"ერთიანი ნაციონალური მოძრაობის" წევრი, საკრებულოს დეპუტატი, თეიმურაზ ბუწაშვილი გურჯაანის მუნიციპალიტეტის საკრებულოს თავმჯდომარეს, ივანე ბერიძიშვილს ზეწოლაში ადანაშაულებს. მისი განმარტებით, საკრებულოს თავმჯდომარემ "ნაციონალური მოძრაობის" ფრაქციას ოთახის დატოვებისკენ მოუწოდა. "ერთიანი ნაციონალური მოძრაობა" გურჯაანის საკრებულოში ექვსი დეპუტატით არის წარმოდგენილი. შესაბამისად, ჩვენ შევქმენით ორი ფრაქცია და ორი სამუშაო ოთახი გვაქვს. კაბინეტში შემოსვლიდან მეორე დღესვე, საკრებულოს თავმჯდომარე დაინტერესდა ოთახების ადგილდებარეობით. როდესაც გაიგო, რომ ჩვენს ფრაქციას ჰქონდა პერსონალური ოთახი, დაუძახა საკრებულოს აპარატის უფროსს, ფარნაოზ ბეროშვილს და საკითხში გარკვევა დაავალა. მთელი ერთი კვირაა, გაუთავებელი საუბარი მიდის იმაზე, რომ ჩვენ არ გვჭირდება ეს ოთახი. გვინდა მოვუწოდოთ საკრებულოს უმრავლესობასა და თავმჯდომარეს, რომ მოეშვან დესტრუქციულ მიდგომებს, მოგვცენ საშუალება ვითანამშრომლოთ ადგილობრივ ხელისუფლებასთან და ყველა გადაწყვეტილების მიღებაში თანაბრად გავინაწილოთ პასუხისმგებლობა. ზვიად ყვირალაშვილმა და ივანე ბერიძიშვილმა დაიბარეს ჩვენი ფრაქციის ხელმძღვანელი და მოსთხოვეს ოთახის გასაღების დატოვება. გურჯაანის მუნიციპალიტეტის საკრებულოში არსებობს საგადასახადო სამსახურის ფლიგელი, სადაც არიან აიპიებ-ის თანამშრომლები, საკრებულოს თავმჯდომარეს შეუძლია, მათ თხოვნით მიმართოს და გამოუყოს შესაბამისი ფართი, რადგან ეს ოთახი ეკუთნის საკრებულოს. ყველა ფრაქცია და კომისია მოათავსოს ისე, რომ სამუშაოს შესრულებისას ზედმეტი დისკომფორტი არ შეგვექმნას. მათ გვითხრეს, რომ დროებით გადით ამ ოთახიდან, აქ შემოვა ფრაქცია "ქართული ოცნება", ან კომისია, თუ გათავისუფლდება რომელიმე ოთახი, მაშინ გამოგვიყოფენ ადგილს. მე კი ვფიქრობ, რომ ოთახიდან გასვლა-არგასვლის საკითხზე კამათს, კამათი ისეთ თემებზე უნდა გავმართოთ, რომელიც ჩვენს მუნიციპალიტეტს აწუხებს." თეიმურაზ ბუწაშვილის თქმით, ფრაქცია "ნაციონალური მოძრაობა" ოთახის დათმობას არ აპირებს. - "ნებისმიერი ფრაქციის მუშაობისთვის შესაბამისი პირობებია საჭირო. ვაპირებთ, ძალიან ბევრი შეხვედრის გამართვას, დავნიშნავთ, მოქალაქეების მიღების დღეს, სამუშაო პროცესის ნაყოფიერად წარმართვისთვის აუცილებელია კაბინეტის ქონა. ქუჩიდან და კოროდორებიდან, იმ საქმეს ვერ გავაკეთებთ, რის გამოც გურჯაანის მოსახლეობამ მხარი დაგვიჭირა." გურჯაანის მუნიციპალიტეტის საკრებულოს თავმჯდომარე ივანე ბერიძიშვილი ზეწოლის ფაქტს უარყოფს და აცხადებს, რომ "ერთიან ნაციონალურ მოძრაობას" ოთახის დატოვება დროებით მოსთხოვა. - "საკრებულოში არ არის საკმარისი ადგილი. მათ ორი ოთახი აქვთ დაკავებული, ვთხოვეთ, რომ დროებით გადასულიყვნენ ერთ ოთახში, სანამ სხვა ოთახს გავათავისუფლებთ. ისევ მიეცემათ საშუალება, რომ გაფართოვდნენ. კომისისის თავმჯომარეებისთვის არ არის სამუშაო პირობები და იმიტომ ვთხოვეთ გასულიყვნენ. ზოგ ოთახში ორი კომისია შეგვყვავდა და ამას პლიუს ფრაქცია. მიზეზი ეს იყო და არა სხვა რამ." განმარტა მან.