დაახლოებით ათი დღეა, რაც გლდანის #8 პენიტენციალურ დაწესებულებაში პატიმარი ომარ ცისკარაშვილი სასამართლოს ობიექტურობის მოთხოვნით შიმშილობს.
ადვოკატ ნონა ფილაურის ინფორმაციით, ბრალდებულის მდგომარეობა დღითიდღე უარესდება და ის ექიმის მეთვალყურეობის ქვეშა იმყოფება.

ომარ ცისკარაშვილს ბრალი წარდგენილი აქვს სსკ-ის 178-ე მუხლის მესამე ნაწილის ე და მეოთხე ნაწილის ბ ქვეპუნქტებით (ძარცვა), 353 პრიმა მუხლის პირველი ნაწილით (წინააღმდეგობა, მუქარა ან ძალადობა საზოგადოებრივი წესრიგის დამცველის ან ხელისუფლების სხვა წარმომადგენლის მიმართ), ასევე 236-ე მუხლის მეორე და მესამე ნაწილით. ( ცეცხლსასროლი იარაღის შეძენა, შენახვა, ტარება).

„დაცვის მხარეს არ მიეცა საშუალება, იმ მოწმეთა სია გადაგვეცა სასამართლოსა და ბრალდების მხარისთვის , ვისი დაკითხვის აუცილებლობას საჭიროდ ვთვლიდით. ომარ ცისკარაშვილს ჩემამდე სხვა ადვოკატი ჰყავდა. მას არ ჩაუთვალეს რომ დასაკითხ პირთა სია ვადაში მიაწოდა სასამართლოს, რის გამოც მხოლოდ ბრალდების მოწმეები დაკითხეს. სასამართლოზეც გაიჟღერა, რომ მოწმეებზე ზეწოლა განხორციელდა პოლიციის მხირდან. ვითომ ამაზე პროკურატურამ ძიება დაიწყო, თუმცა პროცესი დროში გაიწელა. დააკავეს ერთი მოწმეც. ისინი, ვისაც სიმართლე უნდა ეთქვა, პროკურატურამ სიიდან ამოიღო. მოსამართლე არ მოიქცა სამართლიანად, რადგან მათი პირვანდელი ჩვენება გამოაქვეყნა სასამართლოს სხდომების დროს. დაიკითხნენ მხოლოდ ის გამომძიებლები ,რომლებმაც მოწმეები დაკითხეს. გამომძიებლებმა თქვეს, რომ მოწმეებზე ზეწოლა არ განხორციელებულა. ვფიქრობ, ეს არის თვალში ნაცრის შეყრა და უმსგავსობა.“


ნონა ფილაურის თქმითვე, ბრალდებული ომარ ცისკარაშვილი მიიჩნევს, რომ ის მიზანმიმართულად დააკავეს, რის გამოც, რამდენიმე დღის წინ, სამართლიანობის მოთხოვნით, მშრალი შიმშილობა დაიწყო.

„ბრალდებული დარწმუნებულია, რომ სამართლიანი ბრძოლით ვერაფერს მივაღწევთ. ომარი ობიექტურ სასამართლოს ითხოვს. მან უარი თქვა, მისი უფლებების დაცვა განვახორციელო, ის აცხადებს რომ ადვოკატის ყოლის საჭიროებას ვერ ხედავს, რადგანაც სასამართლომ დაცვის მხარის არც ერთი შუამდგომლობა არ დააკმაყოფილა. ომარი მიიჩნევს, რომ სასამართლო ისეა, როგორც პროკურორი პროცესზე. უკვე ათი დღეა შიმშილობს, წყალსაც არ სვამს, სახალხო დამცველის წარმომადგენელი იყო მისული სასჯელაღსრულების დაწესებულებაში, საკმაოდ დასუსტებულია და ვერ შეძლო ვერც ჩემი და ვერც მისი ნახვა. ჯანმრთელობის გამო ორ პროცესზე ვერ გამოცხადდა. ის აპირებს შიმშილობა გააგრძელოს მანამ, სანამ ამას შეძლებს. იქ, სადაც ადამიანი უფლებების დაცვას სამართლებრივად ვერ ახერხებს, პროტესტის უკიდურეს ფორმას მიმართავს. ციხის ადმინისტრაციას ომარის შიმშილობის შესახებ ცხადია, ინფორმაცია აქვს და ბრალდებული ექიმის მეთვალყურეობის ქვეშაა.“

Speqtri.ge პროკურატურასაც დაუკავშირდა, თუმცა მათ ამ საკითხთან დაკავშირებით კომენტარი არ გააკეთეს. არგუმენტად ის გარემოება დაასახელეს, რომ საქმე ჯერ კიდევ განხილვის პროცესშია.

გამოძიების ოფიციალური ვერსიით, ომარ ცისკარაშვილმა 2016 წლის 11 მაისს, გურჯაანში,  ღამით, საპატრულო პოლიციის პატრულ-ინსპექტორების მისამართით რამდენჯერმე გაისროლა, შემდეგ მართლსაწინააღმდეგოდ დაეუფლა მოქალაქის კუთვნილ ავტომანქანას და შემთხვევის ადგილიდან მიიმალა. სროლისას დაზიანდა საპატრულო ეკიპაჟის ორი ავტომანქანა. პოლიციის არც ერთი თანამშრომელი არ დაშავებულა.



ამავე თემაზე :

გურჯაანის პროკურატურა პოლიციელების მიერ მოწმის შესაძლო ცემის ფაქტს იძიებს

კახეთში სასამართლო და პროკურატურა ხელში პოლიციას უჭირავს - ნონა ფილაური

გურჯაანის სასამართლომ 19 წლის მოწმე პატიმრობაში დატოვა

გურჯაანის სასამართლომ ცრუ ჩვენებისთვის დაკავებული მოწმე გაათავისუფლა

გურჯაანის სასამართლომ მოწმეს პატიმრობა შეუფარდა

პოლიციელების მიერ მოწმის შესაძლო ცემის ფაქტს გურჯაანის პროკურატურა სწავლობს