არასამთავრობო ორგანიზაცია „საერთაშორისო გამჭვირვალობა – საქართველო“-მ კვლევის შედეგად საპატრიარქოს რადიო „ივერია“-ს კანონით გაუთვალისწინებელი შეღავათები აღმოუჩინა. აღნიშნულის შესახებ მარეგულირებელი კომისიისთვისაც ცნობილია, თუმცა, აღნიშნული უწყება კანონდარღვევის ფაქტზე არ რეაგირებს. დღეისათვის საქართველოში სამოცზე მეტი მაუწყებელი ფუნქციონირებს, რომელთა საქმიანობა ლიცენზირების ან/და ავტორიზაციის საფუძველზე ხორციელდება. რადიოსიხშირული სპექტრის სარგებლობა შესაძლებელია ლიცენზიის საფუძველზე, რომელსაც საქართველოს კომუნიკაციების ეროვნული კომისია კონკურსის წესით შერჩეულ პირებს გადასცემს. კომისია, მოქმედი კანონმდებლობის თანახმად, ასევე აკონტროლებს სალიცენზიო პირობების დაცვას, ახდენს მოდიფიცირებას, აჩერებს და აახლებს ან აუქმებს ლიცენზიას. მაუწყებლობის სფეროში ლიცენზიის მფლობელი შეიძლება იყოს საქართველოს რეზიდენტი ფიზიკური ან იურიდიული პირი, რომელიც არ წარმოადგენს ადმინისტრაციულ ორგანოს ან მის თანამდებობის პირს, პოლიტიკურ პარტიას, ოფშორულ ზონაში რეგისტრირებულ პირს და ა.შ. კანონმდებლობით, რელიგიურ დაწესებულებებს არ ეკრძალებათ სიხშირული სპექტრის გამოყენების საფუძველზე მაუწყებლობა. საქართველოს მართლმადიდებელი ეკლესია, რომელიც სხვა ინსტიტუტებთან შედარებით ნდობის მაღალი ხარისხით სარგებლობს, ახორციელებს როგორც ტელევიზიის, ასევე რადიოს ოპერირებას. საპატრიარქოს საკუთარი ტელეკომპანია „ერთსულოვნება“ სპეციალიზებული მაუწყებლობის კერძო ლიცენზიას ფლობს და თბილისსა და მიმდებარე ტერიტორიებს ფარავს. საპატრიარქოს ასევე აქვს საკუთარი რადიო – „ივერია“. „კომუნიკაციების ეროვნული კომისიის მიერ მოწოდებული ინფორმაციის მიხედვით, „ივერია“ თბილისში და საქართველოს რამდენიმე სხვა ქალაქში მაუწყებლობს და სამაუწყებლო ლიცენზიის მფლობელთა რეესტრში არ ფიქსირდება, ანუ საპატრიარქოს რადიო „ივერია“ ლიცენზიის გარეშე მაუწყებლობს“, - ნათქვამია ორგანიზაციის კვლევაში. მაუწყებლობის შესახებ საქართველოს კანონის 75-ე მუხლის მე-4 პუნქტის მიხედვით ულიცენზიოდ რადიოსიხშირული სპექტრით სარგებლობა იკრძალება და ითვალისწინებს დაჯარიმებას ადმინისტრაციულ სამართალდარღვევათა კოდექსის 144 (1) მუხლის თანახმად 5000 ლარის ოდენობით. იგივე ქმედება, ჩადენილი განმეორებით, გამოიწვევს დაჯარიმებას 10000 ლარის ოდენობით, მესამედ და მეტჯერ ყოველ ცალკეულ შემთხვევაში 50000 ლარის ოდენობით. ულიცენზიოდ მაუწყებლობის შემთხვევაში, კომპანიის მიმართ არ ვრცელდება ყველა ის ვალდებულება, რომელსაც ქართული კანონმდებლობა ითვალსწინებს. კერძოდ, მაუწყებელი არ იხდის კანონით დადგენილ სალიცენზიო მოსაკრებელს, არ ავსებს შესაბამისობის დეკლარაციას, არ აწვდის კომისიას ინფორმაციას შემდგომი გასაჯაროების მიზნით შემოსავლების შესახებ და სხვა. „საერთაშორისო გამჭვირვალობა – საქართველო“-ს ინფორმაციით, კომუნიკაციების ეროვნულმა კომისიამ წარსულში არაერთ კომპანიას დააკისრა ფულადი სანქცია ულიცენზიოდ საქმიანობის გამო („ოდიში“, „ტელერადიოკომპანია თრიალეთი“ „შპს სატელიტსერვისი“ და სხვა). მიუხედავად იმისა, რომ მარეგულირებლისთვის უკვე რამდენიმე წელია ცნობილი არის საპატრიარქოს რადიო „ივერიის“ ულიცენზიო მაუწყებლობის შესახებ, კომისია კანონის დარღვევის ფაქტზე მაინც არ რეაგირებს.