასძინა: "ასეთი რამ სად ხდება, რომ დაკრძალვის ხარჯებს ამდენს უგზავნიან ოჯახს? ჩემი სიძე, გამოუცდელი ბიჭია და თანხა გამოართვა. რა ეგონათ, ფულს თუ მოგვცემდნენ გავჩუმდებოდით? იმ დროს მე არ ვიყავი სახლში, თორემ კი არ გამოვართმევდი, სათითაოს თავზე დავაფხრეწავდი. მართალია, გვიჭირს, მაგრამ მათხოვრებად არასოდეს ვქცეულვართ."

როგორც ბავშვის ბებია ამბობს, დიდი სურვილი აქვს, რომ გამოძიება დროულად დასრულდეს და იმ ბრალდებებს რაც მათი ოჯახის მისამართით ისმოდა, ფარდა აეხადოს. მათ ახალი მთავრობის დიდი იმედი აქვთ და ფიქრობენ, რომ სიმართლე ეხლა მაინც გაირკვევა და მკვლელები სათანადოდ დაისჯებიან. "ბოლოს და ბოლოს, წერტილი დაესმება იმ ცილისწამებას, რაც ჩვენი ოჯახის მისამართით ისმოდა, რომ თითქოს ბავშვი დეიდამ მოკლა. ბარბარე დღენაკლული დაიბადა და დალიმ როგორც საკუთარი შვილი, ისე გაზარდა, რომელი ადამიანი მოკლავს თავის დისშვილს?" _ გვითხრა მან.

გაზეთი `სპექტრი~ ორი დღის განმავლობაში ცდილობდა გურჯაანის მაჟორიტარ დეპუტატთან გიორგი ღვინიაშვილთან დაკავშირებას, მაგრამ ტელეფონი ხან გამორთული ჰქონდა, ხან კი არ გვპასუხობდა. სხვადასხვა ტელევიზიებით გავრცელებულ სიუჟეტებში კი განაცხადა, რომ ეს მხოლოდ დაკრძალვის ხარჯი იყო და გუბერნია მსგავს დახმარებას ყველა გაჭირვებულს უწევს. როგორც ოჯახის მეზობელი ეთერ მუჯიშვილი ამბობს, ცოტა ხნის წინ დედა დაეღუპა, ერთჯერადი დახმარება მასაც აღმოუჩინეს, მაგრამ არა ამ ოდენობის თანხით. "დედაჩემი რომ დაიღუპა, გამგეობაში მეც ვითხოვე დახმარება, ძალიან გაჭირვებული ოჯახი მაქვს, მაგრამ მარტო ასი ლარით დამეხმარნენ. თუ დახმარებაა, მე მგონი ყველაზე ერთნაირად უნდა ყოფილიყო. დამნაშავეები იყვნენ და უნდოდათ, რომ ეს ოჯახი გაეჩუმებინათ. ტყუილი რომ იყოს, ასე მოიქცეოდნენ?" _ აღნიშნა მან `სპექტრთან~ საუბარში.

ბარბარე რაფალიანცის მკვლელობა ამ დრომდე არ არის გახსნილი. საქმეს შს კახეთის სამხარეო მთავარი სამმართველო იძიებს. შინაგან საქმეთა ახალმა მინისტრმა ირაკლი ღარიბაშვილმა ეს საქმე პირად კონტროლზე აიყვანა. მისი თქმით, გარდაცვალების მიზეზის დასადგენად მაქსიმალურად ყველა რესურსი იქნება გამოყენებული.