ბოლო 2 წლის განმავლობაში კახეთში მნიშვნელოვნად გახშირდა გაუპატიურებისა და ძალადობის ფაქტები. დაახლოებით ერთი კვირის წინ გურჯაანის მუნიციპალიტეტის სოფელ ჯიმითში გაუპატიურების ორი ფაქტი გახდა ცნობილი, თუმცა ადგილობრივების თქმით, დაზარალებული კიდევ 13 ახალგაზრდაა, რომლებიც ჯერჯერობით აღნიშნულის შესახებ არ საუბრობენ. იძებნება დანაშაულში ეჭვმიტანილი 24 წლის გიორგი ტურაშვილი.

გასულ კვირას გავრცელდა ინფორმაცია, რომ გურჯაანის მუნიციპალიტეტის სოფელ ჯიმითში მცხოვრებმა 24 წლის გიორგი ტურაშვილმა სხვადასხვა დროს თხუთმეტი გოგონა გააუპატიურა, რომელთა შორის არასრულწლოვნებიც არიან. აღნიშნულის თაობაზე `სპექტრთან~ მხოლოდ ორი მათგანი იმ პირობით ალაპარაკდა, რომ ანონიმურობა ყველა გარანტიით იქნებოდა დაცული. ჯიმითში მცხოვრები 14 წლის ახალგაზრდა გიორგი ტურაშვილმა სამი თვის წინ გააუპატიურა. "გოგონები ვქეიფობდით. დამირეკა და მითხრა, ცოტა ხნით გარეთ გამოდიო. რადგან კარგად ვიცნობდით და ახლობლებიც ვართ, ცუდი მართლა არაფერი მიფიქრია, მაგრამ როგორც კი გავედი, იარაღი დამადო, არ იყვირო, თორემ მოგკლავო. ხმას როგორ ამოვიღებდი. ჯიმითის სკოლაში წამიყვანა... სამი თვე ამის შესახებ ვერაფერს ვამბობდი," _ იხსენებს დაზარალებული.

17 წლის ახალგაზრდა, სახლში იმყოფებოდა, როდესაც გიორგი ტურაშვილმა დაურეკა და გარეთ გასვლა მოსთხოვა, წინააღმდეგ შემთხვევაში ოჯახის წევრების მოკვლით დაემუქრა. "ღამე იყო, როდესაც ტელეფონზე დამირეკა და მითხრა გარეთ გამოდიო. უარი რომ ვუთხარი, დამემუქრა, შემოვალ და ოჯახის წევრებს მოგიკლავო. შემეშინდა და გარეთ გავედი. არავისთვის არაფერი მითქვამს," _ გვითხრა დაზარალებულმა.

აღნიშნულის თაობაზე სოფელში დიდი ხანია საუბრობენ, მაგრამ დაზარალებულების ოჯახის წევრებმა, როგორც თვითონ ამბობენ, არაფერი იცოდნენ. 14 წლის გოგონას დამ ეს ამბავი თბილისში მეზობლისგან შემთხვევით გაიგო და ოჯახსაც შეატყობინა. 17 წლის გოგონაც ამის შემდეგ ალაპარაკდა. დანარჩენები ჯერ კიდევ დუმილს ამჯობინებენ. როგორც `სპექტრისთვის~ გახდა ცნობილი, დაზარალებულებს უკვე ჩაუტარდათ ექსპერტიზა, რის შედეგადაც აღნიშნული ფაქტი დადასტურდა. დაახლოებით 10 დღეა, რაც 24 წლის გიორგი ტურაშვილი აღნიშნული დანაშაულის გამო იძებნება. მას არა მარტო თანასოფლელები, არამედ მეზობელი სოფლის მაცხოვრებლებიც უარყოფით პიროვნებად ახასიათებენ. როგორც ჯიმითელები ამბობენ, გიორგი ტურაშვილი პირობით სასჯელს იხდის იარაღის უკანონო შენახვა-ტარებისთვის. მათივე ინფორმაციით, დამნაშავის მამა აზერბაიჯანის მოქალაქეა და ეჭვობენ, რომ მან შვილი საქართველოდან გააპარა. გიორგი ტურაშვილი დაქორწინებულია და შვილსაც ელოდება.

აღნიშნულთან დაკავშირებით `სპექტრმა~ ოფიციალური მიმართვა გადაუგზავნა შს გურჯაანის სამმართველოს. დეტექტივ-გამომძიებელმა მარინა ფოცხვერაშვილმა ჩვენთან სატელეფონო საუბარში აღნიშნა: "საქმე ძიებაშია და გამოძიების ინტერესებიდან გამომდინარე ვერც ერთ კითხვაზე ვერ გიპასუხებთ. რაც შეეხება ექსპერტიზას, ჯერ პასუხი არ არის ცნობილი." ამის შემდეგ ქალბატონმა მარინამ ტელეფონი გაგვითიშა და სხვა კითხვების დასმის შესაძლებლობა აღარ მოგვცა.

ბოლო 2 წლის მანძილზე კახეთი ძალადობის არაერთმა შემზარავმა ფაქტმა შეაძრწუნა. 2010 წლის აგვისტოში ახმეტაში მცხოვრები ოთხი თვის ფეხმძიმე ციცინო ქიტაშვილი შეყვარებულმა მოკლა. 2011 წლის აპრილში გურჯაანის რაიონის სოფელ ახაშენში 72 წლის თინა ძულიაშვილი საკუთარ სახლში გარდაცვლილი იპოვნეს. ერთ-ერთი ვერსიით ნაწამები ქალბატონი მკვლელობამდე გააუპატიურეს. ამავე წლის მაისში კახეთში 15 წლის გოგონა უცნობმა მამაკაცმა ჯერ სცემა, შემდეგ კი გააუპატიურა. 2011 წლის 20 ივნისს კახეთში კიდევ ერთი საზარელი ფაქტი მოხდა. ახმეტის რაიონის სოფელ მატანში შეიარაღებული ნიღბიანი პირი შათირიშვილების ოჯახს თავს დაესხა და 56 წლის ზურაბ შათირიშვილი დაცხრილა. ცეცხლსასროლი იარაღით მიყენებული ჭრილობების შედეგად მამაკაცი ადგილზე გარდაიცვალა. თავდამსხმელი ფიზიკურად გაუსწორდა დაღუპულის რძალსაც, რომელიც გააუპატიურა, შემდეგ კი მიიმალა.