ლანა გულოშვილი

11 სექტემბერს გურჯაანის რაინულ სასამართლოში, კოალიცია `ბიძინა ივანიშვილი ქართული ოცნების~ მაჟორიტარი დეპუტატობის კანდიდატის, მანანა ბერიკაშვილის სარჩელი განიხილეს. მოსარჩელე მხარე `ერთიანი ნაციონალური მოძრაობის~ დეპუტატობის კანდიდატ გიორგი ღვინიაშვილისთვის რეგისტრაციის გაუქმებას ითხოვდა. მიზეზად კი ამომრჩევლის მოსყიდვას ასახელებდა.

მოსარჩელე მხარის მტკიცებით, წინასაარჩევნო პერიოდში, სოფელ კარდენახში მცხოვრებმა ასამდე მოქალაქემ, კახეთის გუბერნატორის მოვალეობის შემსრულებელს გიორგი სიბაშვილს იმ სესხის გადავადება სთხოვა, რომელიც ბანკებიდან სოფლის-მეურნეობის განვითარებისათვის ჰქონდა აღებული."გიორგი სიბაშვილი დაპირდათ, რომ ბანკის ვალს გადაუვადებდნენ, როგორც ეს მოხდა 2012 წლის 19 ივლისს სტიქიისგან დაზარალებულების შემთხვევაში. თუმცა გუბერნატორის მოვალეობის შემსრულებელმა სანაცვლოდ მოითხოვა, რომ კარდენახელებს პირადად და ოჯახის წევრებსაც ხმა მიეცათ `ნაციონალური მოძრაობისთვის.~ როგორც ცნობილია, კარდენახი სტიქიური უბედურების ზონაში არ შედიოდა," _ ამბობს მანანა ბერიკაშვილი.

სასამართლო პროცესზე ბერიკაშვილის მოთხოვნით, მოწმის სტატუსით დაიკითხნენ კარდენახელი გლეხები. "გიორგი სიბაშვილმა ჩვენგან მოითხოვა, რომ `ნაციონალური მოძრაობისთვის~ მიგვეცა ხმა და ხუთიანი შემოვხაზეთ კიდეც, აქციებზეც დავდიოდით და გვერდში ვედექით. მართლაც აგვისტო და სექტემბერი ისე გავიდა, რომ სესხის დაუყონებლივ დაფარვა არავის მოუთხოვია. 2 ოქტომბერს, ანუ არჩევნების მეორე დრეს კი, ბანკიდან დაგვირეკეს და გვითხრეს, რომ სესხის და პროცენტის გადაუხდელობის გამო საურავი გვქონდა დარიცხული. სიბაშვილს ვეღარ დავუკავშირდით. ამიტომ გიორგი ღვინიაშვილს მივმართეთ, რომელმაც ამ საკითხის გარკვევა მისი შტაბის უფროსს ზაქარია იაგანაშვილს დაავალა. საბოლოოდ კი, პასუხი აღარ გაგვცეს და დავრჩით ასე მოტყუებულები." (კახეთის საინფორმაციო ცენტრი). _ განაცხადა სასამართლო პროცესზე ერთ-ერთმა კარდენახელმა გოჩა შაკიაშვილმა.

მოწმის სტატუსით დაიკითხა კახეთის გუბერნატორის მოვალეობის შემსრულებელი გიორგი სიბაშვილიც. მისი თქმით, სესხების გადავადების სანაცვლოდ გლეხებს არაფერს დაპირებია. "გურჯაანის რაიონულმა სასამართლომ მოსარჩელე მხარის სარჩელი არ დააკმაყოფილა და უარი თქვა რეგისტრაციის გაუქმებაზე. მიმაჩნია, რომ სასამართლომ სწორი გადაწყვეტილება მიიღო.~ გუბერნატორის მოვალეობის შემსრულებელი იმაზეც ამახვილებს ყურადღებას, რომ მოწმეებს ურთიერთგამომრიცხავი ჩვენებები აქვთ. `პაექრობაში მოსარჩელე მხარე დაჟინებით ამტკიცებს, რომ კარდენახი არ არის სტიქიური უბედურების ზონა. არ დაზიანებულა და ეს დაპირება არ უნდა შემდგარიყო. ჩემთვის გაურკვეველია, მე ამოვიღებ საოქმო ჩანაწერს, გავეცნობი და შესაძლოა, მართლაც დავეთანხმოთ სასამართლოს, რომ კარდენახი არ არის სტიქიური უბედურების ზონა. გარდა ამისა, მიმაჩნია, რომ უნდა მოვითხოვო სასამართლო სხდომის ოქმი, რადგან მოწმეთა ჩვენებები არის ურთიერთსაწინააღმდეგო. იმის მიუხედავად, რომ მათ ახსნა-განმარტებებზე ხელი აქვთ მოწერილი, თითქოს სიბაშვილი `ხუთიანის~ შემოხაზვის სანაცვლოდ კრედიტების გადავადებას დაპირდათ, დაკითხული ხუთი მოწმიდან სამმა საერთოდ უარყო ჩემსა და მათ შორის პოლიტიკაზე საუბარი, ორმა დაადასტურა, რომ `გვერდში დგომის სანაცვლოდ~ თქვა სიბაშვილმაო. ვფიქრობ, რომ ასეთ ურთუიერთგამომრიცხავ ჩვენებებზე უნდა ვიმსჯელოთ," _ განაცხადა გიორგი სიბაშვილმა.

მოსარჩელე მხარის ადვოკატმა ლოლა ტუსაშვილმა სასამართლო პროცესს არაობიექტური უწოდა. "მოსამართლემ ისე მიიღო გადაწყვეტილება, სათათბირო ოთახში არც გასულა. ჩვენი ვარაუდი, რომ სასამართლო მიკერძოებული იქნებოდა, ახდა." სასამართლო პროცესზე არ იმყოფებოდა მოპასუხე მხარე გიორგი ღვინიაშვილი, თუმცა პროცესს ესწრებოდნენ მისი წარმომადგენლები: ზაქარია იაგანაშვილი და ირმა ონაშვილი. მიუხედავად იმისა, რომ მოსარჩელე მხარის ადვოკატებს ჯერ არ მიუღიათ გადაწყვეტილება გაასაჩივრებენ თუ არა გურჯაანის რაიონული სასამართლოს გადაწყვეტილებას, გიორგი ღვინიაშვილისთვის რეგისტრაციის გაუქმებასთან დაკავშირებით, კახეთის რეგიონის საოლქო საარჩევნო კომისიებმა შემაჯამებელი ოქმები უკვე გამოაქვეყნეს. ამ დროისთვის მხოლოდ სიღნაღის მაჟორიტარი დეპუტატობის კანდიდატის ვინაობაა უცნობი, რაც 14 ოქტომბერს ვაქირის #5 საარჩევნო უბანზე განმეორებითი კენჭისყრის შედეგად გაირკვევა.