მარინა პეტრიაშვილი

30 სექტემბერს დაახლოებით საღამოს 8 საათზე სოფელ კოლაგში, სტუმრად მყოფი 10 თვის ბარბარე რაფალიანცი, დეიდის საცხოვრებელი სახლიდან დაიკარგა. დაახლოებით ერთი საათის ძებნის შემდეგ, ჩვილი საძინებელი ოთახის გვერდით მდებარე მარანში, წყლით სავსე ქვევრში იპოვეს. ბავშვი პატრულმა საავადმყოფოში გადაიყვანა, მაგრამ მისი გადარჩენა ვეღარ მოხერხდა. მომხდარს ახლობლები და ოჯახის წევრები `ქართული ოცნების~ მიმართ მხარდაჭერის გამო ანგარიშსწორებად მიიჩნევენ.

მშობლებმა და ოჯახის წევრებმა ბარბარეს ძებნა მას შემდეგ დაიწყეს, რაც დედას მძინარე შვილი საწოლში აღარ დახვდა. როგორც ოჯახის წევრები ამბობენ, დედამ ბავშვს აჭამა და დააძინა, თვითონ კი სავახშმოდ მეორე სართულზე ავიდა. ცოტა ხნის შემდეგ ძაღლის ყეფა გაიგეს. "მეორე სართულზე ვვახშმობდით. ბავშვს პირველ სართულზე ოთახში ეძინა. დაახლოებით 5 წუთი დავტოვეთ. ძაღლის ყეფა რომ მოგვესმა, ჩამოვედით და ბავშვი საწოლში უკვე აღარ იყო,"_ ყვებიან ოჯახის წევრები.

ბარბარეს საძებნელად მთელი სოფელი გამოვიდა. გამოიძახეს საპატრულო პოლიცია, რომელიც 40 წუთში მოვიდა. ერთსაათიანი უშედეგო ძებნის შემდეგ, კრიმინალური პოლიციის თანამშრომლებმა ჩვილი წყლითYსავსე ქვევრში იპოვეს, რომელსაც ე.წ. ფიქალის ქვა ჰქონდა დაფარებული. პატარა ბარბარე საპატრულო პოლიციის მანქანით გურჯაანის რაიონულ საავადმყოფოში გადაიყვანეს, თუმცა, როგორც ექიმებმა აღნიშნეს, ის უკვე ნახევარი საათის გარდაცვლილი იყო. ოჯახის ახლობლების თქმით, ბავშვის დეიდა დალი მექერიშვილი `ქართული ოცნების~ კოორდინატორია და მისი მისამართით რამდენჯერმე მუქარაც განხორციელდა, ამიტომ ეს ფაქტი იმ წუთებშივე შეფასდა როგორც შურისძიება პოლიტიკური ნიშნით. პოლიციამ სამძებრო სამუშაოები ბარბარე რაფალიანცის დაღუპვისთანავე დაიწყო, თუმცა ამ დრომდე არავინ დაუკავებიათ. ამ ხნის მანძილზე საზოგადოებაში უამრავი ვერსია გავრცელდა. მის სიკვდილს ჯერ _ დედას, შემდეგ _ მამას და ბოლოს კი დეიდას აბრალებდნენ.

ბავშვის დედა თათია მექერიშვილი ობიქტურ გამოძიებას ითხოვს. როგორც მან მედიასაშუალებებთან საუბრისას განაცხადა, პოლიცია შეგნებულად არ იძიებს მკვლელობის საქმეს. მისი თქმით, ეჭვმიტანილები, რომელიც მან დაასახელა, ჯერ დაკითხულებიც არ ჰყავთ, რადგან ნამდვილი დამნაშევეების დასჯას ერიდებიან და სურთ, რომ ხალხის ყურადღება სხვებზე გადაიტანონ. "ჩემი ყურით გავიგონე ილიკო მექერიშვილი რომ იძახოდა, ვაი, მაგ საცოდავს, ხვალ ნახოს რა დილა გაუთენდებაო. ამ დროს ზურა მექერიშვილმა დამინახა და ანიშნა გაჩუმდიო. სხვას ვის აბრალებენ, მე ჩემი ყურით გავიგონე ყველაფერი. როგორ შეიძლება ოჯახის წევრებს ასეთი რამე დააბრალო. ჯერ მამა დაადანაშაულეს, მერე დედა, მერე დეიდა. ამ ადამიანებს გული არ აქვთ?! ეს შინაურის გაკეთებული არ არის. რატომ ნამდვილ დამნაშავეს არ ეძებენ. უკვე ამდენი დღე გავიდა და ექსპერტიზის დასკვნასაც არ გვაძლევენ, უნდათ, რომ საქმე უფრო ჩახლართონ," _ ამბობს თათია მექერიშვილი და იმასაც იხსენებს, როცა ბავშვს ყველგან უშედეგოდ ეძებდნენ, ხალხიდან ვიღაცამ დაიძახა მარანში მოძებნეთო: "ბავშვს ყველგან ეძებდნენ, მაგრამ არსად იყო. იმ დროს გაბრუებული ვიყავი და იქვე საწოლზე წამომაწვინეს. უცებ ხალხიდან ვიღაც ბიჭმა დაიძახა: გარეთ კი ნუ ეძებთ, მარანში ქვევრში ნახეთო. ეს ყველაფერი პოლიციას შემდეგ მოვუყევი და სახელი და გვარებიც დავასახელე, მაგრამ ასეთი პასუხი გამცეს: ჯერ დასკვნა არ არის და ხელს ვერავის დავადებთო."

ამ ფაქტთან დაკავშირებით შსს-ს გურჯაანის რაიონულ განყოფილებაში დაკითხეს გარდაცვლილის დეიდა და მეზობლები. "მთელი ამ ხნის განმავლობაში მე ისევ შიში მაქვს, ჩემს შვილებსაც ვინმემ რამე არ დაუშავოს. მთელი დღის განმავლობაში გვიან საღამომდე საარჩევნო უბანზე ვიყავი და უამრავი მოწმეც მყავს. ხმაურზე და კივილზე გარეთ გამოვედით, გვეგონა ავარია მოხდა. დავინახე, რომ ჩვენს სახლთან ხალხი ტრიალებდა და მაშინვე გამოვიქეცი. მოვითხოვ ობიექტურ გამოძიებას, რომ მე ჩირქი ჩამომერეცხოს. ურჩევნიათ, ჭორებს თავი დაანებონ და ყველაფერი კარგად გამოიძიონ. ყველა, ვისგანაც მესმის ჩვენზე ჭორი, `ნაციონალური მოძრაობის~ წევრია. ამას შურისძიების მიზნით აკეთებენ," _ ამბობს დალი მექერიშვილი და იქვე აღნიშნავს, რადგან ის `ქართული ოცნების~ წევრი იყო, მთელი ამ ხნის განმავლობაში მის დაშინებას და დაშანტაჟებას ყველნაირად ცდილობდნენ. "ჩემი აზრით, რომ ვეღარაფერი გააწყვეს, იფიქრეს ბავშვს მოვიტაცებთ, წავიყვანთ და ამით დავაშანტაჟებთო. ალბათ არც უნდოდათ მოკვლა, მაგრამ შემოაკვდათ. იმიტომ, რომ მალევე დაიწყეს ბავშვის ძებნა და იმ პიროვნებამ ეტყობა ვერ მოასწრო სახლიდან გაყვანა. ტირილის ხმა რომ არ გაეგოთ, ბავშვს პირზე ხელი დააფარა და მოიგუდა. შემდეგ ქვევრში ჩააგდო და ხალხს შეერია. ეს ვერსია გვაქვს," _ ამბობს დალი მექერიშვილი.

როგორც `სპექტრისთვის~ გახდა ცნობილი, ამ დღეებში რამდენიმე ადამიანი დაკითხეს, რომლებთანაც ბავშვის დეიდა დალი მექერიშვილი ტრაგედიის დროს იმყოფებოდა. "დღეს დამიბარეს და მოწმის სტატუსით დამკითხეს. იმ საღამოს, როდესაც ეს ტრაგედია დატრიალდა, ბავშვის დეიდა დალი მექერიშვილი და მე ერთად ვიყავით. სწორედ ამ დროს საარჩევნო უბანზე გავედით, გვაინტერესებდა როგორ იყო მოწყობილი. თვითონაც `ქართული ოცნების~ წევრი ვარ და არჩევნებისთვის ვემზადებოდი. დაახლოებით საღამოს რვა საათი იყო, ეს უბედურება რომ მოხდა. ხმაურზე დალი საარჩევნო უბნიდან სახლში გამოიქცა," _ გვითხრა მარიამ მექერიშვილმა და იქვე დასძინა: "ყველაფერს დალის აბრალებენ, მაგრამ ეს ჭორი და აბსურდია. ყველაზე შეიძლება მიიტანო ეჭვი, მაგრამ როგორ შეიძლება, დეიდამ თავის დისშვილს ასეთი რამ გაუკეთოს?! როგორც საკუთარი შვილი ისე უყვარდა. თავიანთი კვალი რომ დაფარონ, სხვას აბრალებენ. პოლიტიკას შესწირეს ბავშვის სიცოცხლე."

როგორც `სპექტრს~ ადამიანის უფლებათა დაცვის კომიტეტის წარმომადგენელმა და ადვოკატმა კობა კობახიძემ განუცხადა, 4 ოქტომბერს მოწმეების დაკითხვისას ახალი დეტალი გამოიკვეთა. "ინტერნეტსივრცეში გავრცელდა ინფორმაცია იმის შესახებ, რომ ეს დანაშაული ბავშვის დეიდამ ჩაიდინა. ამიტომ დაიკითხა ორი მოწმე, რომლებიც დანაშაულის დროს ქალბატონ დალისთან ერთად იმყოფებოდნენ. გარდა ამისა, მოწმე მარიამ მექერიშვილმა, იმ დროს როდესაც ბავშვს ეძებდნენ, დაინახა, რომ თონესთან, ეზოს უკანა მხარეს, ვიღაც კაცი ღობეზე გადახტა და გაიქცა. მან მაშინვე დაიწყო ყვირილი და საშველად ხალხს მოუხმო, მაგრამ ვეღარ იპოვეს."

ადვოკატის განმარტებით, პოლიციამ მაშინვე არ გამოიჩინა ოპერატიულობა და ცხელ კვალს არ გაჰყვა. "პოლიციამ ამ დროს არც ძაღლი გამოიყენა, რომ დასდევნებოდნენ და არც სხვა ღონისძიებას მიმართა, რათა ოდოლოგიური ესქპერტიზა ჩაეტარებინათ. ამ დროისათვის არც დაკავებულია ვინმე და სავარაუდოდ, როგორც ჩანს, ეჭვიც არავისზე აქვთ. მოხდა საშინელი რამ, ბავშვის განზრახ მკვლელობა და ეს საქმე აუცილებლად უნდა გაიხსნას."

მომხდარმა ფაქტმა საზოგადოება შოკში ჩააგდო. განსაკუთრებით შემაშფოთებელი აღმოჩნდა გავრცელებული ინფორმაცია პოლიტიკური მოტივით ჩადენილი დანაშაულის შესახებ. 10 თვის ბარბარე რაფალიანცის ტრაგიკული სიკვდილის წინასაარჩევნო პროცესებთან დაკავშირებამ საზოგადოება ორ საპირისპირო ჯგუფად გაყო. სწორედ ამიტომ მნიშვნელოვანია ამ ფაქტის დროულად და ობიექტურად გამოძიება.