გურჯაანის რაიონულ სასამართლოში პოლიციელის ცემაში ბრალდებული, 19 წლის გიორგი მოლაშვილის სასამართლო პროცესი რამდენიმე წუთის წინ დასრულდა. სხდომაზე პირველ მოწმედ ყვარლის რაიონული სამმართველოს დაზარალებულად ცნობილი უფროსი ინსპექტორ-გამომძიებელი ვახტანგ. მ დაიკითხა.

მისი განმარტებით, 2016 წლის 3 თებერვალს, ყვარლის რაიონულ სამმართველოში შევიდა ოპერატიული ინფორმაცია, რომლის თანახმადაც გიორგი მოლაშვილი ნარკოტიკული საშუალების ზემოქმედების ქვეშ იმყოფებოდა. პატაკის საფუძველზე, ის და ამავე სამმართველოს თანამშრომელი მიხეილ.ტ. ყვარელში ე.წ. „ბოგირის“ ტერიტორიაზე გავიდნენ და მოლაშვილი ჯერ ყვარლის პოლიციაში, ხოლო შემდეგ თელავის ნარკოლოგიურ განყოფილებაში გადაიყვანეს. მისი მტკიცებით, მოლაშვილს მარიხუანას ზემოქმედება დაუდასტურდა, თუმცა ამას უარყოფდა. ამიტომ ბიოლოგიური მასალა თბილისში ექსპერტიზაზე გადაიგზავნა, ხოლო ბრალდებული ყვარლის რაიონულ სამმართველოში განცხადების დასაწერად წაიყვანეს. პოლიციელის თქმითვე, ამ დროს, ოთახში მხოლოდ გიორგი მოლაშვილი, ვახტანგ.მ და სხვა სამი მოქალაქე იმყოფებოდა.

-„მას ავუხსენი, როგორ უნდა დაეწერა განცხადება. უკვე ასრულებდა წერას, როდესაც აგრესიულად მითხრა, პოლიციაში როდემდე უნდა მატაროთო. თავს დამესხა, დოკუმენტები დახია და დამარტყა, მაგიდას დავეჯახეთ, მეტლახზე ფეხი დამიცურდა და წავიქეცი, წაქცეულსაც ჩამარტყა. იგინებოდა სანამ ბორკილებს დაადებდნენ და მერეც. დაზიანდა კომპიუტერიც, დამიხია სამსახურის ფორმა. უკვე წაქცეული ვიყავი, როდესაც საშველად ჩემს თანამშრომლებს მოვუხმე. დალურჯება მქონდა სახეზე, კისერთან და ხელზე. მე მისთვის არ დამირტყავს, შეიძლება დაზიანებები დაკავების მომენტში მიიღო. “-აღნიშნა ვახტანგ.მ-მ პროცესზე.

ბრალდებულის ადვოკატმა დღევანდელ სხდომაზე განაცხადა, რომ თავდაპირველად გიორგი მოლაშვილს აღმკვეთ ღონისძიებად პატიმრობა არასწორად შეეფარდა. ამიტომ , მან დააყენა შუამდგომლობა, რომ ბრალდებული 5 000- ლარიანი გირაოს სანაცვლოდ სასამართლო დარბაზიდან გაეთავისუფლებინათ. შუამდგომლობა მოსამართლე ნუნუ ნემსიწვერიძემ არ დააკმაყოფილა და ის კვლავ პატიმრობაში დატოვა.

მორიგი სასამართლო სხდომა 18 ივლისს, 13:30 საათზე ჩაინიშნა.

შეგახსენებთ, რომ 19 წლის გიორგი მოლაშვილი სამართალდამცველებმა მიმდინარე წლის 3 თებერვალს საკუთარ საცხოვრებელ სახლთან, ყვარელში დააკავეს. მას ბრალი 353- ე პრიმა მუხლით აქვს წაყენებული, რაც პოლიციელზე თავდასხმას გულისხმობს.

გიორგი მოლაშვილი კი აცხადებს, რომ სამართალდამცველები ყვარლის რაიონულ სამმართველოში მას ფიზიკურად თავადვე გაუსწორდნენ.