გასულ კვირას გურჯაანის მუნიციპალიტეტის ერთ-ერთ სოფელში ძალადობის ფაქტი გახმაურდა. როგორც ცნობილი გახდა, მერვეკლასელმა ბიჭებმა მეშვიდეკლასელი გოგონა გააუპატიურეს. დანაშაულზე სისხლის სამართლის საქმე აღიძრა. როგორც "სპექტრთან“ ინტერვიუში საჯარო სკოლის დირექტორი აღნიშნავს, შემთხვევა სკოლის ტერიტორიაზე არ მომხდარა. - "სრული პასუხისმგებლობით ვაცხადებ, სკოლის ტერიტორიაზე, საგაკვეთილო პროცესის დროს არაფერი ძალადობის მაგვარი და მაგის მსგავსი არ მომხდარა. ჭორის დონეზე ვერაფერს გავავრცელებ და ვერც კომენტარს გავაკეთებ, რადგან არაფერი ვიცი. ინფორმაციას ვერც უარვყოფ და ვერც დავადასტურებ.“ აღნიშნულ ფაქტზე საქმე სსკ-ის 138–ე მუხლით მიმდინარეობს, რაც სექსუალური ხასიათის ძალმომრეობით ქმედებას გულისხმობს. მასალების მიხედვით, მე–7 კლასელი გოგონას გაუპატიურებაში, ამ ეტაპზე, ამავე სკოლის მე–8 კლასის ორი მოსწავლე ბიჭის ბრალეულობაა გამოკვეთილი. საქართველოს ახალგაზრდა იურისტთა ასოციაციის კახეთის ოფისმა გოგონას ოჯახს სამართლებრივი დახმარება შესთავაზა, თუმცა მათგან უარი მიიღო. - "ჩვენ დახმარების გაწევა აღუთქვით, მაგრამ მათგან აგრესიული უარი მივიღეთ. ალბათ გაღიზიანებულები არიან. მიზეზი, თუ რატომ არ დაგვთანხმდნენ თანამშრომლობაზე, თავად ოჯახთან უნდა მოიკითხოთ,“- აღნიშნა კახეთის კოორდინატორმა მარეხ მგალობლიშვილმა. მისივე განმარტებით, საბედნიეროდ, მსგავსი პრობლემით საიას კახეთის ოფისისთვის ჯერ არავის მიუმართავს. ოჯახმა ასევე უარი განაცხადა სოციალური მუშაკის დახმარებაზე. "სპექტრთან“ საუბარში არასამთავრობო ორგანიზაცია "პარტნიორობა ადამიანის უფლებებისთვის“ პროექტის მართვის მენეჯერი ანა არგანაშვილი აღნიშნავს, რომ პრობლემა თანაბრად ეხება ძალადობას როგორც სრულწლოვნებზე, ასევე არასრულწლოვნებზე. "ძალიან მნიშვნელოვანია, რომ დაცული იყოს ყველა ქალისა და ბავშვის უსაფრთხოება. სახელმწიფო სტრუქტურები ყურადღებით უნდა მოეკიდონ ამ შემთხევების პრევენციას. განსაკუთრებით მნიშვნელოვანია საგანმანათლებლო დაწესებულებების პასუხისმგებლობა და როლი, როდესაც საქმე ეხება არასრულწლოვნებს, პოლიცია და სხვა საგამოძიებო სტრუქტურებიც ადექვატურად უნდა მოქმედებდნენ. სამწუხაროდ, თუ ასეთი ფაქტები ხდება, აუცილებელია დაზარალებულის რეაბილიტაცია, სამედიცინო თუ ფსიქოლოგიური დახმარების გაწევა. თანაბრად მნიშვნელოვანია ასეთი ფაქტების პრევენცია. სახელმწიფოს აქვს ბავშვთა დაცვის მთელი სისტემა, ამ შემთხვევაში მხოლოდ ოჯახმა არ უნდა იზრუნოს ბავშვზე. თუ ოჯახი ამას ვერ ახერხებს, საჭიროა სახელმწიფოს ჩართულობა. არსებობს სოციალური მომსახურების სააგენტო და მათ ყველა ზომა უნდა მიიღონ ბავშვის დასაცავად.“- გვითხრა ანა არგანაშვილმა. მისივე განმარტებით, ქვეყანაში მსხვერპლისთვის რეაბილიტაციის გაწევის სერვისი არ მუშაობს. "- რამდენადაც ვიცი, ასეთ შემთხვევაში დაზარალებულის რეაბილიტაციის მომსახურება არ არის განვითარებული. არც რეგიონებში და არც თბილისშია ხელმისაწვდომი. ეს არის სახელმწიფოს ძალიან სერიოზული პრობლემა, რასაც სათანადო ყურადღება სჭირდება. ფსიქოლოგის მომსახურება ხელმისაწვდომი უნდა იყოს, რათა მსხვერპლი არ დარჩეს კონსულტაციის გარეშე.“ ანა არგანაშვილი კიდევ ერთ პრობლემაზე საუბრობს. მისი განცხადებით, მედიასაშუალებებმა საკითხი დაზარალებულის მაიდენტიფიცირებელი ნიშნებით გააშუქეს. "ძალიან შემაშფოთებელია, რომ ეს თემა გაშუქდა მედიაში ბავშვის კონფიდენციალობის დარღვევის რისკით. სამწუხაროდ, დასახელებული იყო სოფელი, სკოლის დირექტორის ვინაობა, ვიდეო-სიუჟეტიც იდენტიფიცირებადია. მედია პასუხისმგებლობით უნდა მოეკიდოს ასეთ საკითხს, რადგან ერთი უფლების დაცვა მეორეს დარღვევის ხარჯზე არ უნდა მოხდეს.“ აღსანიშნავია, რომ გოგონაზე მოძალადეთაგან ერთ-ერთი 13 წლის არის და ის მოსალოდნელი პასუხისმგებლობისგან სრულად თავისუფლდება. მეორე კი 14 წლისაა, თუმცა პოლიციას ჯერ არ დაუკავებია. გავრცელებული ინფორმაციით, საქმე გვაქვს ჯგუფურ გაუპატიურებასთან, მაგრამ გამოიკვეთება თუ არა სხვა პირთა ბრალეულობა, ამას გამოძიება დაადგენს. თამარ კაპანაძე