"დედოფლისწყაროელმა ფერმერებმა საკუთარ სოსოფლო-სამეურნეო ნაკვეთებთან ერთად ქარსაცავი ზოლი გადაწვეს", - ამის შესახებ ბუნების დაცვის მსოფლიო ფონდის (WWF) მონიტორინგის ჯგუფის წევრი ამირან კოდიაშვილი სოციალურ ქსელში წერს. უცვლელად გთავაზობთ, მის პროფილზე გამოქვეყნებულ სტატუსს. "რამდენიმე დღის წინ, ვაშლოვანის დაცულ ტერიტორიებზე, ინფოტურის ჩასატარებლად მივდიოდით, გზაზე, შირაქში, ისეთი სურათი დამხვდა, რომ გული ნერვიულობით კინაღამ გამისკდა. ჩემი პირველი ემოცია ისეთი საშინელი იყო, რომ თავი შევიკავე იმ დღესვე გამევრცელებინა ინფორმაცია ფეისბუქზე. ახლა ცოტა დავწყნარდი, მაგრამ მინდა მივმართო დედოფლისწყაროელებს, უფრო სწორად იმ დედოფლისწყაროელებს, რომლებმაც ასეთი საშინელება მოაწყვეს შირაქში. ღვთის მადლითა და დედაბუნების შეწევნით წელს მარცვლეულის კარგი მოსავალი მოვიდა დედოფლისწყაროში და რით გადაუხადეთ ჩვენ ბუნებას? გადავწვით და გადავბუგეთ მთელი შირაქი, რა უბედურებაა ხალხო, როგორ ვერ უნდა დავიდეს თქვენს შეგნებამდე, რომ ნაკვეთის გადაწვა ანადგურებს მიწას, რა გახდა ის 10 ლარი ჰექტარზე, რომ ჩაიჩეხოს დარჩენილი ნამჯა მიწაში. ასე ხომ ვაკეთილშობილებთ მიწას ვიცავთ მის ჰუმუსს. ნუთუ ეს ელემენტარული ცოდნა ვერ უნდა დავიყვანოთ შეგნებამდე. ამ ბოლო წლებში ქარსაცავებმა ცოტა წამოიწია, აქა-იქ უკვე 3-4 წლიანი ამონაყარი თვალს ახარებდა და რა? მოისპო და განადგურდა ზოგიერთი "ტვინგაყინული" ფერმერის გამო. რა უბედურებაა, რით ვეღარ დაადგა საშველი ელემენტარული კანონის მიღებას, აიკრძალოს სასოფლო სამეურნეო ნაკვეთების გადაწვა, ყველა ნორმალურად მოაზროვნე ადამიანისთვის გასაგებია, რომ გადაწვა დაბლა სწევს მიწის ხარისხს, და თუ ასეა, ყველას უნდა აეკრძალოს ამის კეთება, გინდა შემოხვნით და გინდა შემოუხნავად. ხომ კარგად დარაჯობდა ყველა ფერმერი მოსავლის აღებამდე ყანებს, ახლა აღარ არის არა საჭირო? არაფრის ღირსი არ არის ის საზოგადოება, რომელიც თავის ეროვნულ სიმდიდრეს ასე მოექცევა. რამდენი წელია საერთაშორისო ფონდები გვეხმარებიან, რომ როგორმე შევარბილოთ გაუდაბნოების პროცესი, დავიცვათ ჩვენი სასიცოცხლო გარემო და რა უნდა იფიქროს ამის შემხედვარე იმ ხალხმა? ველური და უკულტურო ხალხი, აი რას იტყვიან. მინდა მოვუწოდო ყველას ვისაც გული ეტკინა და ასევე ვისაც ეხება და ევალება დაიცვას სასოფლო-სამეურნეო სავარგულები, გამოვიყენოთ ეს საშინელი მოვლენა დადებითად და მოვითხოვოთ უმკაცრესად აიკრძალოს კანონით სასოფლო სამეურნეო მიწის გადაწვა", - წერს ამირან კოდიაშვილი. აღნიშნულთან დაკავშირებით, speqtri.ge-მ გარემოს დაცვის სამინისტროს მიმართა. რამდენიმე წუთში შემოგთავაზებთ კომენტარს, თუ რა რეაგირებას მოახდენს ამ ფაქტზე სამინისტრო.