ლანა გულოშვილი

კახეთში იაფი გათბობის საშუალებად კვლავ შეშა ითვლება. ბევრი ოჯახი მაღალი ტარიფის გამო ვერ ახერხებს ბუნებრივი აირის მოხმარებას. ამას ემატება ისიც, რომ სოფლების უმრავლესობა ჯერ კიდევ არ არის გაზიფიცირებული. სწორედ ამიტომ, ზამთრის მოახლოებასთან ერთად მატულობს ტყის გაჩეხვისა, თუ ხის უკანონოდ მოჭრის პრეცედენტები. `სპექტრი~ კომპეტენტური პირების დახმარებით შეეცადა მოსახლეობისთვის მიეწოდებინა ინფორმაცია: რა მიიჩნევა კანონდარღვევად, რა სახის ჯარიმაა გათვალისწინებული ამ შემთხვევაში, რა სახის სანქციები არსებობს თანხის გადაუხდელობისას და რა არის "გარემოსთვის მიყენებული ზიანი"? ენერგეტიკის სამინისტრო, ბუნებრივი რესურსების სააგენტო, ტყისა და ველური ბუნების მართვის დეპარტამენტი, _ ეს არის ერთი მთლიანი სტრუქტურა, რომელიც საბოლოო ჯამში გარემოს დაცვას ემსახურება. ამის მიუხედავად, ბოლო წლებში განსაკუთრებით გახშირდა ხე-ტყის უკანონოდ ჭრა.

ზოგ შემთხვევაში მოქალაქის მხრიდან კანონდაუმორჩილებლობა ინფორმაციის უქონლობითაც აიხსნება. აღნიშნულ საკითხში უკეთ გარკვევის მიზნით `სპექტრის~ რედაქციას არაერთი მოქალაქე დაუკავშირდა. მათ შორის არიან ისეთებიც, ვინც ადმინისტრაციულ სამართალდარღვევათა კოდექსის საფუძველზე დააჯარიმეს. თუმცა მათ დაკისრებული ჯარიმის სამართლიანობაში ეჭვი შეაქვთ. თელავის მუნიციპალიტეტის სოფელ აკურაში მცხოვრებმა გიორგი ქარსალაძემ კახეთის სააღსრულებო ბიუროდან შეტყობინება გადაწყვეტილების შესრულების შესახებ 2012 წლის 11 მაისს განმეორებით მიიღო. დოკუმენტის მიხედვით ირკვევა, რომ მას ადმინისტრაციულ სამართალდარღვევათა კოდექსის საფუძველზე დაკისრებული აქვს ჯარიმის (ან საურავის) სახით 1000 ლარის გადახდა. ასევე "სააღსრულებო წარმოებათა შესახებ" საქართველოს კანონის 38-ე მუხლის მე-6 პრიმა პუნქტის თანახმად აღსრულების საფასურია 70 ლარი, რაც ჯამში შეადგენს 1070 ლარს. `სპექტრთან~ საუბარში გიორგი ქარსალაძე იხსენებს: "ჩემი ნაკვეთის გვერდით ეგდო წაქცეული ხე. ტოტები მოვაჭერი და სახლში წამოვიღე. ამის შემდეგ ძალიან მალე მოვიდნენ ჩემთან ოჯახში, როდესაც შეშა აღმოაჩინეს, დამიბარეს თელავის პოლიციის რაიონულ განყოფილებაში. როგორც ამიხსნეს, დამაჯარიმეს ბუნებისთვის მიყენებული ზიანისა და შეშის ტრანსპორტირებისთვის. ეს ხე მე არ მომიჭრია, მეხი დაეცა და წააქცია. არ მესმის ასეთი რა კანონდარღვევა ჩავიდინე?! ნამდვილად არ მაქვს საშუალება ამხელა თანხა გადავიხადო. კი მითხრეს, ნაწილ-ნაწილ შეგიძლია დაფაროო, მაგრამ მაინც გამიჭირდება. იმედი მაქვს, ახალი ხელისუფლების პირობებში ეს საქმე გადაიხედება და რამე მეშველება," _ ამბობს გიორგი ქარსალაძე.

ბუნებრივი რესურსების სააგენტოს კახეთის სამმართველოს უფროსმა ირაკლი დობორჯგინიძემ კი აღნიშნულ საკითხთან დაკავშირებით თელავის რაიონული პროკურატურის (29.07.2011-ის) დადგენილება გაგვაცნო. "მასალების თანახმად ირკვევა, რომ გიორგი ქარსალაძემ 2011 წლის ივლისის თვეში, სოფელ აკურის მიმდებარე ტერიტორიაზე არსებულ ჭალაში, ქარისგან მოტეხილ მუხის ჯიშის ხეს მოაჭრა ტოტები სულ 1,5 კუბური მეტრის ოდენობით და ყოველგვარი დოკუმენტაციის გარეშე, მოახდინა მისი ტრანსპორტირება და გადაიტანა სახლში. რაზედაც პოლიციამ აღძრა სისხლის სამართლის საქმე. 2011 წლის 29 ივლისს თელავის რაიონულმა პროკურატურამ სისხლის სამართლის ქმედების არარსებობის გამო შეწყვიტა აღნიშნული საქმე და დადგენილების ასლი შემდგომი რეაგირებისათვის ჩვენს სამსახურში გადმოაგზავნა," _ განმარტა ირაკლი დობორჯგინიძემ და აქვე დასძინა: "ასეთ შემთხვევაში ჩვენს მიერ დგება ადმინისტრაციული სამართალდარღვევის ოქმი ა.ს.კ.-ის 66 მუხლის პირველი ნაწილით (ხე-ტყის უკანონო ჭრა), ხოლო თუ სამართალდარღვევა პიროვნებას ჩადენილი აქვს განმეორებით, მაშინ ა.ს.კ.-ის 66 მუხლის მეორე ნაწილითაც, ასევე უკანონო ტრანსპორტირებისთვის 128² IV ნაწილით იგზავნება სასამართლოში. ვინაიდან გიორგი ქარსალაძეს შინაგან საქმეთა სამინისტროს ადმინისტრაციულ სამართალდარღვევათა ერთიანი აღრიცხვის საინფორმაციო ბანკის მონაცემებით ერთი წლის განმავლობაში სამართალდარღვევა განმეორებითაც ჰქონდა ჩადენილი, ასევე აწარმოებდა უკანონო ტრანსპორტირებას, სასამართლომ მას დააკისრა გარემოსთვის მიყენებული ზიანის ანაზღაურება და 1000 ლარი ჯარიმის გადახდა,"-გვითხრა ირაკლი დობორჯგინიძემ.

მისივე თქმით, ხე-ტყის უკანონო ჭრისთვის კანონდამრღვევი პირველ ჯერზე ამჟამად უკვე მხოლოდ გაფრთხილებას იღებს, ფულადი ჯარიმა კი დანაშაულის განმეორების შემთხვევაში ეკისრება. "ამჯერად სამართალდარღვევის პირველ შემთხვევაში დგება ადმინისტრაციული სამართალდარღვევის ოქმი გაფრთხილების მუხლით (ა.ს.კ.-ის 66 მუხლის 2¹ ნაწილით), რის შედეგადაც სასამართლო, კანონდამრღვევს აკისრებს, მხოლოდ გარემოსთვის მიყენებული ზიანის ანაზღაურებას, ხოლო გამეორებისას ავალდებულებს გარემოზე მიყენებული ზიანის ანაზღაურებას და ადმინისტრაციულ ჯარიმას 500 ლარის ოდენობით," _ განმარტავს ირაკლი დობორჯგინიძე.

შეგახსენებთ, რომ კანონით გათვალისწინებული ნორმების თანახმად, მოქალაქეს ტყიდან შეშა გამოაქვს შემდეგი პროცედურების დაცვით: გადის კონსულტაციას მეტყევესთან, იღებს ტყე-კაფის კოდს, შემდეგ ბანკში მოითხოვს ხე-ტყის დამზადების ბილეთს, რის საფუძველზეც გამოაქვს შეშა. გარდა ამისა, თუკი პიროვნება საკუთარი ნაკვეთიდან ხეს (შეშას) იმ მიზნით გამოიტანს, რომ მოახდინოს ტრანსპორტირება სხვა მუნიციპალიტეტში, ქალაქსა თუ სოფელში, აუცილებელია ჰქონდეს ტერიტორიული ორგანოს რწმუნებულის მიერ გაცემული ადგილწარმოშობის ცნობა, რათა არ მოხდეს მისი დაჯარიმება ტრანსპორტირებისთვის.